2018-ի և 2019 թ. սկզբի տվյալներով՝ պետբյուջե է վերադարձվել 827 մլն դրամ. Դավիթ Սանասարյան

«Ես պատրաստ եմ, եթե նման ցանկություն ունի ԵՊՀ ռեկտորը, ես խրախուսում եմ իրեն, որ գնա, ինձ դատի տա»,- փետրվարի 15-ին լրագրողների հետ զրույցում նշեց ՀՀ պետական վերահսկողական ծառայության ղեկավար Դավիթ Սանասարյանը:

Նա հայտնեց, որ իրենք իրենց ընթացակարգերը չեն խախտել, իրենց գործունեությունը լիարժեք իրականացնում են:

«Ես այլևս չեմ ուզում մտնել այդ բանավեճի մեջ, խնդիրը իրավապահ մարմինների դաշտում է, իրենք ձեզ պատկերը կներկայացնեն»,- ասաց նա:

Բժշկական համալսարանում ուսումնասիրություններին անդրադառնալով՝ Սանասարյանը նշեց, որ այստեղ մեծ ծավալի մասին է խոսքը, նա խոսեց բյուջեից այս բուհին հատկացված գումարների մասին, ապա հիշեցրեց՝ Բժշկական համալսարանն ունի նաև կլինիկաներ, ուստի բավական մեծ ծավալի մասին է խոսքը: Ծառայության պետը նշեց, որ Բժշկական համալսարանի ուսումնասիրությունն, ամենայն հավանականությամբ, կավարտեն մարտի վերջին:

«Աջակցություն դատապարտյալներին» հիմնադրամում հայտնաբերված չարաշահումներին ու խնդիրներին անդրադառնալով՝ Սանասարյանը խոստացավ դրանց մասին խոսել ավելի ուշ.

«Երբ ես կներկայացնեմ վարչապետին, նրա հանձնարարականով նաև ձեզ կներկայացնեմ, կան լուրջ խնդիրներ, որոնց ուղղությամբ մենք մեր հստակ արձանագրումներն արել ենք»:

Սանասարյանը հայտնեց, որ ՏԻՄ-երի հետ կապված քրգործերը հարուցված են, իրենք ներկայացրել են իրենց տեղեկանքները, դրանք վերաբերում են Նոր Գեղի, Ազատամուտ, Անի համայնքներին, քրեական գործերին ընթացք է տրված, ուստի որևէ բան այդ մասին չի կարող ասել: Նա նաև հայտնեց, որ ծավալները տարբեր են:

Ջրային կոմիտեում կորուստների մասին նա չխոսեց, իսկ ՋՕ-երում կատարվողի մասին ասաց՝  այդ ընկերությունները գյուղացուց վերցրել են գումարները և պետբյուջե չեն փոխանցել:

«Իրենք արդեն գրել են խոստովանական, որ նման բան է եղել»,- ասաց նա:

ՊՎԾ պետն ասաց, որ իրենց աշխատակիցները գյուղ առ գյուղ, տուն առ տուն շրջում են, գյուղացիների հետ հանդիպում են, բացատրականներ, վկայություններ են վերցնում, ապա նշեց՝ այս ամենի արդյունքում գնալու են համակարգն առողջացնելու ճանապարհով: Սանասարյանն ասաց, որ այս տարի խնդիր են դրել՝ ջրային ոլորտը պետք է կարգավորեն, և դա անելու են առանց խոչընդոտների:

Հարցին՝ ուժային մարմիններում ևս կատարվելու են ուսումնասիրություններ, նա պատասխանեց, որ այդ մասին վարչապետի հետ պետք է խոսեն: Լրագրողները հետաքրքրվեցին՝ իսկ նախարարություններում ուսումնասիրություններ ինչո՞ւ չեն անում, Սանասարյանն ասաց.

«Այնպես չէ, որ որևէ տեղ լավ է եղել, դրա համար չենք գնացել, ծավալը շատ է, առաջնահերթությունների խնդիր կա, «Սերմերի գործակալություն»-ում ենք սկսել ուսումնասիրություն, «Երիտասարդական հիմնադրամը» ևս ուսումնասիրել ենք, ավարտել, այն ընթացքի մեջ է»:

Սանասարյանին հարցրին՝ ընդհանուր առմամբ որքա՞ն գումար է վերադարձվել պետբյուջե: Նա ասաց, որ 2018 -ի և 2019 թ. սկզբի տվյալներով՝ պետբյուջե է վերադարձվել 827 մլն դրամ, ինչը, նրա գնահատմամբ, բավական նորմալ արդյունք է նոր ստեղծված կառույցի համար:

«Գումար հետ բերելը մեր ֆունկցիան չէ, դա իրավապահների գործն է, մենք մեր ուշադրությունը դարձնում ենք կանխարգելելու վրա: Տեսնում ենք, որ օրենսդրական բաց կա, սխալ կարգավորում, վարչապետին ներկայացնում ենք առաջարկություն՝ այս կամ այն օրենսդրական բացի վերաբերյալ փոփոխություն իրականացնելու համար, գնումների ոլորտում լուրջ խնդիրները տեսնում ենք, հասկանում ենք՝ ինչից են գալիս դրանք, խնդիրները դիտավորյալ չեն, բայց օրենսդրական սխալ կարգավորումների հետևանք են»,- ասաց Սանասարյանը: