Արամի 23-ում մենք օրենքով անելիք չունենք. Հայկ Մարության

Այսօր Երևանի քաղաքապետարանում՝ ավագանու արտահերթ նիստից հետո, քաղաքապետ Հայկ Մարությանն անդրադարձել է նաև Արամի 23 հասցեի շենքի խնդրին:

Ինչպես հայտնի է, հունվարի 11-ին «Հայաստանի փոքրիկ երգիչների» ֆեյսբուքյան էջում հայտարարություն էր տարածվել, որ Արամի 23 հասցեի մշակութային հուշարձանի վթարված պատը փլուզվել է։ Երգչախմբի գեղարվեստական ղեկավար Տիգրան Հեքեքյանը հայտարարել էր, որ շենքի փլուզումն անտարբերության հետևանք է:

«Շենքն իրենից պատմամշակութային արժեք է ներկայացնում:  Ըստ օրենքի՝ պատմամշակութային արժեք ներկայացնող բոլոր շենքերի պահպանությունը և դրանց հետ կապված բոլոր հարցերը պետք է իրականացնեն այդ շենքերի սեփականատերերը կամ տնօրինողները, դրան հետևում է մշակույթի նախարարությունը: Այս շենքի պարագայում էլ նույն սկզբունքն է  գործում: Մենք արել ենք ամեն ինչ, որ այս շենքը կանգուն մնա և մնալու է»,- ասել է Երևանի քաղաքապետ Հայկ Մարությանը:

Երևանի քաղաքապետի խոսքերով՝ կարևոր է հասկանալ այս երկու կազմակերպությունների տարբերությունը: «Հայաստանի փոքրիկ երգիչներ ասոցիացիա»-ն ՀԿ է, որի նախագահը պարոն Հեքեքյանն է: «Հայաստանի փոքրիկ երգիչներ» ՀՈԱԿ-ն է պատկանում Երևանի քաղաքապետարանին:

«ՀՈԱԿ-ի հարցերով քաղաքապետարանը մշտապես զբաղվել է և զբաղվում է, ասեմ ավելին՝ արդեն մի քանի ամիս է տարածք է տրամադրված այդ ՀՈԱԿ-ին, որպեսզի իրենք շարունակեն իրենց գործունեությունը: Սկզբում տրամադրված էր Աբովյանի անվան դպրոցում, այժմ՝ Պուշկինի անվան և Սայաթ Նովայի անվան երաժշտական դպրոցում: Այսինքն՝ ՀՈԱԿ-ը նորմալ գործում է այս պահին: Արամի 23 շինության սեփականատերը «Հայաստանի փոքրիկ երգիչներ ասոցիացիա» ՀԿ-ն է, որի նախագահը պարոն Հեքեքյանն է, այսինքն՝ դա քաղաքապետարանի ունեցվածքը չէ»,- հավելել է Մարությանը:

Լրագրողները հիշեցրել են քաղաքապետին, որ պատի փլուզման պատճառը, այնուամենայնիվ, դարձել է քաղաքապետարանի այն որոշումը, որով թույլատրվել է կառուցապատողին տարածքում շինարարական աշխատանքներ կատարել:

«Ես չեմ սիրում անդրադառնալ հին իշխանություններ, նոր իշխանություններ, բայց, այնուամենայնիվ, պետք է ասեմ՝ հին իշխանությունների օրոք տրվել է շինթույլտվությունը, որի հարցով մշակույթի նախարարությունն արդեն դիմել է դատախազություն: Մենք այսօր դատախազության հետ և բոլոր իրավապահ մարմինների հետ շատ սերտ համագործակցում ենք, որպեսզի հասկանանք՝ եղե՞լ են նորմերի խախտումներ, թե՞ ոչ: Եթե եղել են, բնականաբար, պետք է պատժվեն այն անձինք, ովքեր այդ նորմերը խախտել են»,- արձագանքել է Երևանի քաղաքապետը:

Հայկ Մարությանին լրագրողները նաև հիշեցրել են Երևանի գլխավոր ճարտարապետի այն հայտարարության մասին, թե շինությունը ոչ միայն չի քանդվի, այլև պատը կամրակայվի: Ինչո՞ւ չի ամրակայվել:

«Մենք ունենք սահմանափակ լիազորություններ, մենք մեր լիազորությունների սահմանում արել ենք ամեն ինչ: Մենք հանդիպել ենք կառուցապատող ընկերության գլխավոր ճարտարապետի հետ, քննարկվել է, թե ինչ ամրացումներ կարող է լինել, այդ պրոցեսը, այսպես ասած, անընդհատ խթանվել է մեր կողմից: Մի տարբերակ արդեն մերժվել է մշակույթի նախարարության կողմից: Երկրորդ տարբերակը ներկայացվել է սեփականատիրոջ կողմից, բայց այդ տարբերակը մենք իրավունք չունենք հաստատելու, որովհետև սեփականատերն ու կառուցապատողը հարաբերությունները պետք է իրար մեջ պարզեն: Նորից եմ կրկնում՝ պատմամշակութային արժեք ներկայացնող շենքերի պահպանումը սեփականատիրոջ և տնօրինող անձանց գործն է: Դրա հետ առնչվում է  նաև մշակույթի նախարարությունը, էստեղ մենք օրենքով անելիք չունենք: Եթե ուզեն, մեզ կարող է նաև դատի տալ յուրաքանչյուր մարդ, որը կապ ունի դրա հետ: Մենք իրավունք չունենք տալ շինթույլտվություն մեկ այլ անձի սեփականության տարածքում: Բայց վերցրել ենք դիմումը, փոխանցել ենք մյուս տարածքի սեփականատիրոջը, իրենց հորդորել ենք արագ կարգով նայել, որոշում կայացնել: Եկել է պատասխան, որ համաձայն չեն: Ասել ենք, որ կողմերը գան համաձայնության, մենք մեր կողմից շինթույլտվությունը արտահերթ կերպով՝ նույն օրն ամբողջ վարչություններով կանցկացնենք և հետ կտանք»,- պարզաբանել է Մարությանը: