Հայաստանը պատրաստվում է գնային հեղափոխության. «Կոմերսանտ»

Ռուսական «Կոմերսանտ»-ն անդրադարձել է ՀՀ վարչապետ Նիկոլ Փաշինյանի՝ Մոսկվա կատարած վերջին այցելությանը:  Լրատվամիջոցը գրում է` համակարգված էներգետիկ քաղաքականության մշակումը, որը նշանակում է «էներգետիկայի գնագոյացման հարցի լուծում»,  կդառնա հունվարի 1-ից ԵՏՄ նախագահությունը ստանձնած Հայաստանի առաջնահերթությունը՝ նշելով, որ այդ մասին երեկ հայտարարել է ՀՀ վարչապետ Նիկոլ Փաշինյանը` ելույթ ունենալով Եվրասիական տնտեսական հանձնաժողովի շտաբում:

Ռուս լրագրողը նշում է, որ Փաշինյանը Մոսկվա գնացել էր Դավոսի համաշխարհային տնտեսական ֆորումին մասնակցելուց հետո, ու թե Շվեյցարիայում, թե Ռուսաստանում կենտրոնացած է եղել տնտեսության վրա` հավաստիացնելով համաշխարհային առաջնորդներին և պոտենցիալ ներդրողներին, որ Հայաստանում տեղի ունեցած քաղաքական հեղափոխությունը վերածվելու է տնտեսական հեղափոխության:

Հոդվածի հեղինակը նկատում է, որ առաջին հայացքից Նիկոլ Փաշինյանի այցը Մոսկվա փոքր-ինչ դանդաղեցրեց Դավոսի համաշխարհային տնտեսական համաժողովից դեպի Երևան վերադարձը՝ ավելացնելով, որ պաշտոնապես նրա այցի նպատակը ԵՏՀ կենտրոնակայանում էր: Ինչպես նշել է Նիկոլ Փաշինյանը, Եվրասիական տնտեսական հանձնաժողովի նախագահ Տիգրան Սարգսյանն ասել է` դա առաջին անգամն է, որ ԵՏՀ շտաբ այցելում է ԵՏՄ անդամ պետության ղեկավար: Ճիշտ է, այդտեղ եղել են նաև այլ երկրների առաջին դեմքերը՝ Սինգապուր, Մոնղոլիա և Կամբոջա:

Ըստ հոդվածի՝ այս տարի կազմակերպության ամենափոքր երկիրը՝ Հայաստանը, զբաղեցնում է կազմակերպության առանցքային տեղը: Նախ՝ Տիգրան Սարգսյանը պահպանում է ԵՏՀ կոլեգիայի ղեկավարի պաշտոնը (2020-ին ուրիշը կանի դա), երկրորդ՝ հունվարի 1-ին Երևանը դարձավ ԵՏՄ-ի նախագահ: Օգտվելով նման հարմար պահից` Երևանը մտադիր է նպաստել մի շարք օգտակար նախաձեռնությունների: Դրանց մասին երեկ Նիկոլ Փաշինյանը նշել է միության երկրների ղեկավարներին ուղղված իր հաղորդագրության մեջ:  Ելույթի տեքստում կազմակերպությանն ուղղված քննադատությունները բավական շատ էին:

«Անհրաժեշտ է ակտիվացնել ջանքերը, որոնք ուղղված են համաձայնեցված էներգետիկ քաղաքականության իրականացմանը և էներգետիկ ռեսուրսների համար ոչ խտրական հիմքի վրա գնագոյացման զգայուն հարցի լուծմանը, ինչպես նաև դրանց տարանցիկ փոխադրմանը անդամ երկրների տարածքներով, այդ թվում՝ հաշվի առնելով տարանցիկ բաղադրիչները»,- մեջբերվում է Փաշինյանի խոսքը՝ նաև նշելով, որ Հայաստանի ղեկավարը մատնանշեց «միության մեջ վստահության մակարդակի ամրապնդման» կարևորագույն խնդիրը:

«Կոմերսանտ»-ը հիշեցնում է, որ էներգետիկ ռեսուրսների շուկայում հատկապես գազի գնագոյացումը չափազանց ցավոտ թեմա է Երևանի համար` հաշվի առնելով, որ հանրապետությունում չկա կենտրոնացված ջեռուցում, ձմռանը գազի վճարումները հայ ընտանիքների ծախսերի զգալի մասն է կազմում:

«Անցյալ տարվա վերջում Նիկոլ Փաշինյանը ակտիվորեն քննարկեց այդ հարցը Ռուսաստանի նախագահ Վլադիմիր Պուտինի հետ, հուսալով, որ ավելի բարենպաստ սակագին կլինի: 2019 թ. սկզբից, սակայն, գինը հազար խորանարդ մետրի դիմաց 150 $-ից հասել է 165 $-ի, սակայն սպառողի համար այն մնաց նույնը: Նոր կառավարությունը խուսափեց վարկանիշը հարվածի տակ դնելուց: Պատասխանելով լրագրողների հարցերին՝  Փաշինյանը հստակեցրեց, որ մտադիր է շարունակել բանակցությունները այս հարցում և նույնիսկ ընդլայնել դրանք: Վարչապետը նշել է, որ էներգետիկ գները ուժեղ ազդեցություն ունեն Միության տարբեր երկրներում արտադրվող ապրանքների և, հետևաբար, դրանց մրցունակության վրա: Այնուամենայնիվ, Նիկոլ Փաշինյանը խոստովանեց՝ բոլոր թերություններով հանդերձ, միությունը դեռ «հաջող ինտեգրացիոն միավորում է»»,- գրում է «Կոմերսանտ»-ը: