Մենք խոսում ենք քաղաքացիության հարցի մասին, ոչ թե հաշվառումից հանվելու. Սամվել Բաբայանը՝ ոստիկանության պարզաբանման մասին

Արցախի պաշտպանության նախկին նախարար, Արցախի հերոս Սամվել Բաբայանն արձագանքել է Արցախի ոստիկանության պարզաբանմանը՝ իրեն քաղաքացիությունից զրկելու մասին: Նա ընդգծել է՝ հաշվառումն ու քաղաքացիությունը տարբեր բաներ են: Բաբայանը սպասում է գրավոր պատասխանի, որից հետո կորոշի՝ դիմե՞լ դատարան, թե՞ ոչ:

«Մենք խոսում ենք հաշվառումից հանվելու մասին, ցանկացած քաղաքացի կարող է հաշվառումից հանվել, ես 2007 թ. հանվել եմ հաշվառումից, գրանցումս տեղափոխել եմ Երևան: Մենք խոսում ենք քաղաքացիության հարցի մասին, ոչ թե հաշվառումից հանվելու, այսինքն՝ տարբեր բաներից ենք խոսում. քաղաքացիությունից զրկելը մի բան է, իսկ թե որտեղ է անձը հաշվառված, դա նրա իրավունքն է: Բացի դրանից՝ անձը կարող է ցանկացած տեղում հաշվառված լինել՝ նրա համար, որ նամակ է ստանում, թուղթ է ստանում, բայց քաղաքացի լինելը դրա հետ որևէ կապ չունի»,- ասաց նա:

Բաբայանը նշեց՝ ինքը հաշվառման վայրն է փոխել, սակայն իրեն հետաքրքրում է՝ այդ դեպքում ի՞նչ տասը տարվա թուղթ են պահանջում, ինչի՞ մասին է խոսքը: Նա ընդգծեց՝ ինքը հաշվառված է Հայաստանի Հանրապետությունում, բայց Արցախի քաղաքացի է, գալիս է Արցախ, գնում:

«Գիրք կա՞, ժուռնալ կա՞, որ պիտի ամեն մտնելով ստորագրեի այդ թուղթը: Իհարկե, չկա, Հայաստանի Հանրապետություն է, իր տարածքում որտեղ կուզեմ, կգրանցվեմ, իրենց Սահմանադրությունում կա՞ որևէ կետ, թե անձը որտեղ պիտի գրանցված լինի, որ լինի քաղաքացի: Չկա՛: Եթե կապ ունենար՝ հաշվառումը որտեղ է, այլ հարց է, գուցե խոսեինք դրա մասին, բայց քանի որ նման կետ գոյություն չունի նրանց համար, ովքեր ցանկություն ունեն նախագահ դառնալ, ապա այդ ամբողջը կոչվում է դեմագոգիա, պարզ դեմագոգիա: Կարող եմ մի հաշվառումից դուրս գալ, 7 օրվա մեջ պարտավոր են գրանցել, դա նրանց շահերից է բխում, պետության շահերից, որ տեղն իմանան՝ որտեղ ես գրանցված, եթե մի թուղթ է գալիս, կամ ուզում են հետդ մի հարց լուծել կամ ինչ-որ բան, տեղդ իմանան՝ դու որտեղ ես, քո բնակավայրը որտեղ է: Մենք բնակավայրի հարց չենք լուծում, խոսում ենք այն մասին, թե անձնագրով այս մարդը քաղաքացի՞ է, թե՞ ոչ, ինչի՞ մասին է խոսքը, գրանցման մասին է, թե որտեղի քաղաքացի եմ»,- ասաց Բաբայանը:

Հարցին՝ արդյո՞ք դիմելու են դատական ատյաններ, Բաբայանը պատասխանեց, որ նման խնդիր չի տեսնում, որովհետև եթե ընդունում են, որ միայն գրանցման հարց է, որ ինքը տեղափոխվել է պարզապես, Արցախի քաղաքացի է, որևէ հարց չկա, իրեն պիտի գրանցեն ու վերջ, իսկ եթե Արցախի քաղաքացի չէ, դրա մասին բարձրաձայն պիտի ասեն իրեն, ու իրենք դատի տան, վիճարկեն իրեն քաղաքացիությունից զրկելու որոշումը, օրենքով ստանան դատարանի վճիռը:

«Հարց եմ տալիս՝ ես Արցախի քաղաքացի՞ եմ, թե՞ ոչ, եթե այո, ես իրավունք ունեմ մասնակցել ընտրություններին, ինչ վերաբերում է հարցին՝ ես վերջին 10 տարում բացակայե՞լ եմ, թե՞ չէ: Ես ունեմ իմ բնակավայրը Ստեփանակերտում, տունը, հասցեն կա, պարզ է, այնտեղ էլեկտրականության, ջրի, գազի գումարները մուծված են, ապրել ենք, եկել-գնացել ենք, դա ոչ մեկին պիտի չբացատրեմ: Եթե ժուռնալ կա, որ պիտի դրա մեջ ստորագրեինք ամեն գնալ-գալով, ուրիշ բան, թող բերեն, ցույց տան էդ ժուռնալը, ծիծաղելի բաներ են ասում, կամ էլ էլեկտրոնային բազան է ոչ ճիշտ ձևակերպված: Ես ինձ Ղարաբաղի քաղաքացի եմ համարում և իրավունք ունեմ մասնակցելու ընտրություններին»,- նշեց նա: