Դատարանում լարվածության պատճառով դատավորը որոշեց դատաքննությունը շարունակել դռնփակ

«Հաստատում եմ իմ նախաքննական ցուցմունքները, ըստ էության ոստիկանապետն ամեն ինչ ասաց»,- ՊՊԾ գնդի գործով դատաքննության ժամանակ ասաց ՀՀ նախկին փոխոստիկանապետ  Վարդան Եղիազարյանը, որը ևս այս գործով տուժող է հանդես գալիս դատարանում: 2016 թվականի հուլիսի 17-ին ՊՊԾ գնդի գրավման մանրամասների մասին փոխոստիկանապետը պատմեց հետևյալը․

«Առավոտյան ժամը 6-ի սահմաններում ինձ զանգահարեցին ոստիկանության հերթապահ մասից  և հայտնեցին, որ ՊՊԾ գնդի վրա զինված հարձակում է եղել: Ես մեկնեցի դեպքի վայր, հայտնվեցի այնտեղ, որտեղ արդեն Վալերիյ Օսիպյանն էր: Կային ոստիկանական մեքենաներ, առանձնացված էր ոստիկանական գունդ տանող գիծը: Հարցրի` Օսիպյանին ի՞նչ է եղել, ասաց` չգիտեմ: Կապի եմ դուրս եկել ներսում գտնվողների  հետ, պիտի գնամ տեսնեմ: 2-3 հոգի մոտեցան մեզ, ինքնաձիգները դրեցին վզներիս, ստիպեցին գնալ գունդ, մի քանի անգամ խփեցին, բայց դա լուրջ բան չէր: Հիմնականում հայհոյանքներ էին հնչում, կոչեր, լարված մթնոլորտ էր: Ի սկզբանե մեր խնդրանքն այն էր, որ բաց թողնին սերժանտներից պատանդառված 8 հոգուն: 2-ին բաց  թողեցին, մեկն առողջական խնդիր ուներ, մյուսը պիտի ամուսնանար: Խնդրում էինք, որ էքստրեմալ բաներ չլինեն, բայց կրակոցներ եղան, հետո իմացա, որ 3 ոստիկան մահացել է: Հեռախոսները շատ ընտրովի էին տրամադրվում, քմահաճույքով: Օսիպյանի հեռախոսն ընդհանրապես անհետացավ, հազվադեպ թույլ էին տալիս կապ հաստատել արտաքին աշխարհի  հետ, իմ անձնական սպայական արժանապատվության նկատմամբ լուրջ ոտնձգություն չի եղել, վերաբերմունքը եղել է պարկեշտ, այդուհանդերձ, դա գնահատել որպես լավություն, չի կարելի:  Իհարկե, պատանդ  էինք: Սահմանափակված  էին մեր ազատությունները: Անվերջ  մեկուսացման և հսկողության տակ  էինք: Գնալով մթնոլորտն ավելի լարվում էր: Ես անվերջ  փորձում էի մեղմել, խոսակցություններ էինք տանում բարյացակամ տոնով, ինչ-որ բան էինք  ուզում ապացուցել, նորմալ մարդկային  մթնոլորտ  էր, կային մարդիկ, ովքեր անկանխատեսելի դրսևորումներ ունեին, խուսափում էինք նրանց հետ շփվել: Միատարր չէր անձնակազմը: Ինչ վերաբերում է սպանություններին՝ ինձ համար զարմանալի է և զայրացուցիչ, որ էսքան ժամանակ ոչ մի ներողամտություն կամ զղջանքի խոսք չի հնչել: Դահլիճից նույնիսկ ծափահարություններ են հնչում, երբ խոսվում է սպանությունների մասին: Ի վերջո, հայորդիներ են զոհվել: Ինձ համար զարմանալին սա  է: Պահանջները տարբեր էին՝ սկսած նրանից, որ կառավարությունը, ոստիկանական բարձրաստիճան կազմը պիտի լուծարվի, բայց հիմնականն այն էր, որ Սեֆիլյանն ազատ արձակվի ու տեղափոխվի գունդ:

Այդ  պահանջները հնչեցվում էին հեռախոսներով հայհոյախառն, բարձրախոսներով: Մեր «կալանապետը» Կյուրեղյանն էր: Իմ տեսադաշտում եղած մարդիկ բոլորը զինված էին, բոլորի  մոտ գնդի զենքեր էին, ամեն մեկն անգամ 4-5 ատրճանակով  էր, կային նռնակներ, չեմ հասկանում դրանց կարևորությունը: Անգամ զավեշտալի բան եղավ՝ հարցրի` տղա՛ ջան, երկու ձեռք ունես, ինչո՞ւ ես  հինգ հատ ատրճանակ վերցրել: Պավլիկն ու Մխիթարն էին կազմակերպում ամեն ինչ: Ինձ անընդհատ փորձում էին մեկուսացված պահել, չէին թողնում ազատ տեղաշարժվեինք: Բարբարոսական վերաբերմունք էր գույքի  նկատմամբ, ավտոտրանսպորտի նկատմամբ, ջարդուխուրդ արած էր ամբողջ տարածքը, հարցրի՝ լավ, ապակիները ինչի՞ եք ջարդում, ասեցին՝ որ օդ գա: Ով ինչ հասցնում էր՝ հագնում էր, ջարդում, մի խոսքով` նյութական մեծ վնաս են տվել: Ոստիկան Գագիկ Մկրտչյանի մասին ասացին, որ ձեռքից է  վնասվածք  ստացել, գնացինք  տեսանք`լուրջ վիճակ է, բժիշկներն ասացին, որ երիկամից է վիրավոր: Հետո բժիշկն ասեց, որ շատ քիչ են շանսերը, որ կենդանի կմնա: Կարծում եմ, որ այստեղ դեմագոգիական արտահայտություններ հնչեցին սահմանադրական կարգը տապալելու մասին, իրականում գունդը զավթել էին: Ինձ վերաբերվում էին պարկեշտ, բայց ոչ բոլորի նկատմամբ էին պարկեշտ վերաբերվում, հատկապես վատ էին վերաբերվում ոստիկանական կրտսեր անձնակազմին, փորձում էին իրենց կողմը «քաշել»:

Ամբաստանյալները տուժողին հարցեր ուղղելիս պարբերաբար խախտում էին դատաքննության կարգը, ռեպլիկներ ուղղում: Ի պատասխան` դատավոր Մակյանը կրկին սանկցիա կիրառեց Սմբատ Բարսեղյանի նկատմամբ, սակայն մինչ Բարսեղյանը կհեռանար դահլիճից՝ ապակու մյուս կողմում գտնվողները շարունակաբար ծափահարում էին:

Դատավոր Մեսրոպ Մակյանը որոշեց դատաքննությունն անցկացնել դռնփակ, սակայն դահլիճում նստածները մտադիր չէին հեռանալ: Հայտարարվեց ընդմիջում, մինչ դատական նիստի կարգուկանոնը կվերականգնվի: Ընդմիջումից հետո, քանի որ դատաքննության մասնակիցները չէին հեռացել դահլիճից, նախագահող դատավոր Մեսրոպ Մակյանը որոշեց հետաձգել դատական նիստը մեկ շաբաթով և շարունակել նախկին փոխոստիկանապետի հարցաքննությունը մեկ շաբաթ անց: