Շիրակի մարզում դպրոցների տնօրենների հավաստագրման քննությանը կմասնակցի 17 հավակնորդ

Կրթության և գիտության նախարարությունը դպրոցների տնօրենների հավակնորդների համար վերապատրաստման դասընթացներ է սկսել: Դրանք վերաբերում են նրանց, ովքեր պատրաստվում են հավաստագրման քննությունների մասնակցել: Հավաստագիրը պարտադիր է տնօրենի մրցույթին մասնակցելու համար: Շիրակի մարզում վերապատրաստմանը մասնակցում են 17 անձինք, այդ թվում՝ գործող տնօրեններ: Իսկ տնօրենի թափուր պաշտոններ կան մարզի մի շարք դպրոցներում: Պաշտոնավարման ժամկետն ավարտված կամ 65 տարին լրացած, ենթադրյալ չարաշահումների պատճառով աշխատանքից հեռացած տնօրենների փոխարեն առաջիկա ամիսներին նորերն են ընտրվելու:

Հունիսը քննական է ոչ միայն շրջանավարտների, այլև նրանց որոշ ուսուցիչների ու դպրոցների տնօրենների համար: Ու եթե շրջանավարտները քննությունը լավ հանձնելու համար կրկնուսույցի մոտ են պարապում, ապա մանկավարժներն ու տնօրենները՝ Կրթության ազգային ինստիտուտում: Տնօրենների հավակնորդներին վերապատրաստում են հավաստագիր ստանալու քննություն հանձնելու համար:

Մինչև անցած տարի գործող տնօրենները մեկ անգամ էին հավաստագրի համար քննություն հանձնում, հաջորդ տարիներին արդեն մեխանիկորեն երկարացվում էր դրա ժամկետը: Հիմա գործողներն այս արտոնությունը չունեն: Սա տնօրենների հավաստագրման կարգի առայժմ միակ, բայց ոչ վերջին փոփոխությունն է: Կրթության ու գիտության նախարարությունը նախատեսում է նաև քննական հարցաշարերի փոփոխություն: Հիմա հավաստագիր ստանալու համար հավակնորդները պետք է 543 հարցի պատասխանեն:

«Որպեսզի հավասար պայմաններ ստեղծվեն հների և նորեկների միջև, օրենքը հավասարեցվել է: Ե՛վ գործող տնօրենները, և՛ հավակնորդները նույն փուլերով են անցնում՝ գրավոր և բանավոր: 5 տարին մեկ պարտավոր է գործող տնօրենը նորից գնալ քննություն հանձնել, և եթե չանցավ քննությունը, կզրկվի հավաստագրից և տնօրեն աշխատելուց: Իսկ հարցաշարը ստուգման միջոց է, բայց արդարացի միջոց չէ, կարելի է լավագույն միջոցը գտնել, որ համարժեքաբար հանդես բերի և՛ հիշողությունը, և՛ գիտելիք, և՛ փորձ, և՛ հմտություն, իսկ այստեղ ավելի շատ հիշողության վրա հիմնված հարցեր են»,- Shantnews-ին ասել է կրթության ազգային ինստիտուտի Շիրակի մասնաճյուղի տնօրեն Մեսրոպ Ղալաչյանը:

Կրթության ու գիտության նախարարության բարեփոխումների նախագիծը քննարկման փուլում է: Այն նախատեսում է նաև տնօրենների հավաստագրման կարգի փոփոխություն՝ հեշտացում: Հավաստագրման քննությունները մեկնարկելու են հունիսի 20-ից հետո: Այն չհաղթահարած հավակնորդներին ևս մեկ հնարավորություն կտրվի, բայց արդեն հաջորդ տարի: Կառավարության որոշմամբ`հավաստագրման համար քննություններն անցկացվում են տարին մեկ անգամ: