Տներ և բժշկական կենտրոն Արմավիրի մարզում, բնակարանաշինություն` Գյումրիում. ինչպես են ծախսվելու «Հայաստան» համահայկական հիմնադրամի միջոցները

«Արմավիրի մարզի Նալբանդյան գյուղում տներ ու բժշկական կենտրոն կկառուցվի»,- այս մասին դեկտեմբերի 14-ին կայացած ասուլիսի ժամանակ ասաց «Հայաստան» համահայկական հիմնադրամի տնօրեն Հայկակ Արշամյանը:

Ամփոփելով հիմնադրամի 2018թ.-ի դրամահավաքի արդյունքները՝ նա նշել է, որ այս տարի փայլուն արդյունք է գրանցվել Տորոնտոյում, որտեղ 1 մլն դոլար է հավաքագրվել: Նախորդ տարիներին Տորոնտոյից հավաքված գումարը չի գերազանցել 650 000 դոլարը: Նվիրաբերված գումարից 740 000 դոլարը հանգանակել են Արմեն և Պերճուհի Նալբանդյանները:

«Իմանալով, որ Հայաստանում իրենց ազգանունով գյուղ կա, իրենց ձեռքի տակ են վերցրել գյուղը և որոշել են այնտեղ տներ ու բժշկական կենտրոն կառուցել»,- տեղեկացրեց Արշամյանը:

Հիմնադրամի տնօրենը պարզաբանեց, որ կան ազատ միջոցներ, ինչն ազգային տուրք է, և շատերը պարզապես նվիրաբերում են, և հիմնադրամն է որոշում դրանց ուղղվածությունը, սակայն մեծ դոնորները գումար են նվիրաբերում կոնկրետ ծրագրերի համար:

«Օրինակ, Իրանի կողմից նվիրաբերված 1 մլն 300 հազար դոլարն ուղղվելու է Արցախ՝ Թալիշի մոտ գտնվող ճանապարհի շինարարության վրա ներդնելու համար, այնտեղ շրջանցիկ ճանապարհ պետք է կառուցվի, որը մեծ ծրագիր է, և Արցախի կառավարությունը կհամաֆինանսավորի: Անդրանիկ Բաղդասարյանի նվիրաբերած 1 մլն դոլարը կծախսվի Արցախի Գետավան համայնքում իրականացվող շինարարության վրա, իսկ Սամվել Կարապետյանի նվիրաբերած գումարի մեծ մասը կծախսվի Արցախում կառուցվող երիտասարդական կենտրոնի, ինչպես նաև 4-րդ երեխա ունեցող ընտանիքներին ֆինանսական աջակցություն ցուցաբերելու համար»,- ասաց Արշամյանը:

Լիբանանի հայ համայնքի նվիրաբերած գումարն Սպիտակի երկրաշարժի 30-րդ տարելիցի առիթով կուղղվի Գյումրիում  բնակարանաշինությանը կամ բնակարան ձեռք բերելուն:

Շարունակվելու է «Գյումրին առանց տնակների» ծրագիրը, որի շրջանակներում արդեն 41 ընտանիք նոր բնակարան է ստացել՝ վերանորոգված, կահավորված և տեխնիկայով հագեցած, մինչև Նոր տարի ևս մի ընտանիք բնակարան կստանա: Շահառուներն ընտրվել են տեղի քաղաքային իշխանության հետ համագործակցությամբ: Քննարկվում են այն ձևաչափերը, որոնց շնորհիվ Գյումրիի ծրագիրն ավելի արդյունավետ կդառնա, և կարճ ժամանակահատվածում հնարավոր կլինի առավել մեծ թվով շահառուների ընդգրկել:

«Քանի որ մեծ գումարներ ունենք նաև նախորդ տարիներից հավաքագրված, մտածում ենք՝ գուցե փորձենք ուղղակի թաղամաս կառուցել Գյումրիում և այդ գործունեության մեջ ներգրավել նաև բարերարներին և գործարարներին, ովքեր նման ծրագրեր արդեն իրականացրել են»,- նշեց Արշամյանը:

Փարիզի քաղաքապետի կողմից նվիրաբերված գումարն էլ ուղղվելու է Կողբում Թումոյի կենտրոնի գործունեությունն ընդլայնելուն:

Ինչ վերաբերում է Հիմնադրամի աշխատանքներին, ապա Արշամյանը տեղեկացրեց, որ կառույցի աշխատանքներն առավել թափանցիկ և արդյունավետ դարձելու համար ներդրվելու են կառավարման նոր համակարգեր: