«9-րդ դասարանում երեխաներ կան, որոնք խոսքի մասերը մինչև հիմա չեն տարբերում». գյումրեցի ուսուցչուհի

Հիմնական դպրոցի շրջանավարտները՝  9-րդ դասարանցիներն այս տարի ավարտական քննություններից բացի հանձնելու են միասնական քննություն «Հայոց լեզու» առարկայից: Կրթության ու գիտության նախարարությունը նման առաջարկ էր արել 9-րդ և 12-րդ դասարանցիների համար: 12-րդում միասնական քննության պահանջը հանվեց և հիմա 9-րդ դասարանցիներն են պատրաստվում կենտրոնացված քննության: Այս որոշումը ուսուցիչներին ու աշակերտներին անակնկալի է բերել: Հարցաշարերում 6-9-րդ դասարանի նյութն է: Համոզված են, որ առանց լրացուցիչ պարապմունքների՝ աշակերտների մեծ մասը չի կարողանա բավարար գնահատական ստանալ, առավել ևս՝ պահպանել դպրոցում ստացած գնահատականը, որը շատ դեպքերում սուբյեկտիվ է:

Հոմանիշներ, հականիշներ, համանուններ… հայոց լեզվի 5-6-րդ դասարանի նյութը 9-րդ դասարանցիները նորից կրկնում են, վերհիշում,  ամրապնդում, շատերն էլ նոր սովորում:  9-րդցիների միասնական քննությունը թեստային աշխատանք է լինելու: Նախորդ տարիների փոխադրությունը թեստով է փոխարինվել, ինչը հնարավորություն է տալիս մեկ հարցաշարով քերականություն ու ուղղագրություն ստուգել:  Միասնական քննությունների պարտադրանքը 9-րդ դասարանում մանկավարժներին ստիպել է ռեալ գնահատել աշակերտների ուժերը: Հիմնական դպրոցի շրջանավարտների մեծ մասը ցածր դասարաններում չի սովորել, գիտելիքը հիմնավոր չէ, ըստ այդմ, քննական գնահատականները ցածր կլինեն:

«Մենք ունենք բավական շատ ներառական երեխաներ, որոնք հաստատ անցողիկ շեմը չեն հաղթահարի, ունենք թույլ ընդունակություններով երեխաներ, որոնք հաստատ անցողիկ շեմը չեն հաղթահարի: Ինձ թվում է նրանց համար պետք էր առանձին համակարգով քննությունները կազմակերպել: Բոլոր դասարաններում կան թույլ երեխաներ, որոնք հնարավոր է չկարողանան հաղթահարել, թե լարվածությունից, թե անգամ նոր միջավայրում գտնվելուց: Սրանք պատճառներ են թույլ երեխաների համար »,- SHANTNEWS.am-ին ասել է  Գյումրիի թիվ 25 հիմնական դպրոցի հայոց լեզվի և գրականության ուսուցչուհի Լորաննա Գրիգորյանը:

Դասարանի գերազանցիկներից արտագրելու կամ ուսուցչի օգնությամբ բավարար գնահատական ստանալու հավանականությունը միասնական քննության դեպքում կտրուկ նվազում է: Կրկնելու նյութն էլ բավական ծավալուն է: 9-րդցիները վերհիշում են հայոց լեզվի դասերը` սկսած 5-րդ դասարանից: Ծավալն ու չհասցնելու վախը լարվածություն են առաջացրել:

Իսկ ուսուցիչները հիմա մտածում են նաև իրենց հեղինակության մասին:  Ինչքան շատ տվյալ դասարանից բարձր գնահատական ստացողներ լինեն, այդքան բարձր է դպրոցի ու ուսուցչի հեղինակությունը և հակառակը:

«9-րդ դասարանում երեխաներ կան, որոնք ածականը, գոյականը, թվականը՝ խոսքի մասերը մինչև հիմա չեն տարբերում: Բնական է, որ նման երեխաների համար շատ դժվար է: Իսկ մեղավորը, ստացվում է, որ ես եմ՝ դասավանդող ուսուցիչը, որ ոչինչ չի սովորեցրել: Բայց նրանց կողքին կան գերազանց երեխաներ: Ուսուցիչը երկու դեպքում էլ նույնն է՝ ես եմ: Ես երեխաներին բոլորովին էլ չեմ վախեցնում միասնական քննությունով: Ասում եմ ինչ-որ գիտեք, դուխով արտահայտեք: Եթե արդյունքը վատը եղավ, ես եմ պատասխան տալու»,- SHANTNEWS.am-ին ասել է Գյումրիի թիվ 8 միջնակարգ դպրոցի հայոց լեզվի և գրականության ուսուցչուհի Գեղեցիկ Գասպարյանը:

Հանրապետությունում 32 հազար 9-րդ դասարանցի կա, որոնք քննություն են հանձնելու 250 քննական կենտրոններում: Այս թիվը նախնական է, ինչպես նաև նախնական է քննության օրը՝ Կրթության և գիտության նախարարության նախնական որոշմամբ քննությունը կանցկացվի մայիսի 22-ին: