Ադրբեջանում հնչող ռազմատենչ հռետորաբանությունն ի չիք է դարձնում միջազգային բանակցային ջանքերը. Միրզոյան

ՀՀ ԱԺ նախագահ Արարատ Միրզոյանը հունիսի 14-ին ընդունել է Գերմանիայի Դաշնային Հանրապետության Բունդեսթագի փոխնախագահ Թոմաս Օպերմանի գլխավորած պատվիրակությանը: Այս մասին տեղեկացնում են ՀՀ ազգային ժողովից:

Ողջունելով հյուրերին Ազգային ժողովում` խորհրդարանի ղեկավարը հույս է հայտնել, որ ներկա այցը նոր լիցք կհաղորդի երկու երկրների միջև դինամիկ զարգացող հարաբերություններին: Արարատ Միրզոյանի խոսքերով` ԳԴՀ վերջերս կատարած իր պաշտոնական այցը, ինչպես նաև երկու երկրների բարձրաստիճան ղեկավարության միջև հանդիպումները բազմաթիվ նոր ծրագրերով կհագեցնեն Հայաստան-Գերմանիա փոխհարաբերությունների օրակարգը: Դրանցում օրենսդիր մարմնի ղեկավարը կարևորել է միջխորհրդարանական ակտիվ համագործակցությունը տարբեր ձևաչափերով, որոնք շարունակական բնույթ կկրեն:

Ազգային ժողովի նախագահը երախտագիտություն է հայտնել գերմանական կողմին ԵՄ-Հայաստան Համապարփակ և ընդլայնված գործընկերության համաձայնագրի վավերացմանն ուղղված ջանքերի համար` ակնկալելով, որ դրա իրականացման փուլում Գերմանիան նույնպես ակտիվ դերակատարում կունենա: Այս համատեքստում Արարատ Միրզոյանն անդրադարձել է ՀՀ քաղաքացիների` ԵՄ մուտքի թույլտվության ազատականացման խնդրին` արձանագրելով, որ հասունացել է գործնական քայլեր կատարելու ժամանակը:

Շնորհակալություն հայտնելով ջերմ ընդունելության համար` Թոմաս Օպերմանն առանձնացրել է երեք հանգամանք, որոնք պայմանավորում են Հայաստանի հետ կապերի խորացման Գերմանիայի հետաքրքրվածությունը. 1915 թվականին Օսմանյան կայսրությունում հայերի նկատմամբ իրագործած ոճրագործությունների վերաբերյալ 2016 թվականին Բունդեսթագի ընդունած բանաձևը, Հայաստանում իրականացված թավշյա հեղափոխությունը, որն իր դրական արձագանքն ունեցավ Եվրոպայում, և ԳԴՀ կանցլեր Անգելա Մերկելի այցը Երևան:

«Մենք մեծ համակրանք ենք տածում Հայաստանի նկատմամբ և պատրաստակամ ենք ամրապնդելու երկկողմ հարաբերությունները»,- ասել է Բունդեսթագի փոխնախագահը:

Ազգային ժողովի նախագահը հյուրերին ներկայացրել է այն բարեփոխումները, որոնք ընթանում և իրականացվելու են ամենատարբեր ոլորտներում:

«Մենք հաստատակամ ենք հետևողականորեն զարգացնելու ժողովրդավարական արժեքները և ժողովրդավարությունը մեզանում այլևս հետընթաց չի ունենալու»,- նշել է Արարատ Միրզոյանը:

Խորհրդարանի ղեկավարն արժևորել է ԳԴՀ Բունդեսթագի կողմից Հայոց ցեղասպանությունը ճանաչող բանաձևի ընդունումը` ընդգծելով, որ միայն նման ոճրագործությունների ճանաչմամբ ու դատապարտմամբ հնարավոր կլինի կանխարգելել մարդկության դեմ ուղղված հանցագործությունները:

ԱԺ նախագահը հայկական կողմի պատրաստակամությունն է հայտնել շարունակելու ներդրում ունենալ միջազգային անվտանգության գործընթացներում` մասնավորապես անդրադառնալով Աֆղանստանում հայ խաղաղապահների արդյունավետ համագործակցությանը գերմանական հրամանատարության հետ:

Տեղեկացնելով, որ ԳԴՀ Բունդեսթագի պատվիրակության այցը տարածաշրջանային է` Թոմաս Օպերմանը նշել է, որ իրենց նպատակներից է նաև ծանոթանալ առկա հակամարտությունների լուծման կողմերի մոտեցումերին, նպաստելու երկխոսության ու խաղաղության մթնոլորտի հաստատմանը:

«Աշխարհում առկա բոլոր հակամարտություններին պետք է նայել մարդու իրավունքների պաշտպանության տեսանկյունից: Մարդկանց ազատ ապրելու իրավունքը չպետք է պայմանավորված լինի որևէ իշխանության քաղաքական նկրտումներով»,- ասել է խորհրդարանի ղեկավարը:

Նրա խոսքերով` Ադրբեջանում հնչող ռազմատենչ հռետորաբանությունը ի չիք է դարձնում միջազգային բանակցային ջանքերը:

Կողմերն անդրադարձել են նաև երկկողմ և բազմակողմ համագործակցության հեռանկարներին, կարևորել միջխորհրդարանական կապերի հետագա աշխուժացումը, երկու երկրների տարածաշրջանային փոխգործակցությունը: