Եգիպտոսի համար Էրդողանի վարած քաղաքականությունն անընդունելի է. եգիպտահայ լրագրող

Մյունխենի անվտանգության համաժողովի գլխավոր նստաշրջանում Եգիպտոսի նախագահ Աբդել Ֆաթթահ Ալ-Սիսիի ելույթը Մերձավոր Արևելքում անկայունության հետևանքների մասին շարունակվում է քննարկվել եգիպտական մամուլում: Իր ելույթում Եգիպտոսի նախագահը հիշատակել է նաև Հայոց ցեղասպանության մասին` մասնավորապես ասելով. «100 տարի առաջ մենք ընդունեցինք հայերին հայկական կոտորածներից հետո և ապահովեցինք խաղաղություն ու կայունություն»: Եգիպտական «Ալ Ահրամ» թերթի հայ սյունակագիր, վերլուծաբան Թովմաս Գորգիսյանը SHANTNEWS.am-ին ասում է, որ նախագահ Սիսին Հայոց ցեղասպանության կամ ջարդերի  մասին առաջին անգամ չէ, որ խոսում է, բայց այս անգամ նրա այս մատնանշումն աչքի ընկավ, քանի որ հնչեց միջազգային համաժողովի ժամանակ:

«Իր ելույթում Սիսին հիշեցրեց, որ հարյուր տարի առաջ հայերին ընդունելու առումով Եգիպտոսը ոչ մի խտրականություն չի դրել և ցանկացավ ասել, որ այսօր էլ  Եգիպտոսը պատրաստ է ընդունել հինգ միլիոն գաղթականների և նրանց հետ վարվել իբրև երկրի ժողովրդի մաս»,- ասաց Թոմաս Գորգիսյանը՝ պատասխանելով նաև մեր այն հարցին, թե արդյո՞ք Եգիպտոսի հայությունն այս առիթը կօգտագործի և կբարձրացնի Եգիպտոսի կողմից Հայոց ցեղասպանության ճանաչման հարցը.  Եգիպտոսի հայությունը վերջին յոթ-ութ տարիներին այս հարցում վայելում է Եգիպտոսի կառավարության դրական կեցվածքը, այս հայտարարությունը նորություն չէր հայերի համար:

«Վերջին տարիներին Եգիպտոսը տարբեր առիթներով Հայոց ցեղասպանության, հայ ժողովրդի, հայ գաղթականների նկատմամբ իր մոտեցումներն արտահայտել է՝ մանավանդ նշելով հայերի դերը Եգիպտոսի տնտեսության, մշակույթի բարգավաճման գործում: Ընդ որում, ոչ միայն վերջին հարյուր տարիներին, այլ տասը դարերի ընթացքում: Հայոց ցեղասպանությունը ճանաչելու հարցում հայկական կազմակերպություններն այստեղ աշխատանք են տանում. Հայ դատի գրասենյակը, ՀԲԸՄ-ն, այլ կազմակերպություններ, ամեն ինչ անում են, որ Եգիպտոսի հայերի դերը երկրի զարգացման մեջ ամբողջական ձևով ծանոթ լինի Եգիպտոսի ժողովրդին»,- ասաց եգիպտահայ վերլուծաբանը:

Նա անդրադարձավ նաև Հայոց ցեղասպանության ճանաչման մասին վերջին շրջանում արաբական մի շարք պետություններում սկիզբ առած խոսակցություններին. Այս առումով կարելի է ասել, որ որոշ կոնկրետ քայլեր են կատարվել, բայցևայնպես, հարցը մնում է այն, թե ի՞նչ կարելի է անել, որ հարցը դառնա քաղաքականության մի մաս և չմնա հայտարարությունների մակարդակում: Ի վերջո, Թուրքիայի և արաբական երկրների միջև կան նաև շահեր, կա տնտեսական մեծ գործակցություն, հետևաբար դժվար է ակնկալել, որ արաբական աշխարհը կճանաչի Հայոց ցեղասպանությունը, այդ հարցը կդնի նժարի վրա:

«Առայժմ կարելի է միայն նկատել Էրդողանին ուղղված քննադատություններ, Ցեղասպանության հարցի մասին որոշ ակնարկներ, բայց, իմ կարծիքով, ամբողջությամբ դեռ չի հասունացել հարցի այնպիսի մակարդակ, որի պատճառով Թուրքիայի և արաբական իսլամական երկրների միջև բախումներ տեղի ունենան: Պետք է նկատի ունենալ նաև, որ Իսլամական համաժողովը շատ հաճախ այս հարցին նայում է իսլամ դավանողների  և քրիստոնյաների միջև գոյություն ունեցող հարց, ուստի հնարավոր չէ, որ Հայոց ցեղասպանության նկատմամբ կեցվածքն արագ փոխվի»,- ասաց Թովմաս Գորգիսյանը` ավելացնելով նաև, որ Էրդողանի հասցեին հնչող Եգիպտոսի պաշտոնյաների քննադատություններն էլ արդեն սովորական են դարձել, որովհետև Եգիպտոսի համար Էրդողանի վարած քաղաքականությունը «Մուսուլման եղբայրներ» կազմակերպության հանդեպ հստակ է և շատ հաճախ է քննադատության ենթարկվում: