Ես շատ գոհ եմ այս պարգևավճարային սկանդալից, դա ահավոր լավ, կարևոր խոսակցություն է. Փաշինյան

ՀՀ վարչապետ Նիկոլ Փաշինյանի՝ լրատվամիջոցների հետ հերթական հանդիպման ժամանակ նրան հարց ուղղվեց՝ իր թիմակիցներից դժգոհության դեպքում հնարավո՞ր է՝ իրեն կաշկանդի այն հանգամանքը, որ հեղափոխության ժամանակ միասին պայքարել են:

«Մենք կաշկանդված չենք: Երբ խոսում են դժգոհության մասին, ինձնից ամենամեծ դժգոհը ես եմ, չի կարող ինձնից որևէ մեկն ավելի դժգոհ լինել, քան ես եմ: Երբ ասում են՝ այ, ձախողվել են, մեկը կարո՞ղ է ասել՝ ո՞վ, ինչի՞ մեջ է ձախողվել: Իմ արձանագրումն այն է, որ մենք այսօր, ըստ էության, ոչ մի ոլորտում ձախողում չենք ունեցել, մեր պետական կառավարման համակարգում այսօր, ըստ էության, չկա պաշտոնյա, որին ասենք՝ գործդ ձախողել ես դու: Ուրիշ բան, որ արագության, դանդաղության հետ խնդիր կա: Մի ոլորտում ենք ունեցել ձախողում, դա հանրահայտ ձախողում է: Երբ այդ գիծն անցնեն, ոչ մի կաշկանդվածություն չունեմ, բացառված է, որ կաշկանդվածություն լինի, այլ խնդիր է՝ կա՞ն, արդյոք, ինչ-որ թերություններ, բացթողումներ: Այո՛, կան, բոլորիս գործողություններում, իմ գործողություններում էլ, բայց ամեն բացթողումից հետո նորի՞ն ենք նշանակում, որ գալիս է, նստում, դողում՝ վայ, էսօր սխալ հայացքով մեկին չնայեմ»,- ասաց նա:

Փաշինյանը նշեց, որ ինքը կոնկրետ օրինակներ գիտի, երբ հանրային առումով եկել է, հասել լարվածության, իր առաջին միտքն այդ ժամանակ եղել է հետևյալը՝ այս արձագանքը և դասը ստացանք: Վարչապետն անդրադարձավ նաև այս դեպքերում արվելիք հետևություններին՝ բոլորին ուղարկենք տուն, գան նորերը, նույն  ճանապարհով գնանք: Ու թեպետ, ըստ վարչապետի, չի կրկնվի նույն իրավիճակը, բայց մի ուրիշ իրավիճակ կլինի: Կառավարության ղեկավարը վստահեցրեց՝ կարող են գնալ այլ ճանապարհով՝ բացթողումները, քննադատություններն օգտագործել որպես դաս, որից աշխատանքի արդյունավետությունը բարձրանում է:

«Այն սկանդալների մասին, որ կապված էին ՊԵԿ-ի հետ: Մենք ունենք պարզ ընտրություն՝ այդ, այսպես ասած, սկանդալների համար, հանրային տրամադրությունները խաղաղեցնելու համար վարչապետը պիտի մտներ կամուֆլյաժով, հաներ, ջնջե՞ր, թե՞ մենք հասկանայինք իրավիճակը, այդ հանրային ճնշումը, այդ քննադատությունը, որ կա, օգտագործեինք՝ որպես այդ համակարգի աշխատանքի արդյունավետության բարձրացման գործիք:

Այո՛, շատ խնդիրներ են եղել, բայց ես նախընտրում եմ գնալ այս երկրորդ ճանապարհով: Այդ քավարանի միջով անցնելուց հետո ամեն պաշտոնյա ավելի պատասխանատու է լինում, քան ամեն եկող, որ մտածում է՝ ինքն անսխալական է: ՊԵԿ-ի հետ մեր աշխատանքի բովանդակությունը փոխվել է լրիվ, մենք հիմա լրիվ ուրիշ բաների մասին ենք քննարկում: Ես շատ գոհ եմ այս պարգևավճարային սկանդալից, դա ահավոր լավ, կարևոր խոսակցություն է»,- ասաց վարչապետը:

Փաշինյանն անդրադարձավ նաև հնչող տեսակետներին, թե կարելի էր այդ գումարները «կտրել-տալ ուրիշներին», նշեց՝ ոչ ոք չի ասում՝ այդ կտրածով ուրիշներից քանի՞ հոգու հարց է հնարավոր լուծել, ու ոչ ոք չի ասում՝ ՊԵԿ-ը պետք է աշխատի, որ մարդիկ թոշակ ստանան, նպաստ ստանան, աշխատավարձ ստանան, քանի որ այդ գումարը հավաքում է ՊԵԿ-ը:

«Ոչ ոք հույս չունենա, որ ցածր աշխատավարձ ստացող պաշտոնյաները կարող են բարձր որակի ծառայություններ մատուցել հանրությանը, «Ֆեյսբուքում» և ձեր հայտնի լրատվամիջոցներում մենք ամեն օր ձախողում ենք, սակայն կա օբյեկտիվ իրականություն, որտեղ մենք ձախողումներ չենք ունեցել, ունեցել ենք թերություններ, դուք էլ եք ունենալու, դրանց լուծումը որակը բարձրացնելն է»,- նշեց նա: