Վարչապետ Նիկոլ Փաշինյանը այսօր՝ հունիսի 5-ին, լրագրողների հետ ճեպազրույցում կրկին խոսել է այն ուժերի մասին, որոնք, ըստ վարչապետի, փորձում են դավադրության միջոցով պատերազմ հրահրել և հողեր հանձնել: Վարչապետը նշել է, որ այդ մասին արդեն բարձրաձայնել է Գորիսում տեղի ունեցած նախընտրական հավաքի ժամանակ։
«Դա աննախադեպ երևույթ է եղել, և´ ԼՂՀ, և´ ՀՀ ռազմաքաղաքական ղեկավարության հետ մի քանի անգամ հանդիպումներ եմ ունեցել և ներկայացրել Արցախի հարցի լուծման վերաբերյալ իմ տեսլականը։ Ես հետաքրքրվել եմ՝ իմ առաջարկած տեսլականի հետ կապված պրիտենզիաներ կա՞ն, համաձա՞յն են էս տեսլականի հետ, թե՞ համաձայն չեն։
Եվ պարզվել է, որ բոլորը համաձայն են դրա հետ։ Եվ երբ դրանից հետո էդ սեղանի շուրջ ներկա մարդիկ հրահրում են տակից՝ ասելով, որ այս կառավարությունը հողեր է ծախում, ինձ մոտ հարց է առաջանում՝ ես էս մարդու հետ նստել ու խոսել եմ, գաղտնիության պայմաններում, թե ինչ պայմաններով պետք է գնանք առաջ։ Եթե էս մարդը դուրս ա գալիս, իր օգնականին ասում ա՝ գնա «Ֆեյսբուքում» գրի, որ Փաշինյանը հողերը ծախում ա, ինչի՞ համար է ինքը դա անում, եթե ինքը հարյուր տոկոսով գիտի, թե ինչ ա կատարվում։ Ընդ որում՝ երբ ՀՀ իշխանության ղեկին եղել է իր պարի ընկերը, ինքը ոչ մի ինֆորմացիա չի ունեցել, իրեն հարկ էլ չեն համարել տեղյակ պահել, թե ինչ ա կատարվում, ինչ են մտածում և ինչ են ուզում ասել»,- ասաց Նիկոլ Փաշինյանը։
Նա նաև նշեց, որ ինքն է Արցախի հարցի բանակցային գործընթացի վերաբերյալ փաստաթղթերը փոխանցել ԼՂ իշխանություններին։ Վարչապետի խոսքերով` նրանք դրանից առաջ տեղյակ չեն եղել, թե ինչ է բանակցվել:
«Վտանգները կառավարվում են և արմատախիլ կարվեն»,- ասաց վարչապետը:
