«Գյումրին առանց տնակների» հիմնադրամում լարված իրավիճակ է

«Գյումրին առանց տնակների» հիմնադրամի տնօրեն Մհեր Խաչատրյանն այսօր դարձյալ խոսել է հիմնադրամում ստեղծված իրավիճակի ու իր գնահատմամբ` կատարված ենթադրյալ չարաշահումների մասին:

Հիշեցնենք, որ Մհեր Խաչատրյանը չարաշահումներ թույլ տալու մեջ մեղադրեց նախկին տնօրեն Ղարիբ Հարությունյանին: Իր այս հայտարարությունից հետո հիմնադրամի հոգաբարձուների խորհուրդն անցկացրել է ներքին աուդիտ, որի արդյունքների մասին հայտարարություն էր տարածել, ըստ որի՝ հիմնադրամի նախկին տնօրենը գործունեության ընթացքում որևէ չարաշահում թույլ չի տվել: Իսկ ներկայիս տնօրենն էլ հայտարարում է, որ ներքին աուդիտը պաշտոնական, իրավական որևէ բնույթ չի կրում ու այն պաշտոնական հայտարարություն տարածելու հիմք չի կարող լինել:

«Գյումրին առանց տնակների» հիմնադրամի գործադիր տնօրեն Մհեր Խաչատրյանը 1 ամիս առաջ էր խոստացել փաստարկներ բերել հիմնադրամի նախկին տնօրեն Ղարիբ Հարությունյանի կատարած ենթադրյալ չարաշահումների մասին: Բայց հիմնադրամի հոգաբարձուների խորհուրդն արգելել էր որևէ հայտարարություն անել մինչև արտաքին աուդիտի ավարտը:

Սակայն, խորհուրդը, կատարած ներքին աուդիտի արդյունքները հիմք ընդունելով, որոշում է կայացրել: Այնուամենայնիվ, արտաքին աուդիտ լինելու է, արդյունքները հայտնի կդառնան մարտի 25-ին:

Մինչ այդ, Մհեր Խաչատրյանն իր փաստարկներն է բերում ենթադրյալ չարաշահումների մասին: Դրանցից մեկը բնակարանի առուվաճառքից ավելացած 190.000 դրամի ծախսերի մասին փաստաթղթերի բացակայությունն է: Թե որտեղ է ծախսվել այդ գումարը, հիմնադրամում պատասխանել են, որ տրամադրվել է բնակարանատիրոջը, որ տանիքը վերանորոգի: Ու սա միայն բանավոր զանգով են ճշտել:

Ըստ Մհեր Խաչատրյանի` դա հաշվապահություն ունեցող կառույցի աշխատաոճ չի: Հաջորդ փաստարկներն էլ հետևյալն էին, որ 1 ու կես ամիս նախկին տնօրենը օգնական չի ունեցել, բայց փաստաթղթերով 100.000 դրամ աշխատավարձ է վճարել: Բնակարանի առուվաճառքից ավելացած ավելի քան 2 մլն դրամը Ղարիբ Հարությունյանը հիմնադրամին վերադարձրել է 5 ամիս անց ու այն ժամանակ, երբ արդեն տնօրեն չէր:

Մհեր Խաչատրյանը մեկ այլ ուշագրավ հայտարարություն էլ արեց` ասելով, որ «Գյումրին առանց տնակների» հիմնադրամը քաղաքացիներին սոցիալական բնակարաններ է բաշխել, բայց մինչ այժմ 29 բնակարանների սեփականատերը հիմնադրամը չէ, ինչը կանոնադրությունն է պահանջում:

Ըստ Մհեր Խաչատրյանի` ինքն այս գործերը կհանձնի իրավապահ մարմիններին, որ նրանք պարզեն, թե որտեղ են հիմնադրամի տրամադրած բնակարանները: Մհեր Խաչատրյանը վիճարկում է նաև նախկին տնօրենի անգործությունը:

Նա չի հասցրել բնակարանի առուվաճառքի նոտարական պայմանագիրը 30 օրում կադաստր ներկայացնել, որպեսզի սեփականության վկայական ստանա: Վկայական չի տրամադրվել, գործն էլ դատարան է հասել:

Մհեր Խաչատրյանի խոսքերով՝ հիմնադրամը իրավունք չունի այսկերպ տնօրինել 300 քաղաքացիների գումարները, ովքեր ամեն ամիս հիմնադրամին իրենց աշխատավարձի մինչև 1 տոկոսն են փոխանցում որպես նվիրատվություն, ինչը ամսական մոտ 900.000 դրամ է կազմում: Իսկ հիմնադրամն իր գործունեության 3 տարիների ընթացքում ոչ մի անգամ հաշվետվություն չի ներկայացրել այդ գումարների տնօրինման մասին:

Մհեր Խաչատրյանը 8 ամսվա տնօրեն է, բայց փաստաթղթերի ընդունում-հանձնում նախկինի հետ չի արել՝ պատճառաբանելով, որ դրանք թերի են եղել: Մհեր Խաչատրյանի խոսքերով՝ ենթադրյալ չարաշահումների մասին բարձրաձայնումներից հետո իր հասցեին տարբեր մեղադրանքներ են հնչում, նաև այն, որ ինքը գործում է Գյումրու քաղաքապետ Սամվել Բալասանյանի ցուցումներով, ինչը տնօրենը բացառում է: Մհեր Խաչատրյանը նաև հավաստեց, որ 400 քաղաքացիներից արդեն ստացել է բողոքներ 90-ականներից մինչ վերջին տարիներին բնակբաշխման գործընթացում տեղի ունեցած ենթադրյալ անօրինականությունների մասին: