Գյումրու փողոցաշինական ծրագրում խախտումներ են հայտնաբերվել

Գյումրու փողոցաշինական մեծ ծրագրի առաջին փուլում ինչ խախտումներ են արձանագրվել, որոնք են դրանց օբյեկտիվ և սուբյեկտիվ պատճառները: Նման ուսումնասիրություն է կատարել «Կոմպաս» հասարակական կազմակերպությունը: Այսօր ուսումնասիրության արդյունքներն են ներկայացրել, համաձայն որոնց՝ խախտումները վերաբերել են շինարարական որակին, նախագծերին և ժամկետներին: Փորձագետները նաև փողոցաշինությունն ավարտելու նոր ժամկետներն են կասկածի տակ դրել: Մի քանի ամիս վերապատրաստված դիտարկում իրականացնողների օգնությամբ տեխնիկական ու ֆինանսական վերլուծություն են կատարել հասարակական սեկտորի ներկայացուցիչները: Ընտրել է Վերակառուցման և զարգացման բանկի ծրագրում ընդգրկված 5 փողոց: Դրանցից երկուսում ասֆալտի որակը ստուգել են լաբորատոր պայմաններում ու խախտումներ հայտնաբերել:

«Վազգեն Սարգսյանի փողոցում տեղադրված նոր եզրաքարերը առանձնացել են բետոնի շերտից: Դրա հիմնական պատճառը եղել է փշրվող բետոնը: Փաստորեն, ունեցել ենք անորակ աշխատանք: Սա տեղի է ունեցել եզրաքարերը տեղադրելուց անմիջապես հետո, երբ տեղացել է առաջին անձրևը: Իսկ Ջիվանի փողոցում շեղումներ են եղել երթևեկելի մասում, երկշերտ ասֆալտ փռելիս: Ասֆալտի հաստությունը նորմատիվներից մոտավորապես 5-6 սմ շեղում է ունեցել:Սա համարվում է խախտում»,- ասել է ծրագրի մոնիթորինգի համակարգող Մարինե Ավետիսյանը:

Քաղաքապետարանի ներկայացուցիչը քննարկմանը բնակկոմունալ բաժնի պետն էր: Նա էլ նշեց, թե Ջիվանի փողոցում ուսումնասիրության արդյունքներն իրականությանը չեն համապատասխանում: Ասֆալտաշերտը ոչ թե պակաս է, այլ գործը դեռ կիսատ է: Մյուս կիսատ մնացած փողոցներում էլ ուսումնասիրության արդյունքներով արձանագրել են, որ շինկազմակերպությունները պայմանագրային ժամկետի խախտումներ են թույլ տվել: Վերջնաժամկետը հունվար, փետրվար ամիսներն էին: Քննարկման մասնակիցների ու փորձագետների համար էլ անհասկանալի էր, թե ինչպես է պատվիրատուն՝ քաղաքապետարանը, նման ժամկետներով պայմանագիր ստորագրել, երբ պարզից էլ պարզ է, որ ձմռանը ասֆալտապատում չի կատարվում:

«Ժամկետների երկրացում թույլ է տվել ֆինանսավորող բանկը: Բոլոր փողոցների ժամկետները երկարացվել են: Հունվարին Գյումրիում ասֆալտապատում կատարել հնարավոր չէր: Որտեղ ժամկետներում չէին կատարվել աշխատանքները, տեղափոխել ենք գարուն »,- նշել է Գյումրիի քաղաքապետարանի բնակկոմունալ բաժնի պետ Կնյազ Մանասյանը:

Իսկ ով է վերահսկում աշխատանքները: Անցած տարի աշխատանքային խումբ էր ստեղծվել, որն էլ ստանձնել էր վերահսկողի գործառույթը: Խումբը լուծարվել է, բայց նորը դեռ չի կազմավորվել: Փորձագետներն էլ փաստեցին՝ ստացվում է, որ աշխատանքներն առանց վերահսկողության են մնացել: Ըստ քաղաքապետարանի պատասխանատուի՝ սպասում են տարածքային կառավարման նախարարի հրահանգին, համաձան որի՝ նոր աշխատանքային խումբ է ստեղծվելու, որի կազմում մարզպետարանը ներկայացուցիչ չի ունենա: Նման որոշում հենց մարզպետարանն է կայացրել: Իսկ փողոցաշինության առաջին փուլի նոր վերջնաժամկետը հունիսի 30-նն է: Սա, ըստ քաղաքապետարանի ներկայացուցչի, այն ժամկետն է, որից թեկուզ 1 օր ուշացման դեպքում արդեն շինարարի նկատմամբ տույժ ու տուգանք է կիրառվելու: