Շիրակի մարզում տոնական օրերին ահազանգերի թիվն ավելացել է

Տոնական օրերին ճանապարհային ոստիկանության, փրկարար ծառայության,շտապբուժօգնության ու ոստիկանության մասնագետները աշխատել են առանց հանգստյան օրերի: Շուրջօրյա հերթապահության ընթացքում առաջնային սպասարկման ծառայություններում ստացվել են մեծ թվով ահազանգեր: Վերջին մի քանի օրերին ավելացել են վերին շնչուղիների քրոնիկ բարդացումներով բուժհաստատություններ դիմողների թիվը:

«Գյումրի» բժշկական կենտրոն սիրտ-թոքային անբավարարության, վիրուսային ախտանշաններով ու հիպերտոնիկ կրիզներով  հիվանդների հոսքը սկսվել էր անցած տարեվերջից։ Բուժում ստացողների մեծ մասը տոնական օրերն անցկացրել է հիվանդանոցում, ոմանք առաջին անգամ էին առանց  հարազատների ու հիվանդասենյակներում դիմավորել Նոր տարին։

«Այս պահին թերապևտիկ բաժանմունքը «Գյումրի» ԲԿ-ի ամենածանրաբեռնված բաժանմունքն է։ Բավական շատ են նյարդաբանական խնդիրներով ու թոքային խրոնիկ օբստրուկտիվ հիվանդությամբ հիվանդների հոսքը»,- պարզաբանել է «Գյումրի» ԲԿ-ի թերապևտիկ բաժանմունքի վարիչ Լիլիթ Սարգսյանը։

Բժշկական  կենտրոնը 7 օրում 400 հիվանդ է ընդունել, նրանցից 100-ը ստացիոնար բուժում է ստանում։ Սրտաբանական, վիրաբուժական խնդիրներով հիվանդներից բացի, շատ են եղել տրավմաները, ընդունել են նաև հրավառ նյութերից վնասվածքներ   ստացած 4-5 քաղաքացիների։

Գյումրիի շտապ բուժօգնության կայանը դեկտեմբերի 31-ից աշխատել է ծանրաբեռնված ռեժիմով, 4 խմբի փոխարեն հերթապահել է հինգը։

«Կանչերի թիվն ավելացել է, նախկինում օրական ստանում էինք 80 կանչ, բայց տոնական օրերին մինչև 120 զանգ է գրանցվել  կենտրոնում»,- ծանրաբեռնված աշխատանքը այսպես է նկարագրել  Գյումրիի բուժօգնության կայանի գլխավոր բուժքույր Հռիփսիմե Մելիքսեթյանը։

Նոր տարվա 7 օրում գրանցված վթարների թիվը նախորդ տարվա նույն ժամանակահատվածի համեմատ, ըստ վիճակագրության, նվազել է: Բայց անցած տարվա վերջին օրը՝ դեկտեմբերի 31-ին, միայն գրանցվել էր 30-ից ավելի պատահար։ Ճանապարհային ոստիկանության շուրջօրյա հերթապահության և ուժեղացված ծառայության արդյունքում տուգանային հրապարակ են տեղափոխվել տասնյակ մեքենաներ։

«Շիրակի մարզում գրանցվել է 22 նյութական վնասով ՃՏՊ, տուգանային հրապարակ են տեղափոխվել ոչ սթափ վիճակում գտնվող 21 վարորդներ, նրանք բոլորն էլ ենթարկվել են վարչական պատասխանատվության»,- Ճանապարհային ոստիկանության վիճակագրությունն է ներկայացրել տեսուչ Արմեն Պողոսյանը։

Շիրակի մարզային փրկարարական վարչության ճգնաժամային կառավարման կենտրոն ստացված ահազանգերի մեծ մասը եղել է տեղեկատվական բնույթի ու հիմնականում մարդիկ հետաքրքրվել են ճանապարհների վիճակով: Եղել են նաև փակ դռներ բացելու կանչեր ևս, իսկ գրանցված մահվան դեպքերը եղել են ճանապարհատրանսպորտային պատահարների պատճառով:

«Արձագանքել ենք 13 դեպքերի, ունեցել ենք հրդեհի 4 դեպք, շմոլ գազով թունավորման մեկ դեպք 5 տուժածով, նախորդ տարվա 2 դեպք՝ 8 տուժածի համեմատ»,- պարզաբանել է Շիրակի մարզային փրկարարական վարչության ՃԿԿ պետ Մարտին Մկոյանը։

Տոնական օրերին ուժեղացված ծառայություն իրականացրած կառույցներն արդեն ամփոփում են մեկ շաբաթում գրանցված կանչերի տվյալները, որոնք նախորդ տարվա նույն ժամանակահատվածի համեմատ ավելացել են: Գյումրիում այդ օրերին գրանցվել է նաև բնակարանային գողության մի քանի դեպք, կողոպտիչները հիմնականում թիրախավորել են այն բնակարանները, որոնք Նոր տարվա մի քանի օրերին փակ են եղել: