Տոնական օրերին Շիրակի մարզում գրանցվել է զբոսաշրջիկների թվի աճ

Ամանորյա տոները Շիրակի մարզում, մասնավորապես Գյումրիում անցկացնել այս տարի նախընտրել են շատ զբոսաշրջիկներ: Հիմնականում ներգնա տուրիզմն է զարգանում: Իսկ ընդհանուր առմամբ, անցած տարի Շիրակի մարզ ավելի քան 40.000 զբոսաշրջիկ է այցելել: Նոր տարին Գյումրիում անցկացրել են նաև ռուսաստանցի շատ զբոսաշրջիկներ, միայն թե այդ օրերին մեծ խնդիր է եղել սպասարկման կազմակերպումը: Տոնական օրերին սպասարկման և այլ ծառայություններ չեն աշխատել: Նոր տարվա օրերին զբոսաշրջիկների հյուրընկալած ընկերություններն ու հյուրատներն անհարմար վիճակում են հայտնվել այն պատճառով, որ հյուրերին չեն կարողացել ցուցադրել պատմական վայրերն ու մշակութային օջախները, համտեսել Գյումրվա խոհանոցի ուտեստները։ Ըստ «Սրտաշյան» հյուրատան հիմնադիր Վարդան Սրտաշյանի՝ եթե զբոսաշրջիկները սխալմամբ Գյումրի գային հունվարի 1-ին կամ 2-ին, ապա հնարավոր է քաղցած մնային, քանի որ քաղաքում բաց ռեստորաններ ու սննդի օբյեկտներ գտնելը շատ դժվար էր։

Իսկ «Տիգրան տուր Գյումրի» զբոսաշրջային ընկերության նախագահ Լևոն Մարտիրոսյանի խոսքերով՝ Գյումրիում այդ օրերին միայն մեկ  ռեստորան է աշխատել։ Բացի դրանից, Գյումրիի պատմական որոշ վայրեր ևս այդ օրերին փակ են եղել, հայտնի զբոսավայրերն այդ օրերին հասանելի չեն եղել զբոսաշրջիկներին։ Օրինակ՝ Սև բերդը գտնվում է Հայաստանի 20 լավագույն զբոսաշրջային տարածքների թվում, որը ևս փակ է եղել։ Այժմ էլ Գյումրիում կան օտարերկրացի հյուրեր, որոնց հետաքրքրում է պատմական կառույցը: Մոսկվայում բնակվող բժիշկ Իգոր Աբդուլաևը կնոջ և որդու հետ ևս եկել էր տեսնելու Սև ամրոցը, մեկ օրում հասցրել էր ծանոթանալ հայերի հյուրընկալությանը։

Նրա խոսքերով՝ իրենք ամեն օր բացահայտում են Հայաստանն ու Գյումրին։ Ուրախ են, որ ճանաչեցին մեր հրաշալի երկիրը և հրաշալի մարդկանց։ Իգոր Աբդուլաևը եղել է աշխարհի 30 երկրներում, առաջին անգամ էր Հայաստանում ու տպավորված էր Գյումրիի ոչ միայն խոհանոցով ու պատմական կառույցներով։ Ասում է, այն, որ քաղաքը կապված է Գյուրջիևի, Ֆրունզիկ Մկրտչյանի, Յուրի Վարդանյանի անվան հետ, մեծ ձեռքբերում է։ Պատգամում է պահպանել և կրկնապատկել այն, ինչ ունենք։ Եթե զարգացնենք զբոսաշրջային ցանցը, ապա նրա համոզմամբ՝ հսկայական թվով զբոսաշրջիկներ կունենանք, իսկ դրա համար մեծ ներուժ ունենք։ Ռուսական կայսրության ժամանակաշրջանի այս կառույցը, ըստ զբոսաշրջիկի, լավագույնն էր, որ բացահայտեց իր որդու համար. բացառիկ լուսանկար՝ 19-րդ դարի պաշտպանական ամրոցում։ Այն նույնիսկ ֆիլիպինցի զբոսաշրջիկների է այս օրերին Գյումրի բերել:

Մնում է լուծել ավելի շատ զբոսաշրջիկներ ընդունելու և մարզի պատմական հարստությունը ցուցադրելու համար տրանսպորտային և այլ ենթակառուցվածքների խնդիրը: Սրանք պատճառներ են, որոնք ազդում են զբոսաշրջիկների հոսքի վրա։ Քաղաքը հիմա հագեցած է հյուրատներով։ Մեծ հյուրանոցներն ընտանեկան միջավայր ստեղծող փոքրիկ բնակարաններով փոխարինելու զբոսաշրջիկների այս նախասիրությունը Գյումրիում բավարարված է։