Տեփանոսյանը հրազենային վնասվածք է ստացել մեքենայի մեջ նստած, կրակել են տանիքից. Օսիպյանի ցուցմունքը

ՊՊԾ գնդի գրավման գործով դատաքննությունը շարունակվում է: Դատարանում ցուցմունք է տալիս ՀՀ ոստիկանապետ Վալերիյ Օսիպյանը: Հիշեցնենք` նա յոթ օր շարունակ զինված խմբի կողմից պահվել է գնդում: Ոստիկանապետը պատմեց, որ 2016 թվականի հուլիսի 17-ի առավոտյան` ժամը 5-ի սահմաններում, հերթապահից ստացավ տեղեկություն, որ ոստիկանական գունդը գրավել են մի խումբ զինված քաղաքացիներ:

«Ես  չեմ համակերպվում այն գաղափարի հետ, թե գրավել են: Դա զավթում էր: Տեղեկանալով այս  մասին՝ ծառայողական մեքենայով եկա ՊՊԾ գունդ: Հասնելով բաժնի մոտ` տեսա հավաքված մի խումբ ոստիկանների, տեսա անկանոն զինված մի խումբ մարդկանց: Տղաների ձեռքին զենքեր կային` ինքնաձիգեր, ատրճանակներ, տղաներից մեկի մոտ ռադիոկապ կար: Հասկացա, որ գունդ  են մտել, վերցել են մեր կապի միջոցները և մեր հաճախականությամբ կապի մեջ են մտել:

Խոսեցի Պավլիկի  հետ, ասացի՝ առաջարկում եմ դուրս գալ և զենքերը դնել: Նաև Պավլիկին առաջարկեցի մոտենալ, հասկանալ՝ զոհեր, վիրավորներ կա՞ն, թե՞ ոչ: Փորձում էի բացատրել, որ դա ճիշտ չէ: Մեր բանակցությունների ժամանակ խոսակցությունը ձգված տոնայնության մեջ էր, հասկացա, որ անիմաստ է այդ խոսակցությունը. ինձ ասեցին, որ զոհ չկա. ում պետք էր` բժշկական օգնություն են ցույց տվել: Սեդրակը ձեռքը գցեց, որ խլի իմ կապի միջոցը, հետո մեկն ինքնաձիգի կոնդակով գլխիս հարված հասցրեց, 5-6 հոգով ինձ տարան, ճանապարհին գլխիս ստանում էի հարվածներ: Հետո իմացա, որ առաջին հարվածողն Աշոտն էր: Ինձ տարան գունդ: Ներսում տեսա համակարգչի մոտ նստած Վարուժան Ավետիսյանին: Մյուս սենյակում՝ հանգստի սենյակում նկատեցի՝ ձեռնաշղթաներով 8 ոստիկան կար, մեզ  էլ կանդալեցին՝  ինձ  ու Վարդան Եղիազարյանին:

Մենք չէինք դադարում բանակցել, ինձ հաջողվեց համոզել, որ ձեռքերս ազատեն, այնուհետև ինձ  տարան դուրս, ձախ թևի վրա Սեթոն էր` Պավլիկի տղան էր, ինքը ոնց որ ներկա-բացակա էր անում:

Բարձրախոսը տվեցին իմ ձեռքը, թե հիմա քեզ ստեղ գյուլլում են, դիմի՛ ոստիկաններին, որ գան, միանան մեզ: Ես դիմեցի ոստիկաններին՝ խնդրեցի այս ուղղությամբ չկրակել, իրենք  էլ չեն կրակի: Ասեցի` դրանից ավել բան չեմ ասի: Մոլոտով կոկտեյլներ էին պատրաստվում, դիմացի բարձրահարկ շենքում էր շարժ նկատվում: Դրանից  հետո նկատեցի, որ ոստիկանական զրահամեքենա՝ ԲՏՌ, մտավ գունդ, գունդը զավթած տղաների կողմից  կրակահերթ եղավ, հետո  իմացա, որ 2-3 ոստիկան վիրավորվել էր: Իմ հեռախոսը թողել  էին իմ մոտ, որպեսզի կապը դրսի  հետ պահպանեմ:

Հարցրի, թե Վանոյան Արթուրն ո՞ւր է, ասեցին՝ չգիտեն: Այդ օրը Վանոյանը հերթապահ էր: Պավլիկ Մանուկյանի հետ բարձրացանք  վարչական շենքի իր աշխատասենյակը: Մուտքից պատկերացրի` ինչ է կատարվել. նկատեցի պատի վրայի գնդակի տեղեր, ինքնաձիգի պարկուճներ, արյան հետքեր, ինչքան մոտենում էի աշխատասենյակին՝ արյան հետքերը շատանում էին, պատերին արյունոտ ձեռքերի հետքեր կային, հասկանալի էր, որ վիրավորը պատերից բռնված է քայլել: Հնարավոր չէր ներս մտնել, ամբողջն արյուն էր:

Աշխատասենյակում ամենը թափթփված էր: Երբ բարձրացրինք  վերմակը, տեսանք Արթուր Վանոյանին` մահացած վիճակում: Զայրացա, հունից դուրս եկա: Պավլիկն ասեց՝ էս ո՞վ է արել, ո՞վ է  սպանել: Ես էլ ասեցի` գյուլլող տղա եք, ձեզ ստեղ գյուլլեք, պրծեք: Գնդում մնացինք 7-8 օր  պատանդառված, մեզ հսկում էին Արեգ Կյուրեղյանը, Սերգեյ Կյուրեղյանը: Առավոտյան տեղեկացա, որ հարթակ են հատկացրել  լրագրողների համար: Շատ-շատերի մոտ կային ինքնաձիգներ,  Կալաշնիկովներ ու ատրճանակներ: Տղաներից ոմանց մոտ կային 2-3 ատրճանակներ: Դրանք գնդի  հաշվեկշռում եղած զենքերն էին, կային նռնակներ:

Նախապատրաստական աշխատանքները  բոլորն էին իրականացրել: Աշխատանքները կոորդինացնում էր Մխիթարը: Հետո իմացա, որ ուզեցել են ինձ գան տանից տանեն, հարցրի` ինչի՞  իմ հետևից պիտի գայիք, ասել են` ամենաճանաչված ոստիկանը դու ես: Մխիթար Ավետիսյանը  հենց առաջին պահից աչքի ընկավ՝ նա արնահոսում էր, չէր հասկացվում գլխի՞ց էր, թե՞ ճակատից  էր վիրավոր: Հետո նրան վիրակապեցին, ու ամեն օր թարմացվում էր վիրակապը: Մեզ պատմեցին, թե ինչպես է տեղի ունեցել Վանոյանի մահը:

Գագիկ Եղիազարյանն ու Պավլիկ Մանուկյանը պատմեցին, որ գունդ մտնելուց ներսից կրակել են, իրենք ասել են` մի՛ կրակեք, իրենք կրակել են: Եթե չեմ սխալվում, Սմբատն է կրակել: Նա զինված  է եղել ատրճանակներով, կարաբինով, ՍԿՍ տեսակի, օպտիկական: Հեռախոսները ձեռք  էին բերել «Փեթակ» առևտրի կենտրոնից նոր համարներով, որպեսզի չգաղտնալսվեր: Կարո Եղնուկյանի բնակարանում էին կատարել նախապատրաստական աշխատանքները: Յուրաքանչյուրը գնդում  հստակ պարտականություն ուներ՝  Գևորգ Իրիցյանը հսկում էր Սարի  թաղի ճանապարհը  և գնդի հարևանությամբ այգին: Արեգ և Սերգեյ Կյուրեղյանները մեզ հետ էին, մեզ էին հսկում, նաև Տիգրանն էր հսկում: Գունդը գունդ  չէր, ավերած էր, պահեստները  խայտառակ վիճակում էին, կոշիկներն ու շապիկները զինված խմբի անդամների հագին  էին:

Ոստիկան Գագիկ Մկրտչյանը եղել է գնդի հերթապահ, էնտեղ կողմնակի անձ  իրավունք չուներ մտնելու, Գագիկը  հենց պահեստի  մոտ է  վիրավորվել, տեղափոխել են հիվանդանոց, շատ ծանր վիճակում էր, չէր կարողանում խոսել: Տեփանոսյանը հրազենային վնասվածք է ստացել մեքենայի մեջ նստած: Հետո իմացա, որ կրակել  են տանիքից, դիպուկահար է կրակել, և կրակողը եղել է  Սմբատ Բարսեղյանը»,- պատմեց ՀՀ ոստիկանապետը: Նա նաև ասաց, որ գնդի տարածքում չի կարողացել ազատ տեղաշարժվել: