Հանե՛ք ձեր միջից բոլոր վախերը, մի խոսքով՝ «աղջի´կ ջան, ուշքի արի». Նաիրա Զոհրաբյան

ՀՀ ԱԺ «Բարգավաճ Հայաստան» խմբակցության անդամ Նաիրա Զոհրաբյանի կարծիքով՝ կինը պետք է լինի այնտեղ, որտեղ իրեն հարմար է զգում, որտեղ ինքը կարող է իրապես ռեալիզացնել իր ողջ պոտենցիալը մեր իրականության մեջ:

Ըստ պատգամավորի՝ մենք այսօր ունենք մեծաթիվ կանայք, որոնք լրջագույն ներքին խնդիրներ ունեն,  չհաղթահարված խնդիրներ ու դա հենց դրանից է, որ չգիտեն՝ որտեղ պետք է լինեն իրենք:

Զոհրաբյանն ասում է՝ անընդհատ ներքին փնտրտուքի մեջ են, և իրենք չեն կարողանում հաղթահարել իրենց կոմպլեքսները, ներքին վախերը:

«Ես դրա համար ասում եմ, որ պետք է կարողանալ հաղթահարել երեք «չ»: Առաջին «չ»՝ չվախենալ, երկրորդ «չ»՝ չնախանձել, երրորդ «չ»՝ չափսոսել: Անընդհատ չքչփորել անցյալը, անցյալից այսօր բերել միայն լավ մարդկանց մասին հիշողությունները և լավ էմոցիաներն ու լավ էներգետիկան: Երեկ ես մի գրքի շնորհանդեսի էի, Ռեյչլի գիրքն էր, որը կոչվում էր «Աղջի´կ ջան, ուշքի´ արի»: Ամեն կին ինչ-որ մի պահի իրեն պետք է ասի՝ աղջի´կ ջան, ուշքի´ արի, որովհետև դու ուժեղ ես, որովհետև դու կարող ես:  Ես այդ նախադասությունը՝ աղջի´կ ջան, ուշքի´ արի, ինձ ասել եմ 17 տարեկանում և դրա համար ես կարող եմ ասել, որ կարողացել եմ իմ ամբողջ պոտենցիալը թե՛ որպես կին քաղաքականության մեջ, թե՛ որպես մայր ընտանիքում, ռեալիզացնել, և եթե հիմա դուք ինձ հարցնեք՝ ես երջանի՞կ մարդ եմ, երջանի՞կ կին եմ, ես միանշանակ կպատասխանեմ՝ այո՛»,- նշեց Զոհրաբյանը:

Թե որն է պատճառը, որ կանայք շատ չեն ներգրավվում քաղաքական ու հասարակական ակտիվ կյանքում, պատգամավորը կարծում է՝ մեր իրականությունն է: Նրա խոսքերով՝ հայ իրականության մեջ քաղաքականությունն ընկալվում է որպես տղամարդու գործ:

«Երբ փողոցում ինձ շատ մարդիկ մոտենում և ասում են՝ «ապրե՛ս, դու ամենատղամարդ պատգամավորն ես այդ հարյուր երեսուն քանի տղամարդու մեջ», իրենց թվում է, թե իրենք ինձ ամենամեծ կոմպլիմենտն արեցին: Դրա համար եմ ասում, որ շատերն ընկալում են քաղաքականությունը այսպես տղամարդու գործ,  և դա իրենց կոմպլեքսավորում է: Ես կարծում եմ, որ 21-րդ դար է փափուկ ուժի դար է, և երբ մենք նայում ենք այն խորհրդարանները որտեղ շատ ավելի մեծաթիվ են կանայք, այդ խորհրդարաններում ընդունված օրենքները շատ ավելի մարդակենտրոն են, որովհետև քաղաքականությամբ, իմ կարծիքով, զբաղվելով կանայք շատ ավելի ճիշտ են կարողանում գտնել այն քաղաքական և տնտեսական օրակարգը, որը սպասարկում է տվյալ երկրի շահը»,- ասաց պատգամավորը:

Նաիրա Զոհրաբյանը կանանց հորդորում է՝ երբեք չվախենալ իրենց առաջ մեծ երազանքներ դնելուց: Իր փորձից է դա ասում: Նրա խոսքերով՝ միշտ իր առջև դրել է առաջին հայացքից կողքինի համար անհնարին թվացող խնդիր: Պատգամավորը Կոկո Շանելի խոսքն է մտաբերում՝ «եթե ուզում ես հասնել անհնարինին, դու պետք է անես անհնարինը»:

«Ես միշտ դրել եմ իմ առջև առաջին հայացքից անհնարին թվացող խնդիր, երբ կողքից ասել են ո´չ, դա հնարավոր չէ, բայց ես գնացել եմ, այդ խնդիրը լուծել: Ես կոչ եմ անում բոլոր կանանց՝ հանե´ք ձեր միջից բոլոր վախերը, ձեր ներքին կաշկանդումները: Մի խոսքով՝ աղջի´կ ջան, ուշքի´ արի»,- ընդգծեց «Բարգավաճ Հայաստան» խմբակցության անդամը: