Մի՛ հեռացեք, եկեք կատարենք այս գործարքը․ Թրամփը՝ Թերեզա Մեյին

Այսօր Միացյալ Նահնագների նախագահ Դոնալդ Թրամփը Մեծ Բրիտանիայի վարչապետ Թերեզա Մեյի հետ Սենթ  Ջեյմսի պալատում մասնակցել է աշխատանքային նախաճաշի: Դրա ընթացքում կողմերը քննարկել են հնարավոր առևտրային պայմանագիր կնքելու հարցը: Հանդիպմանը Թրամփը Թերեզա Մեյին հորդորել է վերանայել իր որոշումը՝ վարչապետի պաշտոնը լքելու հետ կապված:

«Մեծ պատիվ էր Ձեզ հետ աշխատելը: Ես չգիտեմ՝ ինչպիսին է Ձեր պաշտոնավարման ժամանակացույցը, բայց մի հեռացեք, եկեք կատարենք այս գործարքը»,- հայտարարել է Թրամփը:

Դրանից հետո կողմերը բանակցությունները շարունակելու նպատակով ևս մեկ անգամ հանդիպել են Մեյի նստավայրում: Այդտեղ կողմերը քննարկել են մի շարք կարևոր հարցեր, ինչպիսիք են առևտրային, պաշտպանության և կլիմայի փոփոխությունների վերաբերյալ հարցեր, ինչպես նաև Եվրամիությունից Մեծ Բրիտանիայի դուրս գալը:

Հանդիպմանը մասնակցել են նաև Միացյալ Նահանգների նախագահի ազգային անվտանգության հարցերով խորհրդական Ջոն Բոլթոնը, պետքարտուղար Մայք Պոմպեոն և Թրամփի դուստր Իվանկան, որը նաև նրա խորհրդականն է:

Երկկողմ բանակցություններից հետո երկու երկրների ղեկավարները արդյունքներն ամփոփել են համատեղ մամուլի ասուլիսում, որտեղ Մեյը բարձր է գնահատել ԱՄՆ-ի հետ թանկ և հատուկ հարաբերությունները՝ միևնույն ժամանակ նշելով, որ Թրամփի հետ կլիմայի փոփոխությունների և Իրանի հարցերի հետ կապված կան տարաձայնություններ:

Իր հերթին, Միացյալ Նահանգների նախագահ Թրամփը շնորհակալություն է հայտնել ջերմ ընդունելության համար: Թրամփը հայտարարել է, որ Մեծ Բրիտանիայի հետ «ֆենոմենալ» առևտրային պայմանագիր կնքելու և առևտրի ծավալները մի քանի անգամ մեծացնելու մեծ պոտենցիալ կա:

Ի դեպ, նախագահ Թրամփի այցը դուր չի եկել շատ բրիտանացիների: Երկրի տարբեր քաղաքներում բողոքի ակցիաներ են իրականացվում ընդդեմ նրա այցի: Հազարավոր մարդիկ Լոնդոնի մի շարք կենտրոնական թաղամասերում արդեն տեղադրել են պաստառներ՝ «Դիմադրել Թրամփին», «Մերժել ռասիզմը», «Մերժել դաժանությունը», «Մերժել ատելությունը» կարգախոսներով: Ակցիայի մասնակիցներին զայրացրել է այն հանգամանքը, որ ԱՄՆ նախագահին Բուքինգեմյան պալատում ընդունել են պետական պատիվներով և հանդիսավոր ճաշով: Բացի այդ, ակցիայի մասնակիցները Թրամփին մեղադրում են Միացյալ Թագավորության ներքին գործերին միջամտելու մեջ: Ավելի վաղ ԱՄՆ նախագահը հայտնել էր, որ Մեծ Բրիտանիան կարող է առանց համաձայնության դուրս գալ ԵՄ-ի կազմից:

Ակցիայի մասնակիցները, ի նշան բողոքի, այս տարի նույնպես օդ են բարձրացրել Թրամփի՝ մանկական տեսքով հսկայական փուչիկը:

Հավելենք, որ բողոքի ակցիաները այդքան էլ խաղաղ չեն անցել: Բախումներ են տեղի ունեցել Թրամփի աջակիցների և հակաթրամփականների միջև: