Current Time-ը՝ Ալիևների մասնակցությամբ կոռուպցիոն սկանդալի մասին

Настоящее время-ն (Current Time) ռեպորտաժ է պատրաստել Ալիևների ընտանիքի 
մասնակցությամբ կոռուպցիոն սկանդալի մասին: Ադրբեջանցի հետաքննող լրագրող Խադիջա Իսմաիլովան խոսել է Ալիևների ընտանիքի մասնակցությամբ աղմկահարույց կոռուպցիոն սկանդալի մասին: 

Ստորև ներկայացնենք հատվածներ հարցազրույցից.

«2008 թվականից սկսած`օտարերկրյա ներդրումների մեծ հոսքի շնորհիվ Ադրբեջան է մտել շուրջ 130 մլրդ դոլար, սակայն անհասկանալի է, թե ուր են գնացել այդ գումարները»,- ասում է հետաքննող լրագրող Խադիջա Իսմայիլովան:

«Ազատություն» ռադիոկայանի ադրբեջանական ծառայության նախկին թղթակիցը թերևս Ադրբեջանի միակ հետաքննող լրագրողն է, ում հաջողվել էր բացահայտել Ալիևների ընտանիքի մասնակցությամբ պետական մասշտաբի աղմկահարույց կոռուպցիոն պատմության մանրամասները:

«Այնպես է ստացվում, որ նավթային բումն այս երկրում սկսվեց ու ավարտվեց, բայց երկրում դրանից մեզ մոտ ոչինչ չփոխվեց»,- ասում է Իսմաիլովան:

Ադրբեջանական իշխանությունները ի սկզբանե ոչ մի կերպ չէին արձագանքել Խադիջայի հոդվածներում ներկայացված փաստերին, սակայն 2015 թվականի աշնանը հարկերից խուսափելու, անօրինական ձեռնարկատիրական գործունեություն ծավալելու և պաշտոնի չարաշահման մեղադրանքներով ձերբակալված Խադիջան դատապարտվեց  7,5 տարվա ազատազրկման:

Այս քաղաքական շարժառիթներով պայմանավորված դատավճռի դեմ մարդու իրավունքների բազմաթիվ միջազգային կազմակերպությունների և ակտիվիստների կոշտ քննադատությունների ու ճնշման արդյունքում Խադիջան, 2016 թվականին 6 ամիս անազատության մեջ գտնվելուց հետո, վաղաժամակետ ազատվեց կալանավայրից:

«Ես հետաքննել եմ Ալիևների ընտանիքին պատկանող բիզնես ընկերությունների գործունեության մանրամասները և կարող եմ ասել, որ բոլոր այդ ընկերությունները ունեն մեկ ընդհանրություն, այն է, որ դրանք բոլորը շատ վատ են ղեկավարվում … Ադրբեջանում դեռևս այնպիսի գործ չի եղել, որը մենք բացահայտենք և հետո Գլխավոր դատախազությունը ստուգի մեր ներկայացրած փաստերը: Նման դեպք չի եղել:

Մենք բացահայտել ենք, որ բրիտանական ընկերությունների հետ կապ ունեցող օֆշորային ընկերությունները նույնպես պատկանում են Ալիևների աղջիկներին: Երբ այս պատմությունը ջրի երես դուրս եկավ, բացասաբար անդրադառնալով նշված ընկերություններից եկամուտի և հեղինակության վրա, Ալիևները որոշեցին վաճառել այդ ընկերությունները: Իսկ ու՞մ վաճառեցին դրանք նորից՝ կառավարությանը:

Եվ ստացվում է, որ մենք՝ քաղաքացիներս, կրկին ստիպված եղանք վճարել դրա համար … Ընտանիքը այստեղ աշխատում է, բայց նրանք այնպիսի համակարգ են ստեղծել, որ ոչ ոք այս երկրում, ոչ ոք, իրենցից բացի չկարողանա մեծ գումարներ աշխատել: Եվ ոչ միայն մեծ գումարներ, այլ առհասարակ, որևէ գումար աշխատել: Դա նման է նարդի խաղին, երբ փակելով ու զբաղեցնելով բոլոր դիրքերը՝ այլևս տեղաշարժվելու ոչ մի հնարավորություն չես թողնում:

Որովհետև, այն պահից սկսած, երբ մարդիկ սկսեն ազատ տեղաշարժվել, այսինքն` սնվելու և ապրուստի համար բավականաչափ գումար վաստակել և բարեկեցիկ կյանքով ապրել, նրանք սկսելու են այլ հարցեր բարձրացնել: Հենց սա չի ցանկանում մեր իշխանությունը»,- Настоящее время-ի թղթակցին պատմել է Խադիջա Իսմայիլովան:

The Guardian բրիտանական պարբերականի հրապարակած վերջին հետաքննությունը, որին մասնակցել էր նաև Խադիջան, բացահայտել էր Ադրբեջանի կառավարությանը պատկանող բանկային գաղտնի հաշվեհամարը, որի 3 մլրդ դոլարն օգտագործվել է եվրոպացի բարձրաստիճան քաղաքական գործիչներին կաշառելու նպատակով:

Ադրբեջանի իշխանություններին ներկայացված մեղադրանքների առնչությամբ Ալիևի խորհրդական Ալի Հասանովը The Guardian-ի հրապարակումը «թունավոր» էր որակել՝ ավելացնելով, որ հետաքննության պատվիրատուներն են բրիտանական գաղտնի ծառայությունները, հայկական Սփյուռքն ու ԱՄՆ-ը: