Գյումրու փողոցաշինական մեծ ծրագրում աշխատանքային տեմպերն այդպես էլ չեն արագանում

Այսօր Երկխոսությունների մեդիա կենտրոնում Գյումրու փողոցաշինության ընթացքի վերաբերյալ հերթական քննարկումն էր կազմակերպվել։ Իսկ հրավիրյալ բանախոսները ոչ միայն շինկազմակերպությունների, այլև նախագծող ընկերության և քաղաքապետարանի ներկայացուցիչներն էին լինելու, որոնք այդպես էլ չեկան:

Գյումրու քաղաքապետարանը հրաժարվել էր մասնակցել քննարկմանը և նույն ժամին քաղաքապետարանում արտահերթ կամ հապճեպ խորհրդակցության էին հրավիրել շինարարներին, ինչի պատճառով էլ չկարողացան հասնել քննարկմանը, որն էլ անցավ առանց գլխավոր պատասխանատուների պարզաբանումների։

Գյումրու փողոցաշինական աշխատանքների տեմպերն անփոփոխ են, քիչ աշխատուժով, բայց ավարտի սեղմ ժամկետներով: Մայթերն ու փողոցներն անանցանելի վիճակում են, հետիոտների համար ժամանակավոր անցումներ այդպես էլ չսարքվեցին: Իսկ այս պահանջներն ու աշխատանքի կատարման ժամկետներին վերաբերող հարցերը շինկազմակերպություններին, վերահսկող կառույցին ու քաղաքապետարանին էին ուղղվելու, որոնց ներկայացուցիչներն այդպես էլ չեկան քննարկման:

Ներկաների խոսքերով՝ ինչո՞ւ քաղաքի ավագանին արտահերթ նիստ չի հրավիրում, կամ ինչու վարչապետի արած դիտողություններին ընթացք չի տրվում։ «Ճաննախագիծ» ինստիտուտը, որը նաև Գյումրու փողոցաշինական աշխատանքների վերահսկողն է և պատվիրատուն, նաև քաղաքապետարանը, հրաժարվել էին ներկայանալ քննարկմանը։ Իսկ շինընկերությունները, որոնք համաձայնել էին գալ հանդիպմանը, հանկարծ հապճեպ կանչվում են քաղաքապետարան արտահերթ քննարկման, որը նույն ժամին էր: Սա ներկաները որակեցին դիտավորություն:

Շիրակի մարզպետի նախկին տեղակալ Արա Մելիքջանյանը, որը փողոցաշինական ծրագրի աշխատանքային խմբի նախկին ղեկավարն էր, նշում է, որ հիմա շինարարության տեմպերի ավելացում պետք է լիներ, քանի որ 1 ու կես ամիս է մնացել շինարարության ավարտին, բայց փողոցներում աշխատանքներ համարյա չեն տարվում։

Փողոցաշինական աշխատանքներն արդյո՞ք որևէ աշխատանքային խումբ վերահսկում է, հայտնի չէ, ինչ խնդիրներ են առաջ եկել այս փուլում, ևս հայտնի չէ։ Շինկազմակերպություններն ու պատվիրատուն խուսափում են որևէ բացատրություն տալ, խնդիրներից չեն խոսում։

Ըստ Արա Մելիքջանյանի՝ ներկա վիճակը խնդիրները ժամանակին չբարձրաձայնելու հետևանքն է: Իսկ աշխատանքների տեմպերը ենթադրել են տալիս, որ սահմանված հերթական ու նոր վերջնաժամկետում, այսինքն՝ մինչև հունիսի 30-ը շինարարները գործն ավարտած չեն լինի: Նորից նախագծային թերություններն առաջ բերվեցին, որոնք պատվիրատուն շինարարության ձգձգման գլխավոր պատճառ է միշտ նշում:

Այժմ հարց է, թե ծրագրի երկրորդ փուլին՝ խոսքը ևս 33 փողոցում քանդման աշխատանքներ տանելու մասին է՝ հերթ կհասնի, թե՝ ոչ: Այս դեպքում նորից առաջ են գալու ստորգետնյա կոմունիկացիաների խնդիրները, երբ կոմունալ սպասարկման ծառայություններն աշխատում են առանց քարտեզների: Օրինակ՝ ջրմուղը։ «Վեոլիա ջուր» ընկերության պատասխանատուն վստահեցրեց, թե երկրորդ փուլում նախկին սխալները չեն կրկնի։ Հիմա նախագծողն իրենց հետ համագործակցելով է աշխատում։

Միայն ջրամատակարարը չէ, որ փողոցաշինական ծրագրի մեկնարկից սկսած մինչև հիմա լուրջ խնդիրների է բախվում: Առաջին փուլի աշխատանքների ավարտի հունիսյան ժամկետը խախտելու դեպքում, անկախ ամեն ինչից, արդեն պատվիրատուն հայտարարել է, որ շինարարն է պատասխան տալու ու դա՝ տուգանքների տեսքով։