Այրումի ճանապարհին քարաթափման վտանգ կա. Ֆելիքս Ցոլակյանն ահազանգում է

Մինչ օրակարգային հարցերին անցնելը Կառավարության նիստի ժամանակ Արտակարգ իրավիճակների նախարար Ֆելիքս Ցոլակյանը հրատապ հայտարարությամբ հանդես եկավ՝ կապված եղանակային տատանումների հետևանքով ստեղծված վիճակի հետ:

«Անձրևները շարունակվելու են, ամսի 20-ին շատ ինտենսիվ են լինելու: Կանխատեսվում է, որ տեղումները լեռնային շրջանում ձյան տեսքով կլինեն: Հեղեղումների վտանգ կա, արդեն ունենք ահազանգ Արմավիրի մարզի Երվանդաշատ գյուղից. Արաքսի ջրերը բարձրացել են, կարող են ծածկել դաշտերը: Երեկ մերոնք նայել են, շատ աշխատանքներ են պիտի արվեն: Այս պահին ունենք նաև 6 սողանք: Դրանցից մեկը Լոռվա մարզում է, ակտիվ սողանք է, կարող է լինել  անտառային շերտի հոսք դեպի ճանապարհ, արդյունքում մի գյուղի ճանապարհ կարող է փակվել: 6000 տոննա հողի մասին է խոսքը, որը դժվար կլինի մաքրել, այլընտրանքային ճանապարհ էլ կա, բայց անբարակարգ է: Խոսքը Աթան գյուղի մասին է՝ 250 բնակչությամբ»:

Վարչապետը հրահանգեց այլընտրանքային ճանապարհի բարեկարգմամբ անհապաղ զբաղվել: ԱԻ նախարարը նաև տեղեկացրեց, որ կա քարաթափումների վտանգ:

«2013-ին հաստատվել է հայեցակարգ, ըստ որի` բոլոր գերատեսչություններն ունեն հանձնարարականներ, թե որը որ մասով պիտի  զբաղվի, մենք կոորդինացնողի դեր ունենք, բայց կա խնդիր այստեղ: Օրինակ` տրանսպորտի նախարարության հետ խոսում ենք, որ կա քարաթափման  երևույթ, տեղն էլ վատ տեղ է՝ Այրումի ճանապարհին, մի անգամ վատ դեպք արդեն եղել է, որի արդյուքնում եղել են զոհեր: Հիմա էլի սպասվում է քարաթափում:

Կանխելու համար կան պայթեցնող կազմակերպություններ, դրանք շատ չեն, բայց որպեսզի դրանք գան, անեն, մենք էլ կողքը կանգնենք, հսկենք անվտանգությունը, պետք է տրանսպորտի նախարարությունը ֆինանսավորի, իսկ այդ ֆինանասավորման համար պետք է մրցույթ անցակցվի: Մենք ժամանակի խնդիր ունենք, սրանք հրատապ գործեր են: Կարծում եմ`  տրանսպորտի նախարարության, տարածքային նախարարության, նաև մեզ հետ պետք է այս հարցը քննարկել, մարզպետարաններն էլ կարող են ունենալ որոշակի գումար, թող հիմա օգտագործեն այս խնդրի լուծման համար, հետո թող տան հաշվետվություն»:

Վարչապետը հանձնարարական տվեց Տիգրան Ավինյանին` կանխարգելել ճգնաժամային իրավիճակը.

«2 խնդիր կա՝ օպերատիվության և նաև հետագա ճիշտ մեխանիզմների մշակման: Օպերատիվության համար հիմա հավաքվում եք, պրն Ավինյան, կորոշեք որտեղ ինչ պետք արվի, որ ճգնաժամային իրավիճակներ չունենանք. պետք է գնալ կանխարգելելու ճանապարհով: Երկարաժամկետի առումով մենք գնումների հետ կապված պրոբլեմների մասին խոսել ենք, այժմ գնումների մասին օրենսդրությունը բարելավելու պրոցեսը սկսված է: Եվ ես ուզում եմ վստահ լինել, որ մենք տեղյակ ենք բոլոր շահագրգիռ մարմինների և պրոբլեմների մասին, որոնց հանդիպում ենք, որ ամեն ինչ կա մեր ձեռքի տակ, որ հետո չպարզվի, թե  բան չենք փոխել: Անընդհատ հարց է լինում այն մասին, որ օպերատիվ հարցերում խնդիր ենք ունենում»:

Ֆելիքս Ցոլակյանը նաև ավելացրեց, որ առաջին կարկուտն արդեն եղել է, երկրորդը սպասվում է ապրիլի 18-19-ին: Ապահովագրական մեխանիզմները շուտով կլինեն՝ վստահեցրեց գյուղատնտեսության նախարարի առաջին տեղակալ Գեղամ Գևորգյանը:

«Ապահովագրական մեխանիզմները գորոծում են, բյուրոն ստեղծվել է, բայց մասնավոր ապահովագրական ընկերությունները հիմա իրենց IT ներքին սպասարկումն են անում, իրենց մասնագիտական խնդիրն է, բայց խոսք են տվել 1-2 ամսում այդ հարցերը կլուծվեն»:

Իսկ արդեն տեղացած կարկուտի հետ կապված նշեց, որ տարածքները արդեն նայել, մարզպետարանի իրենց գործընկերների հետ խումբ են ձևավորել՝ վնասի ճիշտ գնահատական տալու համար:

«Այս պահին, ըստ առաջին գնահատականների, լուրջ վնասներ չկան»,- ավելացրեց Գևորգյանը:

Վարչապետի հարցին` ցրտահարություն սպասվո՞ւմ է, թե՞ ոչ, Ցոլակյանը մեջբերեց օդերևութաբանների կանխատեսումները.

«Ջերմաստիճանը ամենաշատը կիջնի ապրիլի 20-21-ին: Ըստ օդերևութաբանների՝ պլյուս 3-4 կլինի գիշերային ժամերին, ցերեկվա ջերմաստիճանը համարյա կհավասարվի գիշերվա ջերմաստիճանին, բայց ցրտահարության մասին ասում են, որ չի լինի»:

Գերատեսչությունների գործառույթի առումով բնապահպանության նախարար Էրիկ Գրիգորյանը հավելեց.

«2013թ. տարբեր գերատեսչությունների վրա գործառույթներ դրվել են, բայց այս գործառույթները իրականացնելու համար ո´չ ֆինանասական միջոցներ, ո´չ էլ պարբերական մոնիթորինգ չի իրականացվել: Մենք այս տարի միջնաժակետով դա կնշենք մեջը, բայց գումարը պետք է հատակցվի՝ ռիսկը բացառելու համար: Բոլոր  գերատեսչությունների համար պետք է բյուջեով հաստատվի, գումարը հատկացվի, որպեսզի ակտիվացման ժամանակ նախնական գումար ունենանք»: