«Հյուսիս-հարավ» արագընթաց մայրուղու Շիրակի մարզի հատվածի վերջնական նախագիծը դեռ պատրաստ չէ

«Հյուսիս-հարավ» արագընթաց մայրուղու Շիրակի մարզի հատվածի վերջնական նախագիծը պատրաստ չէ: Սա ավելի շատ հետաքրքրում է այն գյուղերի բնակիչներին, որտեղով անցնելու է մայրուղին: Հենց այդ նախագծի հստակեցումից է կախված, թե գյուղերում ինչքան վարելահող է գերակա շահ ճանաչվելու:

Օտարումը Ազատան գյուղում անցած տարվանից է սկսվել. շուրջ 3 հեկտար գյուղատնտեսական նշանակության հող գերակա շահ է ճանաչվել ու գործընթացը դադարեցվել է:  Սպասում են վերջնական նախագծի հաստատմանը, որից հետո միայն պարզ է դառնալու, թե գյուղի վարելահողերի ինչքան մասն է մայրուղու տակ մնալու: Թե երբ է արագընթաց մայրուղու շինարարությունը հասնելու Ազատան, ժամկետն անորոշ է:

Ամենալավ սևահողերը Շիրակի մարզում Ազատան գյուղում են, որոնք ամենաբարձր բերքատվությունն են ապահովում: Այստեղ ամենաշատ հացահատիկն ու կարտոֆիլն է մշակվում: «Հյուսիս-հարավ» արագընթաց մայրուղու սկզբնական նախագիծը գրեթե շրջանցում էր Ազատանի սևահողերի գոտին ու  ճանապարհը, այդ նախագծով հասնում էր  մինչև Գյումրի: Բայց հետո որոշում է կայացվել նախագիծը փոխելու մասին:

Նոր նախագծի առաջարկներն են ներկայացվել ու կրկին նախնական տարբերակն է հայտնի, համաձայն որի` մայրուղին անցնելու է ոչ միայն Ազատանի, այլև հարևան գյուղերի վարելահողերով: Մինչ վերջնական նախագիծ ունենալը անցած տարի գերակա շահ ճանաչվեցին Ազատանի այն հողերը, որոնք մայրուղու շինարարության ընթացքում անհնար է շրջանցել: Խոսքը մոտ 3 հեկտար սեփական ու համայնքային նշանակության հողերի մասին է:

Վերջնական նախագիծ չկա, ժամկենտներն էլ են անորոշ, թե երբ շինաշխատանքները Ազատան կհասնեն: Ներկայումս հողատերերը չեն կողմնորոշվում` ցանե՞լ, թե՞ անմշակ թողնել հողերը: Դրանց նկատմամբ սեփականության իրավունքից զրկվել են, բայց չեն էլ արգելել հողը մշակել մինչև շինաշխատանքների մեկնարկը: Եթե նախագծի փոփոխության առաջարկներն ընդունվեն, Ազատանի տարածքում էլի մշակովի հողակտորներ են օտարվելու: Խոսքը Ազատանից Արևիկ գյուղ տանող ճանապարհին գտնվող հողերի մասին է: Դրանց մի մասի համար 2 տարի առաջ են գյուղացիների հետ պայմանագիր կնքել: Նախագծային փոփոխությունների վերաբերյալ պարբերաբար քննարկումներ են եղել,  որոնց նաև գյուղապետերն են մասնակցել: Ազատանի գյուղապետն է նշում` այդ քննարկումներն իրենց հետաքրքրող հարցերի պատասխանները չեն տվել:

«Բոլոր քննարկումները բնապահպանական են եղել: Դրանք մեզ հետաքրքրել են, բայց ավելի քիչ, քան ծրագրի շինարարական կողմը: Մեզ հետաքրքիր է, թե ինչ հատվածներով է անցնելու արագընթաց մայրուղին: Հետաքրքիր է, որ հնարավորինս քիչ վարելահողերից զրկվենք: «Հյուսիս- հարավ» ճանապարհային միջանցքի շինարարական աշխատանքները Ազատան գյուղի վարչական տարածք մոտ 400 մետր են մտել: Հողային աշխատանքներ են կատարվել , իսկ շարունակությունը դեռ պարզ չէ: Մենք չգիտենք` շարունակվելո՞ւ են աշխատանքները, թե՞ ոչ: Պետք է հողերը օտարվեն, գյուղացիների հետ պայմանագրեր կնքվեն, փոխհատուցում տրամադրվի: Իսկ, դա, իմ կարծիքով, մոտ մեկ տարի կտևի»,- SHANTNEWS.am-ի հետ զրույցում ասել է Ազատանի գյուղապետ Վարդան Իկիլիկյանը:

Ազատանի և հարևան գյուղերի տարածքում ընդամենը հողային աշխատանքներ են կատարվել: Ի վերջո, թե ինչ տարածք է Շիրակի մարզում ընդգրկելու «Հյուսիս-հարավ»-ը, դեռ պարզ չէ: Համենայն դեպս, գյուղապետերը վերջնական նախագծի հաստատման վերաբերյալ տեղեկություններ չունեն: