Դատավորն ապաքաղաքականացված է. Մեսրոպ Մակյանը՝ ՊՊԾ գնդի գրավման գործով դատաքննության ժամանակ

ՊՊԾ գնդի գրավման գործով դատաքննության ժամանակ ցուցմունք տալուց և հարցերին պատասխանելուց հրաժարվեց նաև քրեական  գործից անջատված մասով մեղադրյալ Վահե Պետրոսյանը: Նա հրաժարվեց նաև իր նախաքննական ցուցմունքներից: Պետական մեղադրողը հրապարակեց նրա նախաքննական ցուցմունքները:

Ըստ դրանց՝ Վահե Պետրոսյանը քաղաքականությամբ երբեք չի հետաքրքրվել, սակայն Կարեն Հակոբյանի հորդորով մասնակցել է  Ժիրայր Սեֆիլյանի պաշտպանության համար կազմակերպված ցույցին: Կարեն Հակոբյանն ասել է, որ «մարդաքանակ է  հարկավոր»: Գիշերվա ժամը 02։00-ին մոտեցել է մարդատար մեքենա, որի նստատեղերը հանված են եղել և հատակին մոտ երեք-չորս տղամարդ  է նստած եղել, մոտեցել են մի շինության: Եղել են նաև այլ մեքենաներ, որոնցից իջել են զինված մարդիկ: Վահեն նկատել է, որ դա ցույցի գնալու նման չէ, ասել է՝ ուզում է իջնել և հեռանալ: Մեքենան մտել է մի տարածք, որը հետագայում է հասկացել՝ ոստիկանական գունդ է: Վահեն պառկել է  գետնին, քանի որ անդադար կրակել են, նկատել է, որ «մեշոկներով» զենքեր են բերվել, որոնք բաժանվել են բոլորին, նկատել է  նաև ձեռքից վիրավոր ոստիկանին, որին մեկ այլ ոստիկան ուղեկցել է դեպի շտապօգնության մեքենա: Մեքենան հեռու է  կանգնած եղել: Գունդը գրավածներն արգելել են մեքենային շատ մոտենալ: Քիչ անց նկատել է, որ գունդը գրավածները հրմշտելով բերել են մի քանի ոստիկանի, նրանց թվում՝ Վալերիյ Օսիպյանին:

«Աշոտը պոկեց Օսիպյանի համազգեստի ուսադիրները: Օսիպյանից պահանջում էին, որ ոստիկաններին ասի՝ ազատեն տարածքը: Նրան հարվածեցին ու ասացին, որ նրա դեմ ոչինչ  չունեն, բայց պահանջում են, որ Սեֆիլյանն ազատվի: Ես  հարցրի Կարենին, թե Մարտիրոս դյադյան ինչ է ասում: Նա գիտեր, որ ես ուզում եմ հեռանալ գնդից: Ես հարցրի Կարենին՝ մի՞թե իմ հայրը քո նկատմամբ էդպիսի բան կաներ, մի՞թե հնարավոր է  հեղափոխություն անել մի քանի  հոգով: Հիշում եմ, որ գունդը գրավելուց  հետո Սեդրակ Նազարյանը սալյուտ խփեց չորս անգամ, սովորական սալյուտ էր, որն օգտագործվում է  տոնական միջոցառումների ժամանակ»,- Պետրոսյանի ցուցմունքը հրապարակել է պետական մեղադրողը:

Նախաքննական ցուցմունքները հրապարակելուց հետո Վահե Պետրոսյանը հրաժարվեց պատասխանել որևէ հարցի, սակայն ասաց, թե այդ ցուցմունքներում շատ  բան կա, «որ իրենը չէ»: Նա նշեց, որ նախաքննական մարմնում հարցաքննելիս իրեն հարցեր շատ չեն տրվել, եղել է թելադրանք. «ոնց-որ կողքդ մեկը կանգնի, խոսա, հետո  ինձ հարցնի՝ հիշո՞ւմ ես սենց բան, ասա այո կամ ոչ: Շատ  բաներ իմը չեն»:

Մեղադրյալն ամբողջությամբ հրաժարվեց իր ցուցմունքից, նշեց, որ իր նկատմամբ հոգեբանական ճնշում է իրականացվել: Դատավոր Մեսրոպ Մակյանի այն հարցին, թե ինչու չի դիմել իրավապահներին, Վահե Պետրոսյանն ասաց, որ չի իմացել, թե ինչպես դա պետք է  անի: Ի դեպ, նախագահող դատավորը նույն հարցը տվեց նաև նախորդ մեղադրյալին՝ Կարեն Հակոբյանին: Կարեն Հակոբյանն ասել էր, թե նախորդ իշխանության ժամանակ դրա իմաստը չի եղել:

Դատավորը հիշեցրեց, որ արդեն ութ ամիս է՝ Հայաստանում իշխանափոխություն է եղել, ինչո՞ւ չի դիմել իրավապահներին: Մեսրոպ Մակյանը ժպիտով նաև նկատեց, որ դատավորն ապաքաղաքականացված անձ է: