Թուրքիայում ցնցված են, հայերը՝ ոգևորված. Մակրոնն ապրիլի 24-ը հռչակելու է իբրև Հայոց ցեղասպանության հիշատակի ազգային օր

Ֆրանսիայի հայկական կազմակերպությունները համակարգող խորհուրդը (CCAF) շնորհակալություն է հայտնում Ֆրանսիայի նախագահ Էմանուել Մակրոնին վերջին հայտարարության համար, ըստ որի՝ ապրիլի 24-ը Ֆրանսիայում հռչակվելու է իբրև Հայոց ցեղասպանության հիշատակի ազգային օր: Այս մասին գրված է CCAF-ի պաշտոնական կայքում:

Նշվում է, որ հանրապետական օրացույցում այս օրը ներառելը յուրօրինակ հարգանքի տուրք է Հայոց ցեղասպանության զոհերի հիշատակին: Ըստ հաղորդագրության՝ այն բանից հետո, երբ Ֆրանսիան ընդունեց մի օրենք, որով ճանաչեց Հայոց ցեղասպանությունը, ցույց տվեց, որ պայքարում է մարդկության դեմ իրագործված ոճրագործության, ինչպես նաև ժխտողականության բոլոր դրսևորումների դեմ:

«CCAF-ը դատապարտում է Թուրքիայի նախագահ մամուլի խոսնակ Իբրահիմ Քալընի երեկվա հայտարարությունը՝ ձգտելով հերքել եղելությունը, ինչպես նաև Ֆրանսիայի նախագահ Էմանուել Մակրոնի հայտարարությունը վերագրել «իր երկրում ծագած քաղաքական խնդիրներին»,- ասված է հաղորդագրության մեջ:

Նշենք, որ Մակրոնի ելույթին մանրամասն անդրադարձել էր SHANTNEWS.am-ը:

«Թուրքիայի նախագահ Ռեջեփ Թայիփ Էրդողանը մասնակցում էր Փարիզում կազմակերպված առաջին համաշխարհային պատերազմի ավարտի 100-ամյակին նվիրված միջոցառումներին: Հայերը ցնցված էին, ինչպե՞ս կարող է այդ միջոցառումներին մասնակցել Թուրքիայի ղեկավարը: Ի վերջո, ցեղասպանությունն իրագործվել է հենց Առաջին համաշխարհային պատերազմի ընթացքում»,- ասաց Ֆրանսիայի հայկական կազմակերպությունները համակարգող խորհրդի համանախագահ Մուրադ Փափազյանը:

Ֆրանսիայի հայկական կազմակերպությունները համակարգող խորհրդի ամենամյա ընթրիքին բարձրացրեցին նման հարցեր: Լսարանում Ֆրանսիայի վերնախավն էր՝ նախագահ Էմանուել Մակրոն, Փարիզի քաղաքապետ Անն Իդալգո, Իլ դե Ֆրանսի նախագահ Վալերի Պեկրես և այլք: Հենց այստեղ էր մեկ տարի առաջ Էմանուել Մակրոնը մի խոստում տվել, որին Ֆրանսիայի հայերը սպասում էին անհամբերությամբ: Այսպիսով, ավելի քան 300 հյուրերի ներկայությամբ Ֆրանսիայի նախագահը հայտարարեց.

«Ինչպես խոստացել էի, շաբաթներ անց Ֆրանսիայում ապրիլի 24-ը կհռչակվի իբրև Հայոց ցեղասպանության նշանավորման ազգային օր»:

Սա այն էր, ինչի ուղղությամբ Ֆրանսիայի հայերն աշխատել են տարիներով:

«Ֆրանսիայում հայերի պատմությունը ֆրանսիական պատմություն է, Հայոց ցեղասպանությունը մեր հիշողությունն է և պետք է հիշատակված լինի մեր հանրապետության կողմից: Ես բոլոր ջանքերս կներդնեմ, որպեսզի պայքարեմ ժխտողականության բոլոր տեսակների դեմ, որոնք վիրավորանք են զոհվածների հիշատակին և ապրողների արժանապատվությանը: Սա մի պայքար է, որը տանում են ձեզնից շատերը տարիներ ի վեր: Ողջունում եմ ձեզ: Այս պայքարը շարունակում է մնալ արդիական: Մեզնից ոչ մեկը չպետք է սովորի, համակերպվի կամ մտածի, որ պայքարն ավարտված է»,- ասաց Մակրոնը:

Ձեռք մեկնել, խաղաղություն հաստատել, հարթակներ ստեղծել երկխոսության համար: Ֆրանսիայի ղեկավարը Թուրքիայի հետ երկխոսության թելը կտրել չի ցանկանում, չնայած ասում է, որ բազմաթիվ տարաձայնություններ կան «Իսլամական պետության» դեմ պայքարի, մարդու իրավունքների, ցեղասպանության և անցյալի վերաբերյալ:

«Ռեջեփ Թայիփ Էրդողանը տեղյակ է իմ որոշման մասին: Մենք պետք է երկխոսենք՝ միաժամանակ ոչինչ չզիջելով ճշմարտության զրույցում` փաստերով այն, ինչ ասում է պատմությունը: Էրդողանը թուրք հասարակությունը չէ, ես կարող եմ դա հստակ ասել: Բայց նա այսօր Թուրքիայի նախագահն է»,- ասաց Ֆրանսիայի նախագահը:

Պատասխանը չուշացավ. ինչպես սպասվում էր, Անկարան խստորեն դատապարտեց Էմանուել Մակրոնի` Ֆրանսիայում Հայոց ցեղասպանության հիշատակի օր հռչակելու մասին որոշումը:

«Ցեղասպանության մասին խոսակցությունները քաղաքական սուտ են: Դրանք հակասում են պատմական փաստերին և չունեն իրավական հիմքեր»,- հայտարարեց Թուրքիայի նախագահի մամուլի խոսնակ Իբրահիմ Քալընը:

Իսկ CCAF-ի համանախագահ Արա Թորանյանը մեզ հետ զրույցում պատմեց.

«Թուրքիայի իշխանությունները ջանում են թշնամանք ներմուծել նաև մեր երկրում ապրող թուրքերի շրջանում: Բայց Ֆրանսիան չի կարող մարդկության դեմ ոճրագործությունը թողնել համայնքների կոնֆլիկտի համատեքստում: Երկիրը վերցնում է այդ պատասխանատվությունը»:

Մեզ հետ զրույցում Թորանյանը նաև տեղեկացրեց՝ Մակրոնին հարց են ուղղել Ադրբեջանին զենք վաճառելու մասին: Ֆրանսիայի նախագահը հաստատել է՝ Էմբարգոյի պարտավորությունները պահպանվելու են:

«Մակրոնն ասաց, որ Ֆրանսիան հարգում է միջազգային օրենսդրության շրջանակներում ստանձնած պարտավորությունները. չի մատակարարում այնպիսի զենք կամ ռազմամթերք, որը կարող է օգտագործվել Արցախում»,- ասաց Թորանյանը:

Միջոցառման ընթացքում նախագահ Մակրոնը հարգանքի տուրք մատուցեց ֆրանսահայ երգիչ Շառլ Ազնավուրի և կոմպոզիտոր Միշել Լեգրանի հիշատակին, իսկ Ազնավուրի որդին՝ Նիկոլա Ազնավուրը, Մակրոնին դուդուկ նվիրեց։ 45 րոպե տևողությամբ ելույթի ժամանակ Մակրոնը բաց չթողեց ոչ մի կարևոր շեշտադրում. հանգիստ ու տեղ-տեղ էմոցիոնալ խոսք, որն ավարտեց հումորով:

«Հայերը յուրահատուկ ստեղծարարներ են, նրանք կարող են լինել 100 տոկոսով հայ և 100 տոկոսով ֆրանսիացի: Այդպես էր ասում նաև Ազնավուրը: Եվ ոչ ոք չէր հարցնում՝ ինչպես կարող էր դա հնարավոր լինել»,- ասաց Ֆրանսիայի ղեկավարը:

Նշենք, որ Ֆրանսիայի նախագահը խոստացել է, որ մոտ ապագայում պետական այց կկատարի Հայաստան: