Մարալիկի առողջության կենտրոնի ծննդաբերական բաժանմունքի փակման հարցը դարձյալ օրակարգում է

Անիի տարածաշրջանի 17 գյուղեր սպասարկող միակ ծննդաբերական բաժանմունքի փակման հարցը դարձյալ օրակարգում է: Ծնունդների պակասը առողջապահության նախարարությունը կարևոր պատճառներից մեկն է դիտարկել, որպեսզի Մարալիկի ծննդատունը զրկվի ծննդօգնության համար սահմանված նվազագույն` առաջին կարգից:

Հիշեցնենք, որ Մարալիկի ծննդատան փակման հարցը շրջանառվում է արդեն 3 տարի: Այս ընթացքում տնօրինության ներկայացրած առաջարկություններն ու ծրագրերը չեն նպաստել վիճակը փոխելուն: Հիմա վերջին հնարավորությունն է տրվել բուժհաստատությանը մինչև տարեվերջ խնդիրը կարգավորելու համար:

Մարալիկի առողջության կենտրոնի ծննդաբերական բաժանմունքում կեսարյան հատումով ծննդաբերության էին նախապատրաստվում: Ամեն օր չէ, որ այստեղ ծնունդներ են ընդունում: Ծննդատունը Անիի տարածաշրջանում միակն է` ընդամենը 4 մահճակալով:

Հազվադեպ կարող է պատահել, որ 4 մահճակալն էլ զբաղված լինի: Բուժհաստատության գինեկոլոգի խոսքերով` տարածաշրջանի գյուղերից տարեկան մոտ 80 ծնունդ գրանցվում է մարզի այլ ծննդատներում: Օպտիմալացման գործընթացներից հետո ծննդաբերական բաժանմունքը Մարալիկի առողջության կենտրոնում միակ ստացիոնարն է մնացել:

Նախկինում այստեղ տարեկան մինչև 250 ծնունդ էր գրանցվում, հիմա դրա ուղիղ կեսը: 3 տարի առաջ բաժանմունքի փակման հարցը դրվեց, տնօրինությունն էլ այն պահելու համար գնաց աշխատավարձերի կրճատման քայլին: Ըստ բուժաշխատողների` նախկինում 20.000-30.000 դրամ աշխատավարձով են աշխատել: Նախկին տնօրեն Սուսան Պետրոսյանն էլ հաստատում է, որ երբ հաստատությունը վնասով էր աշխատում, տարիներ առաջ առողջապահության նախարարությունը թույլատրեց կրճատել բուժանձնակազմի աշխատավարձի 10, իսկ վարչական աշխատողների աշխատավարձերի 20 տոկոսը:

Աշխատավարձերի ու թոշակառու բուժանձնակազմին կրճատելու հաշվին Մարալիկի առողջության կենտրոնի նախկին տնօրենին այդ ժամանակ հաջողվել էր փակել մոտ 16 մլն դրամի պարտքը: Սա էլ համարվել էր բուժհաստատության առողջացման ծրագիր, որը 10 տարվա տնօրենի համար սպասված արդյունքը այդպես էլ չապահովեց: Հիմա էլ տնօրենի նոր` ժամանակավոր պաշտոնակատարը փորձում է ոչ թե աշխատավարձ կրճատելով, այլ նոր սարքավորումներ բերելով ծննդօգնության վիճակը շտկել, չնայած այս ընթացքում հիվանդանոցը հասցրել է զրկվել իր ունեցած նվազագույն առաջին կարգից:

Մարալիկի առողջության կենտրոնի տնօրենի ժամանակավոր պաշտոնակատար Վռամ Մելիքյանի խոսքերով` նախարարությունից եկել, ստուգել են, եղած սարքավորումները գնահատել չափորոշիչներին անհամապատասխան: Իսկ այն, ինչ ունեն, նախարարության ստուգումներից հետո են բերվել արտասահմանցի մի բարեգործի միջոցներով, մի քանի բուժսարքավորումներ:

Տարիներ առաջ էլ Մարալիկի առողջության կենտրոնում վերանորոգումներ էին կատարվել, բայց բաժանմունքը փակելու հարցը նորից հայտնվել է օրակարգում: Շիրակի մարզպետարանի առողջապահության վարչության պետի ժամանակավոր պաշտոնակատարի խոսքով` դիմել են կառավարություն, որ մինչև տարեվերջ թույլատրվի երկարաձգել բուժհաստատության աշխատանքը: Առողջության կենտրոնի տնօրենի ժամանակավոր պաշտոնակատարը դիմել է Անիի համայնքապետարան՝ 2 մլն դրամ սուբսիդիա հատկացնելու խնդրանքով:

Սրանով փակելու է հունվար, փետրվար ամիսների աշխատավարձերի պարտքերը, հետո էլ խոստացած ծնունդների նվազագույն թիվը կավելացնի: Ի դեպ, արդեն 2-րդ անգամ է, որ այս բուժհաստատության տնօրենի մրցույթն անցնում է անարդյունք: Պայքարը նախկին տնօրենի և ժամանակավոր պաշտոնակատարի միջև է: Նախկին տնօրենը հաղթահարում է մրցույթի բոլոր 3 փուլերը, բայց մրցութային հանձնաժողովի կողմ ձայները չեն բավարարում, ավելի ճիշտ, մերժում են նախկին տնօրենի ծրագիրը: Ըստ առողջապահության վարչության պետի ժամանակավոր պաշտոնակատարի` այդ ծրագիրը չի կարող նման պայմաններում հայտնված հիվանդանոցի համար զարգացում ապահովել:

Նախկին տնօրենը նախորդ մրցույթի արդյունքները վիճարկում է դատարանում: Այն կարծիքին է, որ մրցութային հանձնաժողովն իրեն միտումնավոր թույլ չի տալիս տնօրեն ընտրվել:

Նշենք, որ նախկին տնօրենի ղեկավարման ընթացքում չարաշահումներ էին հայտնաբերվել: Ըստ նրա` ընդամենը 50.000 դրամի մասին է եղել խոսքը, որն ասում է, արդեն վերադարձրել է: