Մաշկի քաղցկեղի դեմ պայքար` իրազեկվածության բարձրացմամբ․ անվճար բուժզննում՝ Գյումրիում

1999 թվականից աշխարհի մի շարք երկրներում մայիսը հայտարարվում է մելանոմայի դեմ պայքարի ամիս: Մելանոման մաշկի խալերից առաջացող բավականին լուրջ հիվանդություններն են, որոնք, ի վերջո, հանգեցնում են չարորակ նորագոյացությունների։

«Եվրոմելանոմա» կազմակերպությունն ամեն տարի, արշավ է անցկացնում հանրապետության մարզերում, բնակչությանն ու բժիշկներին իրազեկում է խալերից առաջացող հիվանդությունների վտանգավորության մասին։ Ճառագայթաբան, ուռուցքաբան, բժշկական գիտությունների դոկտոր, պրոֆեսոր Անդրեաս Համբարձումյանի գլխավորությամբ «Էնդովիժըն» կենտրոնի մասնագետները 1 օրյա խորհրդատվություն, հիվանդների զննություն են անցկացրել Գյումրիի «Բեռլին» պոլիկլինիկայում:

Երևանի բժիշկ մասնագետների հետ Գյումրիում հետազոտություններ էր անցկացնում Գերմանիայից ժամանած հայ մաշկաբան-ուռուցքաբան Միքայել Համբարձումյանը: 50 հիվանդ էր հերթագրվել, իսկ զննությունների ընթացքում հայտնաբերվեցին հիվանդության բարդացած դեպքեր: Մելանոման՝ մաշկի ուռուցքը, ըստ մասնագետների, ավելի հեշտ է ախտորոշել, քան ներքին օրգանների նորագոյացությունները։

Բժշկական գիտությունների դոկտոր, պրոֆեսոր Անդրեաս Համբարձումյանը, որը 200-ից ավելի գիտական աշխատանքների հեղինակ է, հակաքաղցկեղային պայքար է տարել ներքին օրգանների մի շարք հիվանդությունների ուղղությամբ, փաստում է, որ մելանոման կարելի է ախտորոշել վաղ շրջանում, առավել ևս, որ այն տեսանելի է, բայց, ցավոք, բնակիչների մեծ մասը ուշացած է դիմում բժշկի, երբ արդեն բժիշկները ստիպված են լինում ռադիոլագիական մեթոդներով հայտնաբերել այն։

Մաշկաբան-ուռուցքաբաններն նշում են, որ մարդու մոտ մինչև 55 տարեկանը կարող են նոր խալեր առաջանալ, կյանքի ընթացքում դրանք կարող են խորանալ մաշկի տակ։

«Մաշկի ուռուցքների դեմ պայքարն սկսվում է քեզանից»․ այս կարգախոսն ունի Եվրամելանոմայի այս տարվա արշավը, որը մարդկանց ուշադրությունն է սևեռում խալերի փոփոխությունների վրա։ Մաշկաբան-ուռուցքաբան Անժելա Հայրապետյանի խոսքերով՝ բնակչության մոտ այն կարծրատիպն է, որ խալերը հեռացնել չի կարելի, ինչը սխալ է։ Կան խալեր, որոնք հեռացնելը նույնիսկ անհրաժեշտ է, քանի որ դրանք իրենց մեջ պարունակում են պոտենցյալ ձևափոխվող չարորակություններ։

Բժիշկները խորհուրդ են տալիս 3 ամիսը մեկ ինքնազննել խալերը ու փոփոխություն նկատելիս ահազանգել։ Բժիշկները մելանոմայի առաջացման մի քանի պատճառ են բերում, դրանցից գլխավորը արևայրուքի չարաշահումն է, հղիության ընթացքում պիգմենտների անտեսումը, նաև խալերի վնասումները։

Ըստ Անդրեաս Համբարձումյանի՝ խալերի ախտորոշման նորագույն սարքավորումները նոր են մուտք գործում Հայաստան, բայց կարևորն այն է, որ դրանք թույլ են տալիս ուռուցքները հայտնաբերել ժամանակին։ Մաշկի քաղցկեղի վաղ հայտնաբերման գործում մասնագետները կարևորում են առաջնային բուժօգնության օղակների դերը։ Բայց ոչ բոլոր պոլիկլինիկաներն ունեն մաշկաբաններ։ Հիվանդներին հիմնականում ուղեգրում են մասնագիտացված մաշկային բուժհաստատություններ։

Բուժզննումից և ախտորոշումից բացի, մաշկաբանները նաև դասախոսություն անցկացրին Գյումրու բուժաշխատողների հետ՝ նրանց ներկայացնելով բժշկության ժամանակակից այն մեթոդները, որոնք կիրառվում են մաշկաբանության մեջ: Ի դեպ, մեկ օրյա անվճար խորհրդատվության համար դիմածների թվում հիմնականում երեխաներ էին, որոնց մոտ բարդացված դեպքեր չկային: Իսկ մաշկի քաղցկեղի առաջացման վտանգավոր խմբում, ըստ մասնագետների, 50-ից բարձր տարիքի անձինք են։