Այստեղ ամեն ինչ անում են, որ տեղի ունեցածը հայ-թուրքական բախման չվերածվի. ամերիկահայ գործիչ

Լոս Անջելեսում օրեր առաջ տեղի ունեցած արտակարգ դեպքը շարունակում է քննարկման թեմա մնալ ամերիկահայության շրջանում: Հայկական երկու դպրոցների տարածքում թուրքական դրոշների տեղադրումը լարվածություն է առաջացրել շատերի մոտ, բայց, ինչպես SHANTNEWS.am-ի հետ զրույցում հայտնեց Արևմտյան Ամերիկայի Հայ դատի հանձնախմբի ատենապետ Նորա Հովսեփյանը, դեպքից հետո վախի կամ հարձակողական  ոչ մի տրամադրություն չկա համայնքում:

Ամերիկահայ գործիչը մեզ հետ զրույցում ասաց, որ լարվածությունն առաջացել է, քանի որ առաջին անգամ է ամերիկահայությունը ականատես լինում նման դեպքի:

«Թուրքական կառավարությունը միլիոնավոր դոլարներ է ծախսում՝ հօգուտ թուրքական քարոզչության: Նրանց անդրադարձը մեր պայքարին միշտ այդ ձևով  է եղել: Ամեն ապրիլի 24-ին, երբ մենք ցույցեր ենք անում թուրքական դեսպանատան ու հյուպատոսարանի առջև, տասնյակ հազարավոր հայեր են մասնակցում մեր ցույցերին, իսկ թուրքական կառավարությունը երեսուն-հիսուն ցուցարար է բերում, իրենք էլ իբր հակացույց են անում: Թուրքական համայնք կա այստեղ, բայց մեր համայնքի պես չէ՝ ո՛չ թվով, ո՛չ էլ կազմակերպվածությամբ»,- դեպքի առթիվ SHANTNEWS.am-ին հայտնեց Հայ դատի հանձնախմբի պատասխանատուն:

Նրա խոսքերով՝ հնարավոր չէ ստույգ ասել, թե Թուրքիայի դրոշները հայկական դպրոցների մուտքերի մոտ տեղադրողներն ովքեր են, բայց հնարավոր է գուշակել նրանց ազգությունը:

«Վերջերս Էրդողանի և թուրքական կառավարության կողմից վարվող քաղաքականությունից ոգևորված հավանաբար որոշ թուրք ազգայնականներ կամ ծայրահեղականներ այստեղ քաջալերվել են դրանից և քայլեր են ձեռնարկել: Մենք ուրիշ ձև չունենք գուշակելու, թե ովքեր են, բայց տեսախցիկների նկարահանումներից երևում է, որ սև հագուստով, դիմակավորված տղամարդիկ են: Հույս ունեմ՝ նկարահանումների հիման վրա ոստիկանությունը կգտնի հանցագործներին, առաջիկայում  հստակեցումներ կլինեն»,- ասաց մեր զրուցակիցը:

Նորա Հովսեփյանը նաև նշեց, որ դեպքի առթիվ մտահոգություններ կան, բայց ոչ վախի մթնոլորտ:

«Մեր գաղութն ուժեղ է, և դրա ապացույցն այն է, որ աշակերտները վախի զգացում չեն ունեցել, այլ ընդհակառակը, հայկական դրոշներ են կախել դպրոցներում, շուրջպար են բռնել մեր մշակույթը ևս մեկ անգամ ցույց տալու համար, հարձակողական ոչ մի քայլ չեն արել: Թե՛ ոստիկանությունը, թե՛ վարժարանների տնօրինություններն ապահովության բոլոր միջոցները ձեռնարկել են, այսինքն՝ ապահովություն միշտ կա, և նման դեպքը, բնականաբար, ցնցում պիտի առաջացներ»,- ասաց Նորա Հովսեփյանը:

Մեր զրուցակցի կարծիքով՝ ոմանք հույս ունեն, որ տեղի ունեցածը ոչ թե հայ-թուրքական հարաբերությունները սրելու նպատակ ունի,  այլ անհատական նախաձեռնություն է:

«Վստահ չեմ,  բայց  կարծում եմ՝ անհատական քայլ էր: Այստեղ կառավարությունն էլ, Լոս Անջելեսի քաղաքապետարանն էլ, նույնիսկ կոնգրեսականները զորավիգ են մեր համայնքին, իրենց աջակցությունն են հայտնել, պատրաստ են ամեն ինչ անել, որպեսզի այսպիսի դեպքերը  հայ-թուրքական բախումի չհանգեցնեն, ընդհանուր լուծումներ գտնվեն, խնդիրն ավելի չմեծանա»,- տեղեկացրեց մեր զրուցակիցը:

Նա հիշեցրեց, որ հայերը պատրաստվում են այս ապրիլի 24-ին կրկին հավաքվել Թուրքիայի հյուպատոսարանի առջև, և ինչպես ամեն տարի, այս տարի ևս նրանց են միանալու այլ ազգային փոքրամասնությունների ներկայացուցիչներ՝ հույներ, քրդեր, ասորիներ, հրեաներ, ուսանողական կազմակերպությունների ներկայացուցիչներ՝ իրազեկման և բողոքի ակցիայով կրկին աշխարհին հիշեցնելու 1915 թվականի Հայոց ցեղասպանության մասին: