Աղջիկները վախեցած են, ճնշված. Գոհար Հարությունյանը՝ գեղեցկության մրցույթների և քննադատությունների մասին

Ամեն անգամ, երբ Հայաստանում անցկացվում է գեղեցկության մրցույթ, հաղթողին հայտարարելուց հետո սկսվում են բուռն քննարկումներ: Հասարակությունը դժգոհ է մնում գեղեցկության մրցույթի արդյունքներից և քննադատությունների տեղատարափ է սկսվում հաղթողի, կազմակերպիչների, թագի դիզայնի, զգեստների ոճի, լողազգեստների ցուցադրության և այլնի վերաբերյալ:

Օրեր առաջ կազմակերպված «Ազգային գեղեցկության մրցույթն» էլ բացառություն չէր ու հաղթողը կրկին ոչ բոլորի սրտով էր:

Գեղեցկության մրցույթների, դրանց կազմակերպման, քննադատությունների ու ընձեռած հնարավորությունների մասին SHANTNEWS.am-ը զրույցել է «Միսս Արմենիա» հիմնադրամի ղեկավար Գոհար Հարությունյանի հետ, որը մրցույթից հետո իր ֆեյսբուքյան էջում գրել էր, թե կապ չունի այդ մրցույթի հետ: Միաժամանակ, նա տեղեկացրել էր, որ «Միսս տիեզերք Արմենիա» և «Միսս աշխարհ Արմենիա» մրցույթների լիցենզիաների համար վճարումները կատարված են, և ազգային մրցույթները կկայանան հուլիսի 1-15-ը։

– Կազմակերպչական առումով ի՞նչ թերություններ նկատեցիք գեղեցկության մրցույթի ընթացքում: 

– Ուղիղ եթերով է հեռարձակվել, և ուղիղ եթերն արդեն իսկ վտանգավոր է: Ամեն ինչ բյուջեի հետ է կապված. որքան շատ ծախսեն,  այնքան ավելի ճոխ կլինի: Մեր իրականության մեջ ինչքան վատաբանում են այս մրցույթները, այնքան ավելի դժվար է դառնում լավ բան կազմակերպելն ու լավ մասնակից ունենալը: Ես չեմ ուզում իրենց մրցույթը ո´չ գովաբանել, ո´չ էլ քննադատել, բայց բոլոր մրցույթներն էլ կազմակերպչական առումով ունենում են թերություններ:

– Հայաստանում տարբեր տեսակի գեղեցկության մրցույթներ կան, մարդիկ կարծես շփոթության մեջ են ընկնում, չեն կողմնորոշվում` այդ մրցույթներից ո՞րն ինչ արժեք ու նշանակություն ունի հաղթողի ու հասարակության համար: 

– Այո´, մարդիկ հաճախ մոլորության մեջ են ընկնում: Ես ներկայացնեմ, թե ինչ ենք անում մենք: Մենք կազմակերպում ենք մրցույթ ամենահեղինակավոր երկու «Միսս աշխարհ» և «Միսս տիեզերք» մրցույթներին մասնակից ապահովելու համար: Դրանք ամենաիրական մրցույթներն են, որոնք երկրին ապահովում են տուրիզմի զարգացում, ճանաչողություն, մշակութային հնարավորություններ: Այդ երկու մրցույթներն ամենակարևորներն են, որ երկրները պայքարում են մասնակցության համար: Նշեմ նաև, որ Հայաստանում և առհասարակ ցանկացած այլ երկրում կան ազգային բազմաթիվ մրցույթներ, որոնք կազմակերպվում են զուտ երկրի ներսում, բայց մեր կազմակերպած մրցույթը հեռանկարային առումով առավելություններ ունի:

– Ինչո՞ւ է հասարակությունը բուռն արձագանքում նման մրցույթներին, ո՞րն է պատճառը:

– Պետք է հասարակությունը օգնի, որ այս մրցույթները կայանան և երկիրը հավուր պատշաճի արտերկրում ներկայացնեն: Եթե անընդհատ քննադատում են՝ քիթը երկար է, ոտքը` կարճ, աղջիկները կաշկանդվում են, չեն դիմում ու ինքնաբերաբար ունենում ես քիչ մասնակից և ավելի վատ ընտրություն: Ինչքան հասարակությունն ու մամուլն օգնեն, այնքան ավելի լավ մակարդակի կարելի է այս ամենը բարձրացնել: Բայց կարծես ցանկություն չկա, քանի որ անցած տարվա իմ աղջիկները կատարյալ էին, այսինքն` այն ամենը, ինչ հասարակությունը պահանջում էր, որ լինի՝ բնական գեղեցկություն, անգլերենի իմացություն, ինտելեկտ և այլն, այդ աղջիկներն ունեին, սակայն հասարակության  համար անհետաքրքիր էին: Պարտադիր ուզում են վատի մասին խոսել, սակայն այդ վերաբերմունքը չի զարգացնելու այս ոլորտը:

Աղջիկները վախեցած են, ճնշված: Բոլորն ունեն թերություններ, անթերի մարդ չկա: Ես  դրա համար ասում եմ, որ պետք է մի քիչ հանդուրժող ու զուսպ լինել և քաջալերել, ինչպես ուրիշ երկրներում են անում:

– Մարդիկ քննադատում են, քանի որ չեն տեսնում բնական գեղեցկություն: Նշում են, որ սիլիկոնապատ գեղեցկուհի չի լինում և ընտրվելով գեղեցկուհի` նրանք չեն կարող լավ օրինակ ծառայել մյուսների համար: Կա՞ն արդյո՞ք մրցույթի մասնակիցներին ընտրելու չափանիշներ:

– Մեր բոլոր չափանիշները թելադրվում են այն մեծ մրցույթների կողմից, որին մեր հաղթողը պետք է մասնակցի: Ինձ ասում են պարտադիր տարիք, նշում են, որ պետք է լինեն չամուսնացած, բարեգործական նախագծերի պետք է մասնակցի: Այդ ամենին մենք հետևում ենք: Մեզ ոչ ոք չի ասում, որ չպետք է վիրահատված լինի: Ասեմ ավելին, ինչպե՞ս կարող էր անցած տարի Իսպանիան ներկայացնել տրանսգենդերը, որը սեռը փոխել է, բայց ոչ ոք իրավունք չունի նրան արգելել մրցույթին մասնակցել: Եթե սեռափոխված տրանսգենդերը կարող է մասնակցել, ապա քթի ինչ վիրահատության մասին է խոսքը: Այլ երկրների շատ գեղեցկուհիներ ունեն քթի վիրահատություն, բայց ոչ ոք ուշադրություն չի դարձնում այդ փաստին: Կարևոր է, թե հաղթողը ինչպես է կարողանում խոսել բարեգործական թեմաների մասին, մարդկանց մեկ նպատակի շուրջ համախմբել ու բարի գործեր անել:

– Ի՞նչ քայլեր պետք է ձեռնարկել հասարակության նման վերաբերմունքը մեղմելու ուղղությամբ:

– Մենք այս տարի տեսանյութերով, սոցիալական հոլովակներով բարձրաձայնելու ենք այդ խնդիրների, հասարակության վերաբերմունքի մասին: Մենք ունենալու ենք մասնակից, որն ազատ խոսելու է իր վիրահատության մասին և մեկնաբանելու է, թե ինչ է տվել իրեն այդ վիրահատությունը: Մենք ուզում ենք պարզ լինել բոլորի հետ ու նաև չենք ուզում մեր մրցույթի միջոցով քարոզել պլաստիկ վիրահատությունները: