Շիրակի մարզում աճել են կոռուպցիոն հանցագործությունների բացահայտումները. մարզի դատախազի ամփոփիչ ասուլիսը

Ինչպիսին է եղել Շիրակի մարզում հանցավոր դեպքերի վիճակագրությունը: Մարզի դատախազ Կարեն Գաբրիելյանը տվյալներն է ամփոփել հրավիրած մամուլի ասուլիսում: 2018 թվականին մարզում 26 դեպքով կամ 2 տոկոսով պակասել են հանցագործությունները, նաև սպանության դեպքերը: Արձանագրվել է կոռուպցիոն բնույթի հանցագործությունների բացահայտման աճ: 2017 թվականին մարզում 43 նման գործ է հարուցված եղել, 2018-ին դրանց թիվը հասել է 138-ի: Տարբեր կոռուպցիոն չարաշահումների հետևանքով վնասի չափը կազմել է 48 մլն 600 հազար դրամ, որից ավելի քան 46 մլն-ը վերականգնվել է: Կոռուպցիոն հանցագործությունների մասով քննությունները, ըստ դատախազի, հիմա էլ շարունակվում են մարզի դպրոցներում, մարզադպրոցներում, համայնքապետարաններում, սոցծառայություններում ու այլ հաստատություններում:

Շիրակի մարզում մտահոգիչ չափերի են հասել բնակարանային գողությունները: 2017-ին արձանագրվել է 71 դեպք, 2018-ին այդ թիվը հասել է 91-ի: Հանցագործների թիրախում են Գյումրիի, Մարալիկի, Արթիկի բնակարանները ու հիմնականում ունևոր անձինք, ասել է դատախազը:

Դատախազը նաև համոզված է, որ գողերը խմբակային են գործում, բոլորի ձեռագիրն էլ նույնն է. թիրախավորված են հիմնականում փակ բնակարանները, հանցագործները նույնիսկ 1 օրով տնից բացակայող ընտանիքի տուն են մտել, ու նաև շատ լավ տեղեկացված են, թե բնակարանի որ հատվածում է պահված ընտանիքի ոսկեղենը կամ դրամը: Խմբակային գործի հեղինակները, ըստ դատախազի, համաներմամբ ազատվածները չեն, քանի որ համաներումից հետո կատարված գողության դեպք չկա: Նմանատիպ գողությունների բացահայտման ցուցանիշը ցածր է՝ ընդամենը 22 տոկոս, փոխարենը բարձր է կոռուպցիոն հանցագործությունների բացահայտումները:

Չարաշահումների վերաբերյալ քրգործեր հարուցվել են ոչ միայն դպրոցներում, այլև բուհերում, սոցծառայություններում, առողջապահական հաստատություններում: Ամենածավալուն քրգործը, որը հատորյակներով է, Շիրակի պետական համալսարանում է:

27 հատորյակ՝ ամեն մեկը 300-400 էջանոց, քննության է առնվում մեկ վարույթում: Չարաշահումների վերաբերյալ քրգործերի ուսումնասիրությունը շարունակվում է նաև Գյումրիում իրականացված բնակբաշխման գործընթացում: Ըստ դատախազի՝ իրենք դեռ չեն հայտնաբերել 1 հասցեից մի քանի բնակարան ստացած ընտանիքների, բայց հաստատել են, որ քանդման ակտեր ունեցող 7-8 տնակ, փաստացի, կա:

Մարզում տարածված մեկ այլ հանցագործության մասով ևս կան գործեր հարուցված, դրանք առնչվում են որոշ հյուրանոցներում պոռնկությամբ զբաղվելու դեպքերին: Ըստ դատախազի՝ հիմնականում այս գործով դատվել են հյուրանոցի հավաքարարը, մատուցողուհին, իսկ տնօրենն ու սեփականատերը միշտ խուսափել են պատասխանատվությունից: Այնինչ, հենց նրանք են այս գործում հիմնական դերակատարները: Մարզում 2 նման հյուրանոց արդեն փակվել է: Իսկ ընդհանուր առմամբ, հանցատեսակների մասով բացահայտումների աճը դատախազը պայմանավորել է բնակիչների՝ իրավապահներին վստահելու հանգամանքով: