Ջրառատի Սուրբ Մինաս վերակառուցվող եկեղեցում խաչի օրհնություն է կատարվել

Շիրակի մարզի Ջրառատ գյուղի 6-7-րդ դարերի թվագրվող եկեղեցին 3-րդ տարին է՝ վերակառուցվում է։ Եկեղեցուց ընդամենը 3 պատ էր պահպանվել։

Պատմաճարտարապետական կառույցը վերականգնվում է նախկին տեսքով։ Ջրառատ գյուղը հիմնադրվել է 1800-ականներին, երբ այս տարածք են եկել Մուշից գաղթած հայերը։ Այդ ժամանակ գյուղում կիսավեր եկեղեցի են գտել, այն վերակառուցել են որպես փոքրիկ բազիլիկ եկեղեցի՝ փայտյա տանիքով։

Իրականում հին եկեղեցու ավերակներն այն ապացույցն են եղել, որ 1800-ականներից շատ ավելի վաղ է այս տարածքը բնակավայր եղել։ Իսկ  եկեղեցու հարակից տարածքում գտնվող գերեզմանատունն ընդամնեը 300 տարվա պատմություն ունի։ Այստեղ ամենատեսանելի վայրում ու եկեղեցուն ամենամոտը փահլևանի գերեզմանն է։ Այն եկեղեցու վերակառուցման ընթացքում դարձել է գյուղապետարանի և Մշակույթի նախարարության անհամաձայնությունների պատճառ։

Գերեզմանի տարածքում, ըստ վերակառուցման նախագծի, նախատեսված է ավանդատուն կառուցել, բայց գերեզմանը պատմամշակութային հուշարձան է համարվում և Մշակույթի նախարարությունը չի թույլատրել այն տեղափոխել։ Արդյունքում՝ կողմերը համաձայնության են եկել ու փոխել են ավանդատան կառուցման նախագիծը։

«Մենք ուզում էինք 10 մետր վերև տեղափոխել փահլևանի գերեզմանը: Գյուղացիներից տեղեկացանք, որ փահլևանը տարիներ առաջ վերահուղարկավորվել է: Նույն կերպ ուզում էինք դեպի վերև տեղափոխել  ու հուղարկավորել, որ կարողանայինք եկեղեցուն կից ավանդատուն կառուցել, բայց  ճարտարապետի հետ որոշեցինք, որ ավանդատունը կկառուցենք ավելի փոքրիկ: Փահլևանի գերեզմանը կմնա տեղում»,-SHANTNEWS.am-ին ասել է Տեր Կորյուն քահանա Մաթևոսյանը:

Վերակառուցվող եկեղեցում արդեն Քրիստոսի ներկայությունն առկա է։ Այսպես են հոգևորականները բացատրում նոր խաչի օծման և տեղադրման արարողությունը։ Ջրառատի եկեղեցու խաչը ձուլվել է Սպիտակ քաղաքում։ Եկեղեցին վերակառուցվում է նախկին տեսքով, բայց խաչը նոր է։

«Այս եկեղեցին վերակառուցվում է իր ողջ շքեղությամբ: Կարող էր վերակառուցվել ինչպես 19-րդ  դարում, երբ 3 հատ պատ էին ավելացրել, փայտյա տանիք դրել վրան և օգտագործել էին իբրև եկեղեցի: Բայց դա 7-րդ դարի տեսք չէր, 7-րդ դարի եկեղեցու շքեղություն չէր, իսկ հիմա 7-րդ դարի շքեղությամբ է, գմբեթով, խաչը դրվել է, որն օրհնելու է այս ամբողջ տարածաշրջանը»,- ասել է Շիրակի թեմի առաջնորդ Միքայել արքեպիսկոպոս Աջապահյանը:

Եկեղեցու վերակառուցումը, ըստ շինարարների, կավարտվի 1 տարի հետո։ Եկեղեցու ներքին հարդարման ու տարածքի բարեկարգման աշխատանքներն առայժմ անավարտ են։