Հայ երկրորդ ֆուտբոլիստը Բունդեսլիգայում և «Հոֆենհայմի» անհավանական վերելքը

Սարգիս Ադամյանը դարձավ երկրորդ հայ ֆուտբոլիստը, որը հանդես կգա Բունդեսլիգայում` Գերմանիայի  բարձրագույն ֆուտբոլային մրցաշարում: Հիշեցնենք, որ մինչ այս Դորտմունդի Բորուսիայում խաղացել է Հենրիխ Մխիթարյանը, իսկ  Սարգիս Ադամյանը երեկ պայմանագիր է կնքել «Հոֆենհայմ» ակումբի հետ:

Բունդեսլիգայում առայժմ 8-րդ տեղը զբաղեցնող ակումբի հետ Ադամյանը պայմանագիր է ստորագրել 3 տարով:
Սարգիս Ադամյանը ծնվել է Հայաստանում 1993 թվականին:  Նա չորս տարեկան էր, երբ ընտանիքը տեղափոխվեց Ռուսաստան: Սարգիսը 16 տարի Հայաստանում չէր եղել:  Եկավ 2013-ին, երբ հրավիրվեց հավաքական: Առաջին պաշտոնական խաղն էլ հավաքականի կազմում տեղի ունեցավ 2013 թվականի սեպտեմբերի 10-ին: Աշխարհի առաջնության ընտրական փուլում Հայաստանի հավաքականն այդ օրը մրցում էր դանիացիների հետ։

Առաջին թիմը, որի կազմում սկսեց հանդես գալ Ադամյանը գերմանական Ռոստոկ քաղաքի Գանզա ակումբն էր: Ապա Ադամյանը տեղափոխվեց  «Շտայնբախ», որը  ներկայացնում էր  4-րդ Բունդեսլիգան,  իսկ երկու տարի անց արդեն 2-րդ Բունդեսլիգա` «Յան Ռեգենսբուրգ» ակումբ: Այստեղ էլ Ադամյանը մնաց երկու տարի, աչքի ընկավ արդյունավետ խաղով: Անցած 32 խաղերում Ադամյանը դարձել է 15 գոլի հեղինակ, կատարել է 11 գոլային փոխանցում: Սա շատ բարձր ցուցանիշ է և նշանակում է, որ հայ ֆուտբոլիստը աչքի է ընկել յուրաքանչյուր 5  խաղից  4-ում: Իսկ մի անգամ Ադամյանը դարձել է հեթ տրիկի հեղինակ: Մրցակցի դաշտում Ադամյանը երեք գնդակ էր ուղարկել «Համբուրգի» դարպասը: Այս ամենը, իհարկե, չէր կարող աննկատ մնալ:«Հոֆենհայմի» սպորտային տնօրեն Ալեքսանդր Ռոսենը  հարցազրույցներից մեկում պատմել է, թե ինչպես է Հայաստանի հավաքականի ֆուտբոլիստը գրավել իրենց ուշադրությունը:

«Սարգիս Ադամյանին նկատեցինք իր արտառոց արագության և արտակարգ արդյունավետության շնորհիվ: Նա հիանալի ֆուտբոլիստ է, որը համապատասխանում է նախաձեռնող ֆուտբոլի մեր փիլիսոփայությանը ու կարծում եմ, որ նա հաջորդ մրցաշրջանին իսկական անակնկալ կդառնա»,- ասել է «Հոֆենհայմի» սպորտային տնօրեն Ալեքսանդր Ռոսենը: 

Սարգիս Ադամյանը «Հոֆենհայմ» տեղափոխվելուց հետո իր առաջին հարցազրույցում ասել է, որ  «Հոֆենհայմի» ներկայացուցիչները վաղուց էին հետևում նրա խաղին և դեռ 2 ամիս առաջ էին կապվել նրա հետ, բայց քանի որ մրցաշրջանի ավարտին դեռ շատ կար, տեղափոխությունն այն ժամանակ անհնար էր:

  «Շատ հպարտ եմ, հատկապես, երբ հիշում եմ անցած ճանապարհս: Դեռ երկու տարի առաջ խաղում էի գերմանական 4-րդ Բունդեսլիգայում, բայց երկու շատ լավ տարի անցկացրի «Յան Ռեգենսբուրգում» և հիմա այստեղ եմ: Թիմը միշտ հարձակողական ոճի ֆուտբոլ է խաղում, ինչը շատ հոգեհարազատ է ինձ, քանի որ «Յան Ռեգենսբուրգը» ևս այդպիսի ֆուտբոլ է  դավանում:  Պետք է ամեն ինչ անեմ՝  իմ նոր ակումբում նորանոր հաջողությունների հասնելու և իմ խաղով հայ երկրպագուներին ուրախացնելու համար»,- ասել է Ադամյանը ՀՖՖ-ին տված հարցազրույցում:

Առաջիններից մեկը, ով շնորհավորել է Սարգիս Ադամյանին Հենրիխ Մխիթարյանն է, ով հիշեցնենք. մինչև Պրեմիեր լիգա տեղափոխվելը, հանդես գալով Դորտմունդի «Բորուսսիա»-ի  կազմում, հասցրել էր ճանաչվել Բունդեսլիգայի լավագույն ֆուտբոլիստ:   

«Մխիթարյանն ասաց,  որ շատ կարևոր քայլ եմ կատարել և արդեն մեծ բանի եմ հասել, բայց խորհուրդ տվեց չթուլացնել տեմպերը և շարունակել աշխատել նույն ոգով: Հենրիխն այն ֆուտբոլիստն է, ում խորհուրդները միշտ պետք է  հաշվի առնել, նա գիտի հաջողության բանաձևը»,- նշել է Սարգիս Ադամյանը:

Սարգիս Ադամյանի պայմանագիրը գերմանական թիմի հետ նախատեսված է մինչև 2022 թվականի հունիսը: Ըստ որոշ հրապարակումների՝  «Յան Ռեգենսբուրգը» Ադամյանի տրանսֆերից ստացել է մոտ 1.5 մլն եվրո:

Այժմ կարճ անդրադաձ «Հոֆենհայմ» ակումբին:  Ի դեպ, Հոֆենհայմը փոքր գյուղատիպ ավան է, որի բնակչությունը ընդամենը 3000 է: Իսկ ակումբը հիմնադրվել է 120 տարի առաջ, 1899 թվականին, ու եթե հաշվի չառնենք վերջին երկու տասնամյակը, ապա անչափ համեստ պատմություն ունի։ Ակումբը 90-ականների սկզբին սիրողականի կարգավիճակ ուներ և ելույթ էր ունենում 8-րդ Բունդեսլիգայում: Նրա առավելագույն արդյունքը եղել էր 5-րդ Բունդեսլիգա հասնելը:

Ամեն ինչ գլխիվայր շրջվեց 2000-ականներին, երբ ակումբն իր վերահսկողության տակ առավ մի մեծահարուստ: Հիմա «Հոֆենհայմ»-ը  Բունդեսլիգայի ուժեղագույն թիմերից մեկն է, անցած մրցաշրջանի բրոնզե մեդալակիրն է, ինչի շնորհիվ էլ հնարավորություն է ունեցել հանդես գալ Չեմպիոնների լիգայում:

Ընթացիկ  մրցաշրջանի ավարտից մեկ տուր առաջ «Հոֆենհայմը» 8-րդն է մրցաշարային աղյուսակում և Եվրոպա լիգայի գոտուց նրան  բաժանում է մեկ միավոր:  Եթե վերջին  տուրում 7-րդ հորիզոնականում գտնվող «Վոլֆսբուրգը» պարտվի կամ ոչ-ոքի խաղա, իսկ  «Հոֆենհայմ»-ը հաղթի, ապա այս թիմին նոր հայազգի հարձակվողի հետ կտեսնենք նաև Եվրոպա լիգայում: