«Շիրակ» գերեզմանատնից դուրս հուղարկավորություններ` գյուղի վարելահողերի հաշվին

«Շիրակ» գերեզմանատանն ապօրինի հուղարկավորություններ են կատարվում։ Այս հարցը բարձրաձայնում է Մարմաշեն խոշորացված համայնքի ղեկավարը։ Քաղաքապատկան համարվող գերեզմանատան տարածքն ընդլայնվել է գյուղերի վարչական հողերի հաշվին, բայց առանց փաստաթղթային հիմնավորումների:

Ինչպես Գյումրիի առաջին և 2-րդ գերեզմանատներում է, «Շիրակում» էլ բոլոր անցուղիները փակվել են, նաև գերեզմանատան պարսպից դուրս են թաղումներ կատարվում: Շիրակ, Լեռնուտ, Ջաջուռ գյուղերի հողերը ապօրինի զավթելու համար խոշորացված Մարմաշեն համայնքի ղեկավարը Գյումրիի քաղաքապետարանի դեմ հայց է ներկայացրել դատարան:

Շիրակ գյուղի բնակիչ Արամայիս Հարությունյանի վարձակալած 16 հա հողատարածքը «Շիրակ» գերեզմանատան հարևանությամբ է, արդեն քանի տարի է` չի կարողանում հողը մշակել: Իր հողի հաշվին նոր գերեզմանատեղիներ են հատկացվել: Արամայիս Հարությունյանի խոսքերով` պարսպից դուրս 4 մ ճանապարհ է հատկացրած գերեզմանատանը, իսկ մնացած մասն արդեն հողատիրոջ վարձակալած տարածքն է:

Բայց այդ ճանապարհն արդեն չկա, տեղում հուղարկավորություններ են կատարվել, իսկ որպես ճանապարհ օգտագործվում է Արամայիս Հարությունյանի հողատարածքը:

2011 թվականից 25 տարով հողը վարձակալել է, բայց չի էլ հասցրել վարուցանք անել: Հողատարածքի մոտ 2 հա-ն 2013 թվականից գերեզմանատարածքի է վերածվել, իր հողի հաշվին էլ մարդիկ ավտոճանապարհ են բացել: Մնացած հողն էլ գյուղատնտեսական նպատակներով օգտագործելն անհնար է, գերեզմանատերերն ու Գյումրիի քաղաքապետարանի աշխատակիցները թույլ չեն տալիս:

Ըստ հողատիրոջ` ինքը 800 մ ջրատար է փորել, բայց արդեն որերորդ անգամ այն գերեզմանատերերն ու քաղաքապետարանի աշխատողները խճով են լցնում, իրենց համար ճանապարհ դարձնում: Շիրակ գյուղի վարչական ղեկավար Համլետ Ասատրյանի խոսքերով, ամեն տարի 4-5 մ պարսպից առաջ են գալիս գերեզմանները, ու ամեն անգամ նոր ճանապարհ են բացում ավտոմեքենաների համար առանց տարածքի վարձակալին և գյուղապետարանին տեղյակ պահելու:

Հողատերը ստիպված վարելահողը թողել է որպես արոտավայր, վնասի դիմաց քանի տարի է, ինչ փոխհատուցում է պահանջում:

Երեք տարի առաջ մարզի դատախազություն ու ոստիկանություն էր դիմել, բայց մերժել էին քրեական գործ հարուցել՝ պատճառաբանությամբ, թե հանցակազմ չկա: Մարմաշեն խոշորացված համայնքի ղեկավար Կարեն Արշակյանի խոսքերով` դեպի Լեռնուտ գնացող ճանապարհահատվածից են հողեր զավթվել ու հուղարկավորությունների պատճառով փակվել են գյուղի հանդամիջյան ճանապարհները: Հիմա համայնքապետարանը հանդ տանող նոր ճանապարհ է բացել:

Ապօրինի զբաղեցրած Շիրակ, Լեռնուտ և Ջաջուռ գյուղերի վարչական հողերը Շիրակ գերեզմանատան շարունակությունն են: Մարմաշենի համայնքապետարան մեկ անգամ չէ, որ դիմել է Գյումրիի քաղաքապետարանին և «Հավերժ հիշատակ» ընկերությանը, որ գոնե փաստաթղթերով օրինականացնեն և Մարմաշեն համայնքի բյուջե մուտքագրեն հողերի դիմաց գումարները: Բայց այդպես էլ գործին ընթացք չեն տվել:

Մարմաշենի համայնքապետարանը արգելել է թաղումներ կատարել զավթված տարածքներում, բայց թաղումները շարունակվում են, ավելին, տրակտորով նոր տարածքներ են փորվել: Մարմաշենի համայնքապետարանը վարչական վարույթ է հարուցել «Հավերժ հիշատակ» ընկերության դեմ` ընկերության ղեկավարին 100.000 դրամ վարչական տույժի ենթարկելու պահանջով:

«Հավերժ հիշատակ» ընկերության տնօրենի ժամանակավոր պաշտոնակատար Արտյոմ Դավթյանը պարզաբանումներից հրաժարվեց` ասելով, թե գործը դատարանում է, ասելու բան չունի:

Նույն վերաբերմունքը ցույց տվեց նաև Գյումրիի քաղաքապետարանը: Մարմաշենի համայնքապետարանը երկրորդ անգամ է պատրաստվում քաղաքապետարանին վարչական տույժի ենթարկել, այս անգամ մտադիր է տուգանել 2,5 մլն դրամով: