Նոր Գեղիում նոր համայնքապետի հրաժարականն են պահանջում. կողմերի պարզաբանումները

Կոտայքի մարզի Նոր Գեղի համայնքում իրավիճակը շարունակում է լարված մնալ: Ամիսներ առաջ համայնքը 32 տարի շարունակ ղեկավարած գյուղապետ Ֆրոնտիկ Թևոսյանը հրաժարական էր տվել: Մինչև համայնքապետի ընտրությունները համայնքապետի ժամանակավոր պաշտոնակատար էր նշանակվել Վարդան Պապյանը, բայց այժմ համայնքում նախկին համայնքապետի համակիրները ցանկանում են, որ վերջինս նույնպես հրաժարական տա:

SHANTNEWS.am-ի հետ զրույցում Նոր Գեղիի համայնքապետարանի հաշվապահը, որը չցանկացավ հայտնել իր անունը, ասաց, որ ամբողջ խնդիրն այն է, որ Նոր Գեղիի ներկայիս համայնքապետի պաշտոնակատարն աշխատանքից ազատված է ըստ ՏԻՄ-երի վարչության պետի հայտարարության, և որոշումը կա:

«Բայց նույն օրը երեկոյան Կոնտայքի մարզպետը հայտարարում է, որ ազատված չէ, այսինքն՝ հանգամանքներ կան և փոշմանել ենք, չենք ազատում: Այդ հանգամանքներն էլ էն են, որ իբր նախկին գյուղապետը փողեր է յուրացրել, և հենց դրա համար ներկայիս համայքապետին չեն ազատել»,- ասաց հաշվապահը:

Ի դեպ, տղամարդը մեզ հետ զրույցում շեշտեց, որ եթե ներկայիս համայնքապետը շարունակի պաշտոնավարել, ապա ինքը չի ցանկանում նրա հետ աշխատել:

Հաշվապահը հավելեց, որ իրենք ստորագրահավաք են սկսել. արդեն 1444 ստորագրություն կա, որի նպատակն է պահանջել ներկայիս համայնքապետի հրաժարականը: Ըստ նրա՝ Վարդան Պապյանի փոխարեն թող ցանկացած այլ մարդ լինի, իրենք կհամաձայնվեն:

SHANTNEWS.am-ի այն հարցին, թե այս ընթացքում նորանշանակ համայնքապետն ինչ աշխատանքներ է կատարել գյուղում, հաշվապահը պատասխանեց, որ «դե մի թեթև աշխատանքներ կատարել է, որոշ մարդկանց էլ գործից ազատել է»:

«Եթե համայնքի փողոցային լուսավորության անցկացման մասին են ասել, ապա դա շատ սուտ ա: Ընդամենը մի քանի հատ լուսատուներ է փոխվել, գումարն էլ համայնքի բյուջեից ու ինչ-որ հասարակական կազմակերպություններից»,- ասաց նա:

SHANTNEWS.am-ը խնդրի առնչությամբ զրուցել է նաև Նոր Գեղիի ներկայիս համայնքապետ Վարդան Պապյանի հետ, որի հավաստմամբ՝ մեզ հետ զրուցած հաշվապահը նախկին գյուղապետ Ֆրոնտիկ Թևոսյանի ազգականն է՝ Անդրանիկը:

Վարդան Պապյանը պատմեց, որ համայնքապետարանում հիմնականում «աշխատել են» նախկին գյուղապետի ազգականները ու ոչնչի դիմաց աշխատավարձ ստացել: Համայնքապետի ժամանակավոր պաշտոնակատարը շեշտեց, որ ինքը երբևէ խնդիրներ չի ունեցել նախկին գյուղապետի ու նրա համակիրների հետ, պարզապես վերջիններս ցանկանում են իրենց հին իշխանությունը գյուղում վերահաստատել:

Վարդան Պապյանը պատմեց, որ ընդամենն  ամիս է ինչ համայնքապետ է և այդ ընթացքում գյուղի համար շատ բան է արել և այդ ամենը ներկայացված է համայնքի ֆեյսբուքյան էջում:

«Ես հիմա օրենքով իրականացնում եմ իմ լիազորությունները, իրականացնում եմ պատշաճ, առանց որևիցե խախտումների: Չկա էդպիսի մի հանգամանք, որը ունենա տրամաբանություն և ստիպի ինձ, որ ես հրաժարական տամ: Եթե ես հասկանայի, որ ինչ-որ բան սխալ եմ անում, ապա հրաժարական կտայի, քանի որ այդ աթոռն ինձ համար ընդամենը միջոց է և ոչ թե նպատակ»,- ասել է Վարդան Պապյանը:

Երկու ամսից գյուղում սպասվում են ՏԻՄ ընտրություններ, և Վարդան Պապյանը պատրաստվում է իր թեկնածությունը դնել, բայց նաև տեղյակ է, որ նախկին գյուղապետի համակիրներից էլ են թեկնածություն դնելու և դա շատ նորմալ է համարում՝ ակնկալելով առողջ մրցակցություն:

Մենք զրուցեցինք նաև Նոր Գեղիի բնակիչներից մեկի հետ, որը, չցանկանալով հրապարակել իր անունը, պատմեց, որ գյուղում լարված իրավիճակը շարունակվում է: Այսօր ևս նախկին գյուղապետի՝ Ֆրոնտիկ Թևոսյանի համակիրները փակել են գյուղի խաչմերուկը՝ խոչընդոտելով մեքենաների տեղաշարժին: Գյուղ մուտք գործող երթուղային տաքսիներն օգտվում են շրջանցիկ ճանապարհներից:

Իսկ լարվածությունն առաջացել էր օրեր առաջ, երբ նախկին գյուղապետի կողմնակիցները դաժան ծեծի էին ենթարկել իրենց տարեց համագյուղացուն, որը փորձել էր պաշտպանել նորանշանակ ղեկավարին: Տարեց տղամարդու քրոջ որդին, տեսնելով, թե ինչպես են ծեծում իր քեռուն, դանակահարել էր 4 հոգու: Դրանից հետո գյուղ էր այցելել նաև Կոտայքի մարզպետի տեղակալը՝ փորձելով հանդարտեցնել կրքերը:

Մեր զրուցակիցը տեղեկացրեց նաև, որ գյուղում կրքերը թեժացել են այն բանից հետո նաև, երբ Ֆրոնտիկ Թևոսյանը, որը, որպես պատգամավորության թեկնածու, առաջադրվել էր «Բարգավաճ Հայաստան» կուսակցությունից, չի կարողացել հայտնվել խորհրդարանում, և նրա կողմնակիցները չեն կարողանում մարսել փաստը, որ Վարդան Պապյանը իրենց համագյուղացին չէ:

Լուրերի համաձայն՝ Նոր Գեղիի համայնքապետի պաշտոնի համար պայքարելու է նաև Ֆրոնտիկ Թևոսյանի մորաքրոջ տղան, և ողջ խնդիրը գյուղը Թևոսյանների ազդեցության գոտում պահելու խնդիրն է: