Գյումրու համատիրություններին տեղական բյուջեից գումարներ կհատկացվեն, բայց շենքերի տանիքապատման ծախսերը շատ ավելին են դրանից

Գյումրու ավագանու հաստատմանն է ներկայացվել մի նախագիծ, որով համատիրություններից 16-ին հատկացվելու է մոտ 18 մլն դրամ բազմաբնակարան շենքերի տանիքների վերանորոգման համար: Եվս 8 մլն դրամ էլ կտրամադրվի շենքերում 220 տեսախցիկներ տեղադրելու համար: Համատիրությունների նախագահները ոչ միայն տեսախցիկների, այլև քաղաքի հին բնակֆոնդում կապիտալ նորոգումներ կատարելու համար նախատեսված գումարները շատ քիչ են համարում։ Տեղական բյուջեից ավելի շատ գումար են ուզել, բայց նվազագույնն է հատկացվում:

Գյումրու Կազաչի պոստ թաղամասի այս շենքերը կոտրված շիֆրերով ու ջրակալած պատերով, ձյան ու անձրևի տեղումներին դիմակայում են արդեն տասնյակ տարիներ։ Բնակֆոնդը տարեցտարի շարքից դուրս է գալիս, լիարժեք սպասարկում չկա։ Բնակիչների խոսքերով՝ երբ բողոքում են, բերում ընդամենը 3 թիթեղ են խփում տանիքին ու վերջ, բայց բնակվարձն ամբողջությամբ գանձում են:

Արդեն 20 տարի է՝ հրատապ է թաղամասի 6 շենքերի տանիքների վերանորոգումը, բայց համատիրությունը նոր անելիք չունի․ շենքերի տանիքները հիմնովին են փոխվելու, ինչը շատ մեծ գումար է պահանջում:

Գյումրու «Կենտրոն» համատիրության նախագահ Մովսես Ջուհարյանի խոսքերով՝ հիմա հասել են մի եզրագծի, երբ մնացել է փոխելու այն շենքերի տանիքները, որոնք մեծ ծախսեր են պահանջում ու այլևս տեղային, մասնակի նորոգումներով հարց չի լուծվի: Կազաչի պոստի շենքերը դրանց թվում են:

Քաղաքի ամենաշատ՝ 230 շենք սպասարկող համատիրության տարեկան բյուջեն մոտ 29 մլն դրամ է: Այսինքն՝ այդ գումարը 1 շենքի կապիտալ տանիքապատմանը կարող է բավականացնել։ Բայց տարվա մեջ միայն 1 շենքի կտուր չէ, որ փոխելու են։ Եվ ինչպես միշտ, դարձյալ գործում է ընդունված տարբերակը՝ տանիքի ծակված ու մաշված հատվածների վրա կարկատաններ են անում:

Գրեթե ոչինչ չի փոխվի նաև տեղական բյուջեից հատկացումից հետո: Այս համատիրությանը տալու են 5 մլն դրամ: Ըստ համատիրության ղեկավարի՝ այդ գումարը կբավականացնի միայն 10-15 շենքերի տանիքներում մասնակի նորոգումներ կատարելուն: Խնդիրներով, փաստորեն, հին բնակֆոնդին չեն զիջում նորերը: 6-8 տարի առաջ կառուցված Մուշ 2/2 թաղամասի շենքերում ծախսեր են պահանջվում «Գլենդել հիլզ» կազմակերպության թույլ տված շինարարական թերությունների վերացման համար։
«Կարին» համատիրությանը նախատեսված է հատկացնել 700․000 դրամ: Առաջնահերթ ծխաօդատար խողովակները կմեկուսացնեն, սա շինթերությունների հետևանք է։

Ըստ «Կարին» համատիրության ղեկավար Սենիկ Եսայանի՝ ծխաօդատարների մեկուսացում չապահովելու պատճառով բնակարաններում ջերմությունը չի պահպանվում: Անցած տարի էլ այս նույն համատիրությունը տեղական բյուջեից հատկացված գումարով ծխատարներին մետաղյա ցանցեր էր տեղադրել: Մուշ 2/2-ի շենքերում այլ բնույթի շինարարական թերություններ էլ կան, որոնք մինչև երաշխիքային ժամկետի ավարտը շինընկերությունը չի վերացրել:

Շենքերից ամեն օր երեսապատման սալիկներ են պոկվում ու ցած ընկնում: Ըստ բնակիչների՝ քարաթափումները դառնում են զանգվածային: «Երազ» համատիրության ղեկավար Սեյրան Պոլոյանի խոսքերով՝ ամեն անգամ աշտարակ-կռունկ են բերում շենքեր, որ երեսպատման քարերն ու տանիքների թիթեղները ամրացնեն: Այս համատիրությունը գումար է խնդրել երեսպատման սալիկներն ու տանիքների թիթեղներն ամրացնելու համար։

Առաջին անգամ ու ընդամենը 150 հազար դրամ է տեղական բյուջեից հատկացվելու 38 շենքի համար: Ըստ Սեյրան Պոլոյանի՝ այդ գումարը շատ քիչ է, դրանից իրենք կհրաժարվեն: Համատիրությունը 600.000 դրամ էր ուզել քաղաքապետարանից: Շենքերում տեսախցիկների տեղադրման համար էլ ֆինանսական բաշխումներ կան, թե դրանք որտեղ են տեղադրվելու՝ որոշելու է համատիրությունը ու թե մնացած տեխնիկական աշխատանքներն ինչպես են արվելու, դեռ հայտնի չէ։

Բազմաբնակարան շենքերում գողությունների դեպքերը շատացել են, տրամադրվող տեսախցիկները քիչ են: Տեղական բյուջեից հատկացվող գումարով փակելու են տեսախցիկի ձեռքբերման ծախսերը, իսկ մնացած գործերի համար պահանջվող ծախսերը ենթադրում են, որ համատիրություններն են անելու: