Սկրիպալների գործը թունավորումից 1 տարի անց

2018թ. մարտի 4: Բրիտանական Սոլսբերի քաղաքի կենտրոնում ուշագնաց վիճակում հայտնաբերվեցին ռուսական Գլխավոր հետախուզական վարչության նախկին սպա Սերգեյ Սկրիպալը և նրա դուստր Յուլյան: Այս միջադեպը և դրան առնչվող բոլոր մանրամասներն ամիսներ շարունակ միջազգային բոլոր լրատվամիջոցների առաջին էջերում էին: Սկրիպալներին թունավորել էին ռուսական «Նովիչոկ» նյարդապարալիտիկ նյութով:

Յուլյա Սկրիպալը հիվանդանոցից դուրս էր գրվել ապրիլին, նրա հայրը՝ մայիսին: Սկրիպալների առողջական վիճակի մասին ոչինչ չի հաղորդվում: Այս տարվա փետրվարին Times պարբերականն, իր աղբյուրներին հղում անելով, հաղորդել էր, որ Սկրիպալների վիճակը վատթարացել է: Բրիտանական իշխանությունները հրաժարվել էին որևէ մեկնաբանություն տալ, սակայն հաղորդել էին, որ Սկրիպալները ողջ են և գտնվում են հատուկ ծառայությունների պաշտպանության տակ:

Այնուհետև «Նովիչոկ»-ի ազդեցությանն էր ենթարկվել Սկրիպալների տունը խուզարկող ոստիկան Նիկ Բեյլին: Բեյլին Սկրիպալների տուն է մտել մարտի 4-ի երեկոյան, հոսպիտալացվել՝ մարտի 6-ին: Ոստիկանին փրկել է այն, որ բնակարան մտնելուց առաջ նա հագել է հատուկ հագուստ և ձեռնոցներ: BBC-ին տված հարցազրույցում Նիկ Բեյլին հայտնել է, որ ֆիզիկապես բավականին արագ է վերականգնվել, սակայն հոգեբանական վերականգնումը շատ ավելի երկար է տևել:

Հունիսի վերջին Սոլսբերիից 80 կմ հեռավորության վրա գտնվող Էյմսբերի քաղաքում «Նովիչոկ»-ից թունավորվել էին Չարլի Ռոուլին և նրա ընկերուհի Դոն Ստերջեսը: Վերջինս մահացել էր:

Ռոուլին և Ստերջեսը թունավորվել էին օծանելիքի սրվակից, որով նյարդապարալիտիկ նյութը, ամենայն հավանականությամբ, տեղափոխվել էր Բրիտանիա:

BBC-ին տված հարցազրույցում բրիտանական ոստիկանության՝ ահաբեկչության դեմ պայքարի բաժանմունքի ղեկավար Դին Հեյդոնը ներկայացրել է այդ սրվակի կրկնօրինակը: Ըստ Հեյդոնի՝ սրվակում գտնվող նյութը կարող էր հազարավոր մարդկանց մահվան պատճառ դառնալ:

BBC-ն նաև ներկայացրել է տեսանյութ, որը մինչ այդ հանրությանը չէր ներկայացվում: Տեսանյութում երևում են ՌԴ քաղաքացիներ Ալեքսանդր Պետրովը և Ռուսլան Բոշիրովը, որոնց Մեծ Բրիտանիան մեղադրում է հարձակման մեջ: Ըստ բրիտանական կողմի՝ նրանք Գլխավոր հետախուզական վարչության սպաներ Ալեքսանդր Միշկինն ու Անատոլի Չեպիգան են:

Ի դեպ, թունավորումից մահացած բրիտանուհու՝ Դոն Ստերջեսի 20-ամյա որդին հարցազրույց է տվել բրիտանական Mirror պարբերականին և պատմել այն մասին, որ նամակ է ուղարկել ՌԴ նախագահ Վլադիմիր Պուտինին՝ խնդրելով նրան այս գործի կասկածյալներին փոխանցել բրիտանական հատուկ ծառայություններին:

«Ցավը երբեք չի լքում ինձ և իմ ընտանիքը: Բրիտանական ոստիկանությունը հավատացած է, որ մորս մահվան համար պատասխանատու է Ռուսաստանի 2 քաղաքացի, բայց նրանց, կարծես, պաշտպանում է ձեր պետությունը: Ես խնդրում եմ Ձեզ թույլ տալ, որպեսզի մեր սպաները հարցաքննեն այս մարդկանց՝ մորս մահվան առնչությամբ»,- մասնավորապես նշված է նամակում:

Ռուսաստանը շարունակում է հերքել Սկրիպալների գործում ռուսական ներգրավվածության մասին Բրիտանիայի մեղադրանքները, որոնք ուղեկցվել են նաև դիվանագիտական հարաբերությունների խզմամբ և Մոսկվայի հանդեպ նոր պատժամիջոցներով: Ավելին, ՌԴ ԱԳՆ պաշտոնական ներկայացուցիչ Մարիա Զախարովան Комсомольская Правда-ին տված հարցազրույցում ասել է, որ Ռուսաստանն իր սեփական հետաքննությունն է վարում:

«Կան ողբերգություններ, կա տրագիկոմեդիա: Սա տրագիկոմեդիայի 1-ամյակն է: Մենք այդպես էլ չգիտենք, թե ինչ է կատարվել Սկրիպալների հետ: Մենք մեկ-երկու անգամ տեսախցիկով տեսել ենք Յուլյա Սկրիպալին: Սկրիպալին ոչ ոք չի տեսել… Մենք չենք կարողանում պարզ հարցերի պատասխան ստանալ… Մենք մեր սեփական հետաքննությունն ենք վարում: Այդ մասին չպետք է մոռանալ: Եթե ինչ-որ մեկը Արևմուտքում, Մեծ Բրիտանիայում, Վաշինգտոնում կամ Բրյուսելում մտածում է, որ Ռուսաստանն այս թեմայի շուրջ դադարեցրել է գործողությունները, նա չարաչար սխալվում են: Կարծում եմ՝ այս գործը կհասցվի իր տրամաբանական ավարտին: Մեղադրանքները շատ խիստ են եղել, հետևանքները՝ շատ լուրջ, որպեսզի ամեն ինչ անտեսենք և թերթենք էջը», – նշել է Զախարովան:

Սկրիպալների թունավորման 1-ամյակի առթիվ Մոսկվայի պետական համալսարանի քաղաքագիտության ֆակուլտետում «Սկրիպալյան ընթերցումներ» խորագրով գիտաժողով կանցկացվի: Ընթերցումների մասնակիցները կքննարկեն տեղեկատվական պատերազմի տեխնոլոգիաները: Ի դեպ, տեղեկություն էր տարածվել, թե գիտաժողովին մասնակցելու են նաև Ալեքսանդր Պետրովն ու Ռուսլան Բոշիրովը, սակայն համալսարանը հերքեց այդ լուրը՝ այն անվանելով կատակ: