Կարելի էր «Իմ քայլին» ասել` չմասնակցեր, կլինեիք առաջինը, ձեր ցավը տանեմ. Ծառուկյանը` «Լուսավոր Հայաստան»-ին

ԱԺ-ում մեկնարկել է հերթական նիստը: «Լուսավոր Հայաստան» խմբակցության ղեկավար Էդմոն Մարուքյանից հետո ելույթ ունեցավ ԲՀԿ առաջնորդ Գագիկ Ծառուկյանը: Նա նախ՝ դիմեց ԱԺ նախագահին, մաղթեց արդյունավետ ու բեղմնավոր աշխատանք: Ծառուկյանն անդրադարձավ Էդմոն Մարուքյանի ելույթին՝ ասելով, թե մինչ սկսելը ուզում է պատասխանել «մեր կլասիկ պատգամավորին»:

«Դուք բոլորդ էլ տեսել եք, որ ես ոչ մի խնդիր չունեմ «Լուսավոր Հայաստան»-ի հետ, լիարժեք ինքն է հարցը տվել, ես պատասխանել եմ, և պատասխանից հետո ինքը մոտեցել է, ես իր ձեռքը ջերմ սեղմել եմ և ամսի 10-ին էլ շնորհավորել եմ: Դա, ասենք թե, իրենք ասում են` Ծառուկյանը պետք է քաղաքականությունից դուրս գա, Ծառուկյանը չլիներ, մենք կլինեինք երկրորդը: Դե կարելի էր «Իմ քայլին» էլ ասել` չմասնակցեր, կլինեիք առաջինը, ձեր ցավը տանեմ»,- ասաց նա:

ԲՀԿ առաջնորդը հայտարարեց, որ մինչև իրենց չդիպչեն, իրենք ոչ մեկին ոչինչ չեն ասի, բայց վիրավորում են իրենց, հետո ասում են` մենք ոչ մի բան չենք ասում: Ծառուկյանը նշեց` որևէ մեկը եթե փորձեց իրենց բան ասել, վիրավորել, դրա պատասխանը «դոկումենտալ»` փաստաթղթով, տեսաժապավենով ներկայացնելու են:

Նրա խոսքով` անհրաժեշտ է պետության հզորացում, տնտեսության զարգացում, ժողովրդի բարեկեցություն, և դա հնարավոր է անել, անհնար ոչինչ չկա, պարզապես, ըստ Ծառուկյանի, հարկավոր է միասնաբար քննարկել, լսել: ԲՀԿ առաջնորդն ասաց, որ չի կարծում, թե պետությանն օգուտ բերող որևէ բանի դեմ լինի պատգամավորներից որևէ մեկը:

Նա կարևորեց աշխատատեղերի ավելացումը, աշխատավարձերի բարձրացումը, թոշակների ավելացումը, բարեկեցությունը, արտագաղթի դադարեցումը, ներգաղթի խթանումը, նշեց, որ անհրաժեշտ են ներդրումներ, տնտեսական հեղափոխություն, իսկ դա միայն խոսքով չի լինում: Ըստ Ծառուկյանի` պետք է նայել, թե որ երկրում ներդրման ինչ պայմաններ կան, և մեր երկրում էլ պայմանները մի քիչ ավելի նպաստավոր դարձնել, որ ներդրողները գան, ոչ թե իրենք խնդրեն, համոզեն, որ նրանք գան:

Ծառուկյանի խոսքով` պետք է կարողանալ գործարարների հանդեպ ավելի ուշադիր լինենլ, նա նշեց, որ մի շարք երկրներում տնտեսական ճգնաժամի ժամանակ արտոնություն է տրվում գործարարներին, որ չսնանկանան, գործազրկությունը չավելանա, մարդիկ արտագաղթի ճանապարհը չբռնեն, պետբյուջեի բեռն ավելի շատ չլինի, ուստի հարկային օրենսգիրքը պետք է փոփոխության ենթարկվի, որ լիարժեք կարողանան ընդգրկել այդ հարցերը: Ծառուկյանն անդրադարձավ նաև արտաքին քաղաքական ոլորտում մեր երկրի վարելիք քաղաքականության իր տեսլականին: Նրա համոզմամբ` պետք է հզորացնել, զարգացնել Ռուսաստանի հետ կապերը, և ոչ միայն խոսքով:

«Մենք ունենք 3 մլն բնակչություն, ասենք թե, հայրենակիցներ, որոնք այնտեղ աշխատում, ստեղծում են, արարում, զգում են Ռուսաստանը որպես իրենց երկրորդ հայրենիք, ամսական կարողանում են 120-150 մլն դոլար գումար փոխանցել իրենց ընտանիքներին, ծնողներին, դա պետք է հաշվի առնենք, զարգացնենք: Ռուսաստանը միշտ եղել է ռազմական, քաղաքական, տնտեսական մեր գործընկերը, դա պետք է ավելի ամրապնդենք, զարգացնենք»,- ասաց նա:

Ծառուկյանը նշեց, որ պետք է ԵՏՄ անդամ մյուս երկրների հետ էլ համագործակցել, ընդգծեց, որ ԵՄ-ի հետ ունենք տնտեսական հուշագիր, ուստի պետք է կարողանան կամուրջ հանդիսանալ ԵՏՄ-ԵՄ-ԱՄՆ-ի միջև, որ լիարժեք արդյունքների հասնեն: ԲՀԿ առաջնորդը կարևորեց նաև Չինաստանի հետ տնտեսական կապերի հարցը:

«Մեր նախնիների օրոք այդ մետաքսի ճանապարհը եղել է, հինգ տարի այդ հարցը քննարկվում է, այդ կապող օղակը տնտեսության զարգացման համար ամենաճիշտ ճանապարհն է, դա միանգամից մեր տնտեսական կարգավիճակը կփոխի»,- ասաց նա:

ԲՀԿ առաջնորդը շեշտեց նաև Իրանի հետ հարաբերությունների պահպանման, զարգացման կարևորությունը, Արցախի խնդրի կարգավորման անհրաժեշտությունը, առաջին գծում ոչ թե 18 տարեկանների, այլ պայմանագրային փորձառու զինծառայողների ներկայությունը: