Շիրակի մարզն անցնում է համընդհանուր ներառականության

Հայաստանն անցնում է համընդհանուր ներառականության:  Սա նշանակում է, որ աստիճանաբար բոլոր դպրոցները պետք է ներառական կրթություն իրականացնեն: 2014 թվականից ժամանակացույց է կազմվել, համաձայն որի՝ համընդհանուր ներառականությունը հասնում է մարզեր: Այդ ժամանակացույցով 2019 թվականին հերթը Շիրակի և Արագածոտնի մարզերինն է: Սա նշանակում է, որ հատուկ դպրոցները վերակազմավորվելու են: Այս մասին այսօր Գյումրիում տեղի ունեցած համաժողովի ընթացքում նշել է ՀՀ ԿԳ նախարարի տեղակալ Լուսինե Առաքելյանը:

«Հերթը Շիրակի և Արագածոտնի մարզերինն է: Արդեն սեպտեմբերին հատուկ դպրոցները վերակազմավորվելու են: Շիրակի մարզում սա վերաբերում է երկու հատուկ դպրոցի: Դրանք դառնալու են աջակցման կենտրոններ: Պետք է օգնենք, որ հաշմանդամություն ունեցող երեխաները տեղափոխվեն հանրակրթական դպրոցներ»,- ասել է Լուսինե Առաքելյանը:

Սեպտեմբերի 1-ից Շիրակի մարզի բոլոր դպրոցները պետք է ընդունեն հաշմանդամություն ունեցող աշակերտներին: Իսկ մինչ այդ, «Հայկական Կարիտաս» բարեգործական հասարակական կազմակերպությունն է մարզի 7 համայնքներում ու 12 դպրոցներում ուսումնասիրություններ կատարել, որի շնորհիվ հայտնաբերել են հաշմանդամություն ունեցող 13 երեխաների, որոնք կրթությունից դուրս են մնացել: Ավելի շատ են այն երեխաները,  որոնք գրանցված են դպրոցներում,  բայց կրթություն չեն ստանում կամ ստանում են մասնակի: Այդ ուսումնասիրությունների արդյունքները և իրականացված աշխատանքներն այսօր ներկայացվել են ծրագրի հաշվետու համաժողովի ընթացքում: Բանախոսները խոսել են այն ձեռքբերումներից և թերություններից, որ արձանագրել են ներառական կրթական համակարգում:

«Ներառական կրթության մեջ ընդգրկված երեխաների հասանելիք գումարները մեծ են և իրապես ունեցանք խնդիր նաև Շիրակի մարզում: Թույլ կարիքներ ունեցող երեխաները ներգրավվեցին զուտ այն պատճառով, որ դպրոցին գումար ապահովվի, կամ որ ծնողը սննդի ու ճանապարհածախսի գումար ստանա, և դա դարձավ համընդհանուր: 2018-ին ավելի խիստ մոտեցում ցուցաբերեցինք, սկսեցինք պայքար արհեստական ներառականության դեմ և արհեստական ներառված երեխաների թիվը 50 տոկոսով կրճատվեց», – ասել է ՀՀ ԱԺ պատգամավոր Սոֆյա Հովսեփյանը:

Համաժողովին ներկա է գտնվել նաև ՀՀ-ում ԵՄ դեսպան Պյոտր Սվիտալսկին: Նա նշել է, որ ԵՄ-ն պատրաստ է աջակցել Հայաստանին համընդհանուր ներառականության անցման գործում:

«Կրթությունը խիստ կարևոր և վճռական է երկրի զարգացման համար: Հայաստանը հիմա մի իրավիճակում է,  երբ փորձում է լուրջ բարեփոխումներ իրականացնել կրթության ոլորտում:  Մենք պատրաստ ենք աջակցել այս գործընթացին: Շուտով Բրյուսելի բարձրաստիճան պաշտոնյաների մասնակցությամբ մենք քաղաքական երկխոսություն ենք սկսելու Հայաստանի կրթության պատասխանատուների հետ»,- ասել է Պյոտր Սվիտալսկին:

Այժմ Շիրակի մարզում 24 դպրոց է ներառական կրթություն իրականացնում, իսկ այս համակարգում ընդգրկված երեխաների թիվը մարզում 1300-ն է: Առաջիկայում նախատեսվում է երեխաների ներառական համակարգում ընդգրկելու գնահատման նոր համակարգի անցնել: