Մարդկանց թվում է, թե ԱԺ նիստերը պետք է անցնեն մենաստանի, կուսանոցի նման համապարփակ լռությամբ. Զոհրաբյան

ԱԺ-ում խորհրդի նիստի ավարտից հետո SHANTNEWS.am-ին հարցազրույց է տվել ԲՀԿ խմբակցության պատգամավոր Նաիրա Զոհրաբյանը: Երեկ ևս տեղի էր ունեցել խորհրդի նիստ, որի ընթացքում, ինչպես հայտնի է, քննարկվել է միջխորհրդարանական հանձնաժողովների կազմերը: Տեղեկությունների համաձայն` նիստն անցել է բավական լարված մթնոլորտում:

Հարցին` ի՞նչն է եղել պատճառը, Նաիրա Զոհրաբյանն այսպես արձագանքեց.

«Մարդկանց թվում է, թե ԱԺ նիստերը պետք է անցնեն մենաստանի, կուսանոցի նման համապարփակ լռությամբ, բնականաբար, մեծամասնությունն ունի իր տեսակետը, ընդդիմադիր քաղաքական ուժերս ունեինք մեր տեսակետը, և մենք գտնում էինք, որ բոլոր միջխորհրդարանական պատվիրակություններում ու վեհաժողովներում բոլոր քաղաքական ուժերը պիտի լինեն ներկայացված: Ցավոք, ինչ-ինչ պատճառներով կոնսենսուս չկայացավ, և ՆԱՏՕ-ի խորհրդարանական վեհաժողովում, որը համարում եմ շատ կարևոր հարթակ, ԲՀԿ-ն չունի ներկայացուցիչ, և Սևծովյան տնտեսական վեհաժողովում ԼՀԿ-ն չունի»:

Նրա վստահեցմամբ` ներկայացուցիչների պակասն ու ներքաղաքական դաշտում հակասությունները երբևէ չեն ազդել ու այսուհետ էլ չեն ազդելու արտաքին քաղաքական օրակարգի վրա:

«Մենք կփորձենք այս ֆորմատում, ինչը հաստատվեց մեծամասնության կողմից, առավելագույնս օպտիմալ աշխատել, որովհետև հստակ մեկ արձանագրում պետք է անենք: Մենք, անկախ երկրի ներսում ունեցած տարաձայնություններից, երկրից դուրս միշտ եղել ենք արտաքին քաղաքական օրակարգի պաշտպանը և երբևէ միմյանց հետ որևէ տարաձայնություն չի եղել: Այս առումով ճիշտ կլիներ` բոլոր քաղաքական ուժերից միջազգային կազմակերպություններում լինեին ներկայացուցիչներ»,- հավելեց պատգամավորը:

Ըստ նրա՝ «Իմ քայլը» պատրաստ էր որոշակի քվոտաներ զիջել, բայց կար ԱՊՀ և ՀԱՊԿ վեհաժողովներում քվոտաներ զիջելու խնդիր, ինչի հետևանքով կոնսենսուսի բացակայության պատճառով ընդունվել է նախնական որոշված տարբերակը, այսինքն՝ կազմերն ընտրվել են ըստ ԱԺ-ում ներկայացված քաղաքական ուժերի համամասնության:

Ինչ վերաբերում է «Իմ քայլը» խմբակցության կողմից առաջարկվող ռոտացիոն սկզբունքի կիրառմանը, Նաիրա Զոհրաբյանն այն անընդունելի է համարում` բացատրելով այսպես.

«Ես ռոտացիոն սկզբունքը համարում եմ անընդունելի, ինձ համար անհասկանալի է, որ պատգամավորն ասում է` 6 ամիս ժամանակ է պետք, որ ինքը ամբողջ վեհաժողովի խոհանոցը յուրացնի, մտնի աշխատանքի մեջ, և 6 ամիս հետո պիտի փոխվի, և նշանակվի այլ քաղաքական ուժ, իսկ դա բացարձակ անընդունելի մեթոդ է, որը փորձ արվեց կիրառել Եվրոպայի խորհրդի խորհրդարանական վեհաժողովում և եղավ խիստ անարդյունավետ, այդ պատճառով դեմ եղավ»: