Գյումրիում շահագործվել է 12 բնակարան և 2 մանկապարտեզ

Գյումրիի Անի թաղամասում շահագործման են հանձնվել «Առդա» բարեգործական հիմնադրամի աջակցությամբ կառուցված 12 սոցիալական բնակարանները: Ծրագիրը մոտ 100 մլն դրամ է արժեցել, որի 15 տոկոսի ներդրումը եղել է քաղաքապետարանինը: Քաղաքապետարանի համաֆինանսավորմամբ կառուցվել է մեկ մանկապարտեզ, ևս մեկն էլ վերանորոգվել է։ Այսօր բացման արարողությունն էր։ Շինարարությունն իրականացվել է տարածքային զարգացման հիմնադրամի միջոցներով: Միջոցառումներին ներկա է գտնվել տարածքային կառավարման նախարարի պաշտոնակատար Սուրեն Պապիկյանը:

Մովսես Խորենացի հասցեի շենքի մի մասը՝ 11 սոցիալական բնակարաններով, շահագործվել էր դեռ անցած տարի: Այժմ ավարտին է հասցվել շենքի մյուս մուտքի կառուցումը, որը 12 բնակարանից է բաղկացած: 9 բնակարան հատկացվել է միայնակ տարեցների, իսկ 3-ը՝ բազմանդամ ընտանիքների: Նրանք էլ 1 օրում հասցրել էին նոր տուն տեղափոխվել, 30 տարի անց ապրելու են կոմունալ բոլոր հարմարություններով բնակարաններում: «Առդա» բարեգործական հիմնադրամը կհոգա նաև ընտանիքների 6 ամսվա կոմունալ վճարումների հարցը: Դա եղել է նաև անցած տարի հանձնված բնակարանների դեպքում: Բնակարանների կառուցման 2 փուլն էլ իրագործվել է ամերիկահայ բարերարներ Սարգիս և Նունե Սեփեջյանների ֆինանսավորմամբ, կառուցվել է Նունե Սեփեջյանի հոր հիշատակին: Նա մի քանի տարի ապրել է Գյումրիում: Ըստ «Առդա» բարեգործական հիմնադրամի գործադիր տնօրեն Հրահատ Ստեփանյանի` Սեփեջյանների ընտանիքը ստանձնել է նաև շենքի 3-րդ մասի կառուցումը, որը հնարավոր է` ավարտվի հաջորդ տարի և բնակարանով կապահովի ևս 18 ընտանիքի:

«Նանուլիկ» մանկապարտեզը Գյումրիում եղած տնակային այն 4 մանկապարտեզներից մեկն էր, որի համար երկու տարի առաջ որոշվեց նոր շենք կառուցել: Տարածքային զարգացման հիմնադրամը 149 մլն դրամ է հատկացրել այդ նպատակին, որից 10 մլն դրամը քաղաքապետարանի ներդրումն է: Այժմ Կոշտոյան թաղամասն ունի քարաշեն մանակապարտեզ՝ հագեցած նոր գույքով: Վերջապես շահագործման հանձնվեց նաև Նորավան թաղամասի «Արևիկ» մանկապարտեզը: Սանիտարական վատ պայմաններ ունենալու համար մանկապարտեզը ժամանակավորապես փակվեց, որն էլ տևեց 3 տարի: Մանկապարտեզի շահագործմանն անընդհատ խոչընդոտող հանգամանքներ եղել են:

Տնօրենի խոսքերով՝ շինարարությունը ժամանակ առ ժամանակ դադարեցվել է, հետո վերսկսվել: Վերջապես 2 տարում այն ավարտին հասցվեց։ Մանկապարտեզի բացման արարողության ժամանակ տարածքային կառավարման և զարգացման նախարարի պաշտոնակատար Սուրեն Պապիկյանը հայտարարեց, որ կառավարությունն իր առջև խնդիր է դրել՝ մինչև 2019 թվականի ավարտը Գյումրիում այլևս չունենալ վերակառուցվող և վերանորոգման ենթակա մանկապարտեզ:

«Արևիկ» մանկապարտեզը նաև նոր գույք ունի: Իր սաներին կորցրած նախակրթարանը նորից հավաքագրումներ է սկսել, մոտ 60 երեխա ունեն արդեն: Իսկ արդյոք Գյումրիում հնարավոր է նախակրթարանները դարձնել անվճար ինչպես Երևանում է, հարցի պատասխանը բոլորն ակնկալեցին տարածքային կառավարման և զարգացման նախարարի պաշտոնակատարից: Սուրեն Պապիկյանը հայտնեց, որ ինքը հակված է, որ Հայաստանում արտոնյալ քաղաքներ չլինեն ու եթե կա գումարի ավելցուկ, ապա այն պետք է ուղղվի այլ քաղաքների զարգացմանը: Ու ոչ թե պետք է քաղաքա առ քաղաք, կամ մարզ առ մարզ մանկապարտեզները դարձնել անվճար, այլ պետք է փոխել Երևանի վերաբերմունքն այս հարցում: Ըստ նրա՝ այդ գումարները ծախսելու այլ տեղեր կան: Աղետի գոտում դեռ վերացված չեն տնակային մանկապարտեզները, տնակային դպրոցներն ու տնակային կացարանները: Գյումրիում դեռ 3 մանկապարտեզ կա, որոնք տնակներում են, իսկ նորերի կառուցման հստակ ծրագրեր դեռ չկան: Քաղաքապետն էլ հավաստիացրեց, թե Գյումրիում ևս 2 մանկապարտեզ բացելու անհրաժեշտություն կա , 2-ն էլ Մուշ 2-2՝ նորակառույց թաղամասում: