Ի՞նչ կապ ունի Ռուսաստանում գազի գնի բարձրացումը Հայաստանի հետ

Ռուսական մամուլում այսօր մեծ շուքով շրջանառվեց լուրը, որ հուլիսի 1-ից Ռուսաստանում գազը թանկանալու է 1,4 տոկոսով։ Դա արվում է երկրի դաշնային հակամենաշնորհային մարմնի որոշման հիման վրա՝ գնաճի սահմաններում գազի գինը նորմավորելու համար։ Այս նորությունը Հայաստանում անորոշ սպասում առաջացրեց՝ Հայաստանում գազը կթանկանա՞։

Հիմա՝ ՈՉ

Հանրային ծառայությունները կարգավորող հանձնաժողովը որևէ դիմում, հայտ չի ստացել «Գազպրոմ Արմենիա» ընկերությունից՝ գազի գնի հնարավոր թանկացման վերաբերյալ հայցով։ Այս մասին SHANTNEWS.am-ին հայտնեց ՀԾԿՀ խոսնակ Լիանա Ազիզյանը։

«Նշված թանկացումը վերաբերում է Ռուսաստանի բնակչության և արդյունաբերողների համար «Գազպրոմի» կողմից մատակարարվող գազին։ Դա մեզ չի վերաբերում»,- ասաց Ազիզյանը։

Նրա խոսքերով՝ ռուսական մամուլի այդ հրապարակումը հայկական դաշտ հասավ փոքր-ինչ աղավաղված, ինչի հետևանքը եղավ թյուրընկալումը։

Իսկ հետո՞

Հայաստանում գազի գնի ձևավորման վրա ազդում են բազմաթիվ գործոններ, ու բանակցությունները ռուսական կողմի հետ դեռ չեն ամփոփվել։ Այս մասին այսօր առաջինը ասաց փոխվարչապետ Մհեր Գրիգորյանը։ Նա ասաց, որ բանակցությունների երկու ճյուղ կա՝ գինը սահմանին ու գինը բաշխման ցանցում։ Առաջինը ռուսական կողմի հետ բանակցություններին է վերաբերում, երկրորդը՝ դուստր ձեռնարկությանը՝ «Գազպրոմ Արմենիային»։

2018 թվականին սահմանի վրա գազի գինը 150 դոլար էր։ 2019 թվականին այն դարձավ 165 դոլար, բայց Հայաստանի իշխանությունների հետ պայմանավորվածության արդյունքում «Գազպրոմ Արմենիան» իր հաշվին զսպեց գնի բարձրացումը։ Դա արվեց ընկերության ծախսերի կրճատման արդյունքում, և սպառողների համար գինը մնաց անփոփոխ։ Բայց այդ գինը Հայաստանի համար սահմանված է մինչև տարեվերջ։

Իսկ մինչև մյուս տարվա սկիզբ պետք է բանակցություններ անցկացնել և՛ ռուսական կողմի հետ, և՛ դուստր ձեռնարկության հետ, որպեսզի գազի գնի թանկացում չլինի 2020 թվականին։

«Կան բազմաթիվ ծախսեր, որոնց շուրջ նախնական պայմանավորվածություն կա, և դրանք պետք է նվազեցվեն՝ «Գազպրոմ Արմենիայի» գործունեության օպտիմիզացիայի հաշվին … Ծախսեր շատ եղել են, չեմ բացառում, որ ուռճացված էլ են եղել, բայց ես չեմ ցանկանում հիմա դետալիզացնել, որովհետև ի վերջո էդ բանակցությունները կունենան վերջնական տեսք, ու դուք դրա մասին կիմանաք»,- լրագրողներին ասաց Գրիգորյանը։