Հասարակության մեջ Դոնալդն իսկական մարտիկ է, իսկ տանը… . Մելանյա Թրամփ

ԱՄՆ  առաջին տիկին Մելանյա Թրամփը հաճախ է հայտնվում լրատվամիջոցների ուշադրության կենտրոնում, բայց նրան հիմնականում ներկայացնում են վատ լույսի ներքո: Նրան նույնիսկ քննադատում են ամուսնու վարած քաղաքականության ու ԱՄՆ-ում առաջին տիկնոջ «պաշտոնը» թուլացնելու համար: Սակայն այս ամենով հանդերձ Մելանյա Թրամփը կարծես գտել է բացասական մթնոլորտը անտեսելու բանաձևը ու նրան միշտ տեսնում ենք շլացուցիչ տեսքով, բրենդային շքեղ հագուստներով:

Տարիներ առաջ՝ 1990-ին Մելանյա Թրամփը  Հարավսլավիայից տեղափոխվել է Նյու Յորք մոդելային կարիերա սկսելու նպատակով: Այն ժամանակ նա 26 տարեկան էր և հաստատ չէր կարող պատկերացնել, թե առջևում ինչ է սպասվում: Չնայած այն հանգամանքին, որ Մելանյան Դոնալդ Թրամփի հետ ծանոթության պահին քաջատեղյակ էր վերջինիս հսկայական կարողության մասին, այնուամենայնիվ, մոդելը բազմիցս շեշտել է, որ սիրում է Դոնալդ Թրամփին՝ անտեսելով տարիքային տարբերությունը, և  հերքել է այն խոսակցությունները, որ նա Թրամփի հետ ամուսնացել է միայն գումարի համար:

Երեկ Մելանյա Թրամփը դարձավ 48 տարեկան, այդ առիթով SHANTNEWS.am-ը որոշել է ներկայացնել ԱՄՆ առաջին տիկնոջ կյանքից և հարցազրույցներից անկեղծ, հիշարժան հատվածները:

Հանդիպումից հետո 7 տարի անց նրանք ամուսնացել են, իսկ մի քանի տարի առաջ նա դարձավ ԱՄՆ առաջին տիկին ու դասվեց  ամենաքննարկվող ու քննադատվող կանանց շարքին:

«Մենք ծանոթացել ենք 1998-ին երեկույթի ժամանակ: Նա խնդրեց իմ հեռախոսահամարը: Ես նրան պատասխանեցի, որ համարս չեմ պատրաստվում տալ, ավելի լավ է նա փոխանցի իր համարը և ես կզանգահարեմ»։

«Հավատացեք, ես հաստ կաշի ունեմ ու հաղթահարում եմ իմ հասցեին ուղղված բացասական ալիքները»:

«Հասարակության մեջ Դոնալդն իսկական մարտիկ է, իսկ տանը… Ես հաճախ ասում եմ, որ տանը ես երկու որդի ունեմ՝ Բերոնն ու Դոնալդը»:

«Ես վկա եմ եղել այն պահերին, երբ կանայք անձամբ մոտեցել և նրան փոխանցել են իրենց հեռախոսահամարները: Հենց իմ աչքի առաջ: Ես միշտ հարցնում էի, թե ինչո՞ւ եք դուք դա անում՝ իմանալով, որ նա ամուսնացած է»:

«Նախքան իմ ու Դոնալդի համաբերությունները քննադատելը ես խորհուրդ կտամ այդ մարդկանց նայել հայելու մեջ և իրենց հարց տան՝ «Իսկ ինչի են հասել իրենց կյանքում, ինչպիսին է իրենց ընտանիքը»:

«Սոցիալական ցանցերը վնասում են մարդկանց: Այնտեղ բացասականը շատ է: Իմ կյանքը լուսանկարների ալբոմ չէ, որ բոլորին ցուցադրեմ»:

«Ես չեմ համաձայնվում նրա բոլոր որոշումների հետ: Երբ  ինձ ինչ-որ բան դուր չի գալիս ՝ ասում եմ այդ մասին»:

«Մենք իրար հետ շատ ենք խոսում: Ես տեղյակ եմ իր գործերից»:

«Դոնալդը միշտ ինձ լսում է, բայց անում է այնպես, ինչպես ուզում է»:

«Ինձ չեն վիրավորում անօրինական գաղթականների մասին նրա խոսքերը: Ես նույնպես գաղթական եմ: Տարիներ առաջ ես նույնպես ստիպված էի անընդհատ թռչել Սլովենիա՝ վիզայի ժամկետը երկարաձգելու: Հետո ես Green Card ձեռք բերեցի: Ես օրենքով առաջնորդվեցի, այլ ոչ թե ուղղակի եկա ԱՄՆ և մնացի այստեղ ապրելու նպատակով»:

«Ես պերֆեկցիոնիստ եմ: 100 տոկոսով նվիրվում եմ այն աշխատանքին, որը սկսել եմ»:

«New York Post-ը երբևէ ճիշտ պատմություն չի գրել: Նրանք թողարկել էին նոր համար, որի շապիկին իմ հին, մերկ նկարն էր: Այս ֆոտոշարքը ես արել եմ շատ շուտ և ի՞նչ: Ես իմ մարմնից չեմ ամաչում և հպարտանում եմ իմ կազմվածքով»:

«Դոնալդի հետ ապրելու համար պետք է անկախ ու կայացած կին լինել»: