Խորհրդարանը երկրորդ ընթերցմամբ ու ամբողջությամբ 3 օրինագիծ է ընդունել

Այսօր խորհրդարանում ներկայացվել ու երկրորդ ընթերցմամբ ընդունվել է երեք օրինագիծ: Նախ` երկրորդ ընթերցմամբ ներկայացվել է «Նորմատիվ իրավական ակտերի մասին ՀՀ օրենքում փոփոխություններ կատարելու մասին» օրենքի նախագիծը երկրորդ ընթերցմամբ  և ամբողջությամբ ընդունելու հարցը:

«Նախագծի ընդունումը պայմանավորված է «Նորմատիվ իրավական ակտերի մասին» օրենքով սահմանված  այն ելակետային գաղափարի կյանքի կոչման իրողությամբ, որ ՀՀ ԱՆ-ն պարտավորվում է նորմատիվ իրավական ակտեր ընդունող մարմինների կողմից ներկայացված իրավական ակտերի պաշտոնական հրապարակումն ապահովել նախարարության պաշտոնական կայքում»,- ասել է  հիմնական զեկուցող, ՀՀ արդարադատության նախարարի տեղակալ Տիգրան Խաչիկյանը՝ ևս մեկ անգամ հիշեցնելով, թե ինչ խնդիր էր առաջացել և ինչպես են պատկերացնում դրա լուծումը:

Հիմնական զեկուցողն ասել է, որ առաջինից երկրորդ ընթերցման ժամանակ, նախագծի բովանդակության հետ կապված, առաջարկություն չեն ստացել:

Խորհրդարանում հաջորդը քննարկման թեմա է դարձել «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» օրենքի նախագիծը երկրորդ ընթերցմամբ և ամբողջությամբ ընդունելու մասին հարցը:

«Ըստ Էության՝ խնդիրը պայմանավորված է նրանով, որ մինչ այս փաստացի գործող քաղաքաշինական, տեխնիկական և հրդեհային անվտանգության տեսչական մարմինն օրենսդրական անորոշության պատճառով չի ունեցել իր համարժեք ձևակերպումը Վարչական իրավախախտումների վերաբերյալ ՀՀ օրենսգրքով: Մենք առաջարկում ենք ապահովել եզրույթների համապատասխան կիրառումը թե´ Վարչական իրավախախտումների մասին օրենսգրքով, թե´ տեսչական մարմինների մասին ՀՀ օրենքով: Վարչական իրավախախտումների վերաբերյալ օրենսգիրքն ունի արմատական փոփոխության անհրաժեշտություն: Սա մեր այն իրավական ակտերից է, որում դեռևս օգտագործվում են «ԽՍՀՄ իրավական ակտեր ձևակերպումը», «Սոցիալիստական Հայաստան» ձևակերպումը: Մենք ձեռնարկել ենք Վարչական իրավախախտումների վերաբերյալ նոր օրենսգրքի մշակման աշխատանքներ, ինչն առաջիկայում կներկայացվի հանրային քննարկման»,- ասել է փոխնախարարը՝ պարզաբանելով, թե այս օրենքի ընդունումն ինչ այլ խնդիրներ էլ կլուծի:

Երրորդ օրինագիծը, որը դարձյալ քննարկվել է երկրորդ ընթերցմամբ, «Պետական կառավարման համակարգի մարմինների մասին ՀՀ օրենքում փոփոխություն կատարելու մասին» օրենքի նախագիծն էր:

«Այս նախագծով լուծվում է ՀՀ գյուղատնտեսության նախարարության Սննդամթերքի անվտանգության ծառայության պետական կարգավիճակի հստակեցման հետ կապված հարցը: Այս մարմնի քաղաքացիական ծառայողները շարունակելու են առանց մրցույթի և ժամկետային աշխատանքի պայմանագրի կնքման վերանշանակվել արդեն իրավահաջորդ համարվող Սննդամթերքի անվտանգության տեսչական մարմնում»,- ասել է ՀՀ արդարադատության նախարարի տեղակալ Տիգրան Խաչիկյանը:

«Լուսավոր Հայաստան» խմբակցության ղեկավար Էդմոն Մարուքյանն ասել է, որ իրենք դեմ են այս օրինագծին, քանի որ օրենքի ընդունման ժամկետը չի պահպանվել և հարցը չի քննարկվել Պետաիրավական հարցերի մշտական հանձնաժողով:

ՀՀ ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը պարզաբանել է, որ Պետաիրավական հարցերի մշտական հանձնաժողովը նիստ չի հրավիրել, քանի որ չէր պահպանվի գրավոր առաջարկներ ներկայացնելու 2-օրյա ժամկետը: Բոլոր խորհրդարանական ուժերը հրավիրվել են քննարկմանը և այդ քննարկմանը մասնակցել է նաև «Լուսավոր Հայաստան» խմբակցության ներկայացուցիչը:

Խնդիրը շատ ավելի մեծ կլիներ, եթե ժամկետները չպահպանվեին:

Ամեն դեպքում, ինչպես նախորդ, այնպես էլ «Պետական կառավարման համակարգի մարմինների մասին ՀՀ օրենքում փոփոխություն կատարելու մասին» օրենքի նախագիծը ընդունվել է: