Երկու օպերատորի փոխարեն մեկ օպերատոր է մրցույթը շահել. Մարությանն` աղբահանության խնդրի մասին

Այսօր կառավարության նիստի ժամանակ Երևանի քաղաքապետ Հարկ Մարությանը ներկայացրեց նաև օրեր շարունակ աղմուկ բարձրացրած աղբահանության հարցը:

«Դեռ 2014-ին  նախատեսված էր, որ Երևանում պետք է լինի 2 օպերատոր, նրանցից մեկը շվեդական ընկերություն էր: Քաղաքի վարչական շրջանները բաժանվել էին  2 լոտերի, այնուհետև անհասկանալի կերպով 2 լոտն էլ իր վրա վերցրեց հաղթող ճանաչված «Սանիթեք» ընկերությունը: Այն ներկայանում էր որպես 2 ՍՊԸ՝ «Սանիթեք ինթերնեշնլ» և «Սանիթեք»: Սկզբում ամեն ինչ նորմալ էր, քանի որ մեքենաները նոր էին, անխափան աշխատում էին,  բայց սխալ սպասարկման արդյունքում, աշխատակիցների վատ աշխատանքի արդյունքում տեխնիկան այսօր վատ վիճակում է, դա մեր կարծիքն է»:

Քաղաքապետը նշեց, որ իր պաշտոնավարման առաջին օրերին խնդիրն ավելի սրված է եղել, 2-3 ամսում կարողացել են կարգավորել՝ «Սանիթեք» ընկերությանը հորդորելով ներառել նաև այլ կապալառուների, քանի որ ֆիզիկապես չէին հասցնում սպասարկել: Այդ ընթացքում վիճակը կրկին սրվել է Ամանորի տոնական օրերին, բայց հունվարի 4-ից հարցը կրկին կարգավորել են: Խնդիրն այսօր էլի սուր է:

« Մենք բազմիցս զգուշացրեցինք, որ էն վիճակում, որ ձեր մեքենաններն են, հնարավոր չէ, քանի որ դրանք քիչ են ու վատ վիճակում, և եթե 1-2-ը խափանվեն, մի ամբողջ վարչական շրջան կմնա աղբի մեջ: Նրանք պատասխանեցին, որ ֆինանսապես ի վիճակի չեն: Եվ մենք կանխատեսելով, որ կգա այն օրը, երբ մեքենաների մեծ մասը կխափանվի, մենք մրցույթ էինք հանել 24 աղբատար մեքենա, որը պետք է ձեռք բերեր քաղաքապետարանը: Տեղեկացնեմ, որ մեր գործողություններն ու հարաբերությունները բացարձակապես պայմանագրի ներքո են, չնայած «Սանիթեքից» ասում են, որ իրենք ունեն նաև բանավոր պայմանավորվածություններ, բայց մենք հստակեցրել ենք, որ այդ բանավորին մենք տեղյակ չենք: Եվ այսօր արդեն իրենց վատ աշխատանքի համար տուգանել ենք մոտ 13 մլն դրամով, եթե այսպես շարունակվի՝ էլի տուգանքներ կլինեն: Մեր կոմունալ վարչություններն այս պահին աշխատում են իրենց թերությունները վերացնելու ուղղությամբ, բայց առանց աղբատար մեքենաների հնարավոր չէ»:

Մարությանը նշեց, որ իրենց մրցույթն ընկերությունը բողոքարկել է, իսկ քաղաքապետարանն էլ իր հերթին դատարան է դիմել ընդդեմ բողոքարկման։ Բայց անկախ այդ դատական պրոցեսներից` գնված 24 մեքենան Երևանում կլինեն հունիս-հուլիս ամիսներին, մինչ այդ Երևանն աղբից մաքրել է պետք:

«Այս պահին որպես հարցի լուծում դիմում ենք կառավարությանը՝ մի քանի մեքենա ձեռք բերելու համար, մինչև կհասնեն արդեն գնվածները: Եթե կառավարությունը հաստատի, ապա այդ մեքենաները, հավանաբար, 1-2 շաբաթում կլինեն արդեն Երևանում»:

Վարչապետի այն հարցին, թե արդյոք վիճակը կրիտիկական է, քաղաքապետը նշեց, որ կրիտիկական էր Նեապոլի վիճակը 2012-ին: Երևանը դեռ շատ հեռու է այդ վիճակից, բայց խնդիրը լուրջ է և լուծել է պետք:

«Մենք ամեն օր հսկում ենք քանի մեքենա է դուրս գալիս, ասենք դուրս է գալիս 16 մեքենա, մի քանի ժամից մի քանիսը խափանվում է, տանում են, նորոգում, էլի բերում: Մի օրում կարող են 12-ն էլ փչանալ: Անձամբ եմ պարկը հետազոտել, հաշվել ենք, որ էն մեքենաները, որ իրենք ունեն՝ էլի չեն բավարարում, չէին բավարարում նաև ձնամաքրման մեքենաները, դրա համար ձեռք բերեցինք նաև ձնամաքրման մեքենաներ, չնայած ձյունն առատ չեղավ այս տարի»:

«Սանիթեքի» կողմից պայմանագրի խախտման մասին հաստատեց նաև ԿԳ նախարարը, որը նախկինում եղել էր ավագանու անդամ՝ հարցնելով նաև նոր մրցույթ անցկացնելու հնարավորության մասին:

«Նոր մրցույթ անցկացնելու համար պետք է խզել այս պայմանագիրը, խզման դեպքում պայմանագրում կան կոնկրետ կետեր, ընթացակարգ, և մենք` որպես վերահսկող մարմին, վերահսկելու ենք իրավիճակը, և եթե դրա կարիքը լինի,  օգտագործելու ենք այդ կետերը` պայմանագիրը խզելու համար: Եթե առանց ընթացակարգի խզենք, ընկերությունը դատարանում կպահանջի իր առաջիկա 10 տարիների շահույթը, որը ստանալու էր այստեղ աշխատելու ընթացքում»: