Ինչո՞ւ են ինքնաբացարկ ներկայացրել «Իմ քայլը» դաշինքի թեկնածուներն ու ի՞նչ իրավիճակ է մյուս քաղաքական ուժերում

Ինչո՞ւ են ինքնաբացարկ ներկայացրել «Իմ քայլը» դաշինքի թեկնածուներն ու արդյո՞ք խորհրդարան անցած մյուս քաղաքական ուժերում ևս պատգամավորական մանդատից հրաժարվողներ կան: SHANTNEWS.am-ը փորձել է ստանալ այս հարցերի պատասխանները:

Պատգամավորի մանդատից հրաժարված միայն մեկ անուն է հայտնի

Կենտրոնական ընտրական հանձնաժողովը երեկ  հայտարարեց, որ «Իմ քայլը» դաշինքից 18 թեկնածու հրաժարվել է պատգամավորի մանդատից: Ովքե՞ր են ինքնաբացարկ ներկայացնող թեկնածուները, «Քաղաքացիական պայմանագիր» կուսակցությունից առայժմ փակագծերը չեն բացում. հնարավոր է փոփոխություններ լինեն: Միայն ասում են՝ ցանկում վարչապետի պաշտոնակատար Նիկոլ Փաշինյանը կա:

«Երբ վարչապետը վերջնականապես նոր կառավարության կազմի հետ կապված կկողմնորոշվի և հստակ լինի, այդ ժամանակ անուններով հայտնի կլինեն ինքնաբացարկ ներկայացրած մեր գործընկերները»,- ասել է ՔՊ վարչության անդամ Վահագն Հովակիմյանը:

Ինչո՞ւ «Իմ քայլը» խմբակցության թեկնածուները հրաժարվեցին պատգամավորի մանդատից

Ի՞նչն է եղել թեկնածուների ինքնաբացարկի պատճառը, Վահագն Հովակիմյանը պարզաբանում է՝ թեկնածուները լինելու են գործադիրի կազմում:
Հայտնի է՝ գործող կառավարության անդամներից շատերը մասնակցել են արտահերթ խորհրդարանական ընտրություններին և, ըստ երևույթին, նրանց մի մասը ցանկություն է հայտնել շարունակել իր գործունեությունը ոչ թե խորհրդարանում, այլ կառավարությունում:

Հնարավոր է՝ «Իմ քայլում» նոր ինքնաբացարկներ լինեն: Հովակիմյանը չի բացառում: Պատգամավորական մանդատից հրաժարվել, որոշման փոփոխության դեպքում էլ կրկին վերականգնել այն հնարավոր է Կենտրոնական ընտրական հանձնաժողովի նշած ժամկետներում՝ մինչ հունվարի 4-ը:

«Բարգավաճ Հայաստան»-ում  ու «Լուսավոր Հայաստան»-ում դեռ մանդատներից հրաժարվողներ չկան

Խորհրդարան անցած մյուս քաղաքական ուժերից ինքնաբացարկի դիմումներ չեն ստացել Կենտորնական ընտրական հանձաժողովում: Նաիրա Զոհրաբյանի խոսքով՝ «Բարգավաճ Հայաստան»-ում պատգամավորական մանդատից հրաժարվող թեկնածուներ այս պահին չկան: Արդյո՞ք «Լուսավոր Հայաստան»-ից կլինեն ինքնաբացարկներ, կուսակցությունում չեն շտապում մեկնաբանել:

Ընդդիմության առաջադրած մեկ ԱԺ փոխնախագահի անուն է առայժմ հայտնի

«Բարգավաճ Հայաստան»-ը խորհրդարանում կլինի գրեթե նույն կազմով: Թեկնածուներից միայն 5-ի անունն է նոր հնչելու կազմավորվող խորհրդարանում: Նաիրա Զոհրաբյանը համոզված է՝ խմբակցության ղեկավարը Գագիկ Ծառուկյանն է լինելու: Իսկ թե ում կառաջադրեն Ազգային ժողովի փոխնախագահի պաշտոնում, դեռ չեն հայտարարում:

«Լուսավոր Հայաստան»-ն արդեն ունի Ազգային ժողովի փոխնախագահի իր թեկնածուին՝ Աշխատանքի և սոցիալական հարցերի նախկին նախարար Մանե Թանդիլյանն է:

«Լուսավոր Հայաստան»-ում դեռ չեն որոշել՝ ով է լինելու խմբակցության ղեկավարը:

«Իմ քայլի» թեկնածուներն արդեն հայտնի են

Ապագա խորհրդարանում մեծամասնություն կազմող խմբակցությունում արդեն որոշել են ԱԺ նախագահին ու փոխնախագահներին: «Իմ քայլը» դաշինքը ԱԺ նախագահի պաշտոնում առաջադրել է  փոխվարչապետի պաշտոնակատար Արարատ Միրզոյանի, իսկ փոխնախագահների պաշտոնում՝ Լենա Նազարյանի ու Ալեն Սիմոնյանի թեկնածությունները: Խմբակցության ղեկավարի թեկնածուն Լիլիթ Մակունցն է:

Թե երբ կլինի խորհրդարանի առաջին նիստը՝ դեռ հայտնի չէ, որոշումն ընդունելու է Կենտրոնական ընտրական հանձնաժողովը:

Խորհրդարան անցած քաղաքական ուժերը՝ ըստ մանդատների քանակի

Հեղինակ՝ Արտակ Խուլյան

Ինֆոգրաֆիկան՝ Վրեժ Նալբանդյանի