Երևանում այսօր խնդիր կա և՛ կայանատեղերի, և՛ երթևեկության հետ կապված. ՃՈ պետ

«2017թ. ՀՀ տրանսպորտային միջոցներն ավելացել են 38 260-ով, 2018-ին՝ 73 562-ով, իսկ 2019թ. ապրիլի 29-ի տվյալներով՝ 32 115 տրանսպորտային միջոցով: Այս տրանսպորտային միջոցների մոտ 50 տոկոսն շահագործվում է Երևանում»,- այս մասին այսօր՝ ապրիլի 30-ին, կայացած ասուլիսի ժամանակ ասաց ՃՈ պետ Եգոր Կարապետյանը:

Լրագրողները հարց ուղղեցին` արդյո՞ք հնարավոր չէ որոշ հատվածներում կայանելու մեկ րոպե թույլտվությունը դարձնել հինգ րոպե՝ տուգանքներից խուսափելու համար, ՃՈ պետը պատասխանեց, որ կարելի է նույնիսկ տասը րոպե էլ թույլատրել, բայց անգամ 1 րոպե ավել թույլատրելու դեպքում խցանումները կրկնակի կավելանան, իսկ Երևան քաղաքում այսօր խնդիր կա և՛ կայանատեղերի, և՛ ընդհանրապես երթևեկության հետ կապված:

«Պարզ հաշվարկով տրանսպորտային միջոցով երկու տարի երեք ամսում 420 կմ տրանսպորտային միջոց գտնվում է Երևան քաղաքում, իսկ եթե դա վերածենք քառակուսի մետրի, մոտավորապես 110 հա տրանսպորտային միջոց միայն Երևանում է, իսկ եթե դա վերածենք հրդեհային նորմերը պահելուն, այսինքն` 15 քառակուսու փոխարեն լինի 24 քառակուսի մետր, նշանակում է՝ 170 հա Երևանում տարածք է պետք, որպեսզի Երևանում օգտագործվող տրանսպորտային միջոցները կայանեն: Մենք նաև վերլուծություն ենք կատարել Կրկեսի խաչմերուկում: Վերցրել ենք մեկ երթևեկելի գոտի և վերլուծության արդյունքում պարզել, որ նախատեսված 450 մեքենայի փոխարեն այդտեղ երթևեկում է 875-ից 925 մեքենա, այսինքն՝ կրկնակիից ավելին»,- ասաց Եգոր Կարապետյանը:

ՃՈ պետը նաև տեղեկացրեց, որ կարգավորվել է նաև տաքսու վարորդների կայանման տեղի հարցը: Լրագրողները նկատեցին, որ, այդուհանդերձ, տաքսու վարորդները շատ են խախտումներ անում, ինչին ի պատասխան, ՃՈ պետն ասաց, որ հենց այդ պատճառով էլ ցանկանում են օր առաջ բալային համակարգը կյանքի կոչել:

«Ուզում ենք օր առաջ կյանքի կոչել, որպեսզի բոլորը հասկանան՝ իրենք վարորդական իրավունքից կզրկվեն, եթե հաճախակի կատարեն նմանատիպ խախտումներ»,- նշեց  նա:

Ոստիկանության հասարակայնության հետ կապի և լրատվության վարչության պետ Աշոտ Ահարոնյանն էլ հավելեց, որ խցանումների ու կայանման խնդիրը բնորոշ է բոլոր խոշոր զարգացած քաղաքներին, իսկ Հայաստանում չկան այնպիսի խցանումներ, որ ժամերով մեքենաները ստիպված լինեն մնալ խցանման մեջ:

«Հայաստանում, կասեի, որ խցանում չկա, դա կարելի է ասել` դանդաղ ընթացք է, որովհետև, ի տարբերություն այլ խոշոր քաղաքների, մենք Երևանում խցանում չենք ունենում, որ ժամերով երթևեկությունը կանգնած մնա, այստեղ ուղղակի դանդաղում է»,- ասաց Ահարոնյանը: