Քանի՞ անգամ է բյուջեի այսպիսի հանրային քննարկում եղել. Հայկ Մարության

Երևանի քաղաքապետ Հայկ Մարությանը դեկտեմբերի 25-ին լրագրողների հետ ճեպազրույցում անդրադարձավ Ավագանու «Լույս» դաշինքի անդամ Անի Խաչատրյանի հետ ունեցած բանավեճին:

«Երբ ելույթի մեջ ուղղակի ասվում է կեղծ տեղեկատվություն, ասվում է` գիտեք ինչ կա, ասել եք այսպես, երկու տարի հետո նոր կսկսեք… այսպիսի բան երբեք չի ասվել: Ասում են` «ինչո՞ւ է բրիտանական ընկերության այս զեկույցը վատը»: Կներեք, ես այդ ժամանակ ոչ Ավագանու անդամ էի, ոչ մեծ առումով քաղաքականության մեջ էի: Ես ակտիվիստ եմ, և այն, ինչ արել են այդ մարդիկ` թեկուզ փոքր գումար ստանալով, ես արել եմ անվճար, պետք չէ ասել` սա այսպես, սա այնպես: Ինձ մեղադրում են, թե ինչու է այս բրիտանական ընկերության զեկույցն այսպիսին… կներեք, ես ավելի շատ մեղադրելու տեղ ունեմ»,- ասաց նա:

Հարցին՝ ո՞ւմ է մեղադրելու, նա արձագանքեց.

«Բոլորին»:

Մարությանը շեշտեց` Ավագանու անդամներից մեկն ասել է, որ ինքը հանձնաժողովի անդամ է եղել, աշխատել են, ապա նշեց` երբ լինում ես հանձնաժողովի կազմում, կարևոր չէ` դու հանձնաժողովի անդամ ես ընդդիմությունի՞ց, թե՞ իշխանությունից, այդ խնդիրները պետք է ի հայտ բերվեն:

Քաղաքապետը կարծում է, որ բյուջեի հանրային քննարկումն արդեն իսկ քայլ առաջ է:

«Ի՞նչ եք կարծում, քանի՞ անգամ է բյուջեի, ծրագրի այսպիսի հանրային քննարկում եղել, վստահեցնում եմ` չի եղել: Քաղաքացիներին որ հարցնեք, որոնք եկել են այստեղ, ՀԿ-ներին, տարբեր օղակների, անհատներին, ձեռնարկատերերին, ովքեր եկել են, արել են առաջարկներ, իրենց առաջարկները տեղ են գտել մինչև վերջ չմշակված փաստաթղթի մեջ, իսկ վերջնաժամկետին` մարտին, երեք ամիս ժամանակ է լինելու, բոլորը գալու են, մասնակցեն, իրապես բոլորի լավ առաջարկները ներառվելու են»,- ասաց նա:

Լրագրողները նշեցին` նախկինում ևս առաջարկները ներառվում էին, սակայն քննարկումից հետո մերժվում, ինչին Երևանի քաղաքապետն արձագանքեց.

«Որովհետև առաջ այդ առաջարկը, որ լավ էր քաղաքի համար, վատ էր մեկի բիզնեսի համար, որ իշխանության մեջ էր: Տրանսպորտի համակարգն այսքան երկար ինչո՞ւ է ձգվել. մարդիկ գծած գծեր են ունեցել, գծատերեր են եղել, իրենց ձեռք չէր տալիս, որ նոր համակարգ լինի, մեզ ձեռնտու է, որ օր առաջ լինի այդ համակարգը, քանի որ ոչ մի գծի հետ մենք կապ չունենք: Սա շատ մեծ առաջընթաց է, որ լսվում են բոլորը, և յուրաքանչյուր լավ առաջարկ մտնում է ծրագրի մեջ, որովհետև ոչ մի շահ, բացի նրանից, որ երևանցու համար լավ լինի, մենք չունենք»:

Դիտարկմանը, թե խոսելով Ավագանու անդամների` 55 հազար դրամ աշխատավարձ ստանալու և չաշխատելու մասին, Մարությանն արդյոք գիծ չի քաշում իրենց միջև, քաղաքապետը պատասխանեց.

«Գիծ են քաշում այն ժամանակ, երբ դուրս են գալիս ելույթ ունենալու, 100 տոկոսանոց սուտ են ասում, դրա վրա ուզում են դիվիդենտներ հավաքել: Սուտն այն է, որ ես ասել եմ, թե երկու տարով ձգձգվելու է, հետաձգվելու է տրանսպորտի հարցի լուծումը, բացարձակ այդպիսի խոսակցություն չկա:

Ասվել է, որ առնվազն այդքան պետք է ներդրման համար, եթե այսօր սկսում ենք աշխատանքը, եթե հենց հիմա 1 մլրդ ԱՄՆ դոլար ունենանք, տանք որևէ գործարանի, ասենք 845 ավտոբուս մեզ տուր, առնվազն 6 ամիս մեզանից կպահանջեն, որ այդ ավտոբուսները արտադրվեն: Երկու տարի ժամանակ է պետք, որ դա ներդրվի, առնվազն երկու տարուց ավտոբուսները կլինեն քաղաքի փողոցներում»: