Սովորեցնում ենք հանրությանն ու տնտեսվարողներին, որ ցանկացած հարց կարող են լուծել ցույցերի միջոցով. Վարդան Արամյան

«Հարկային փոփոխություններ անելու պահանջի մեկնարկը տրվել է դեռևս 2016 թվականին: Հարկային քաղաքականությունն ազդում է քո տնտեսության վրա՝ և՛ կարճաժամկետ ժամանակահատվածի, և՛ երկարաժամկետ»,- «Հեռանկար»-ի տաղավարում Արամ Աբրահամյանի հետ զրույցի ժամանակ ասել է ՀՀ ֆինանսների նախկին նախարար Վարդան Արամյանը՝ անդրադառնալով Հարկային օրենսգրքի բարեփոխումներին:

Ըստ Վարդան Արամյանի՝ պետք է մտածել և համաձայնության գալ մի քանի սկզբունքների հարցում: Հասկանալ, թե ինչ տնտեսական աճ ենք պատկերացնում՝ առաջարկով մղվո՞ղ, թե՞ պահանջակով քաշվող։

«Պահանջարկով քաշվող տնտեսական աճ մենք ունեցել ենք մինչև 2008 թվականը, հետո տեսանք, որ դա կայուն չէ: Հետևաբար՝ պետք է լինի առաջարկով մղվող:  Դրա համար պետք է, որ մենք սպառումն ավելի շատ հարկենք, ավելի քիչ հարկենք արտադրական գործոնները: 2016 թվականին մենք կատարեցինք մեկ ախտորոշում, այդ վերլուծությունը մեզ ցույց տվեց, որ հարկային քաղաքականության մեջ պետք է փոփոխություններ կատարենք:  Բայց պետք է նաև կատարել «տնային աշխատանք» մի քանի ուղղություններով՝ մինչև որ ընդհանուր քաղաքականությունը կդրվի սեղանի վրա: Ես ճիշտ չեմ համարում կամ խիստ վտանգավոր եմ համարում, երբ որ դու քննարկման սեղանի վրա դնում ես մի  փաստաթուղթ, հետո կամաց-կամաց սկսում ես նահանջներ անել: Դա ստեղծում է սպասում հանրության մեջ, կոնկրետ վարքագիծ, սովորեցնում ենք հանրությանն  ու տնտեսվարողներին, որ ցանկացած հարց կարող ենք լուծել ցույցերի միջոցով: Սա խիստ վտանգավոր է, որովհետև դա նշանակում է վաղը, մյուս օրը նույնիսկ եթե շատ խելացի, հավասարակշռված փաստաթուղթ էլ դնենք սեղանի վրա, դժգոհներ կլինեն»,- ասել է Արամյանը՝ հավելելով, որ վարքագծի փոփոխություն՝ նշանակում է վերաիմաստավորում, ինչն էլ իր հերթին, որ հասարակության ինչ-որ մի հատված պետք է տուժի, մի մասը բեռն ավելի շատ պետք է իր վրա վերցնի, մյուս մասը՝ ավելի քիչ: Չի լինի այնպես, որ բոլորը շահեկան դիրքերում լինեն: Պետք է անել այնպես, որ բոլորը շահեկան վիճակում հայտնվեն երկարաժամկետ ծրագրերի արդյունքում»,- ասել է նա:

Զրույցի ժամանակ հիշվել է գազավորված ընպելիքների, փաստաբանների հարցում առաջարկված փոփոխությունների մասին: Դրանք ծրագրվեցին, բայց ընթացք չստացան:

Մանրամասները՝ տեսանյութում։