Գյումրիի թիվ 18 դպրոցում դասերը դադարեցվել են

Գյումրիի թիվ 18 միջնակարգ դպրոցին լրացուցիչ մեկամսյա արձակուրդ է տրվել: Նման որոշում է կայացվել այն բանից հետո, երբ դպրոցի հանրույթը և ծնողները բարձրաձայնեցին ջեռուցման բացակայության մասին ու դասադուլ հայտարարեցին: Դպրոցի կաթսայատունը շարքից դուրս է եկել, շահագործումն անվտանգ չէ: Լրացուցիչ արձակուրդը տրամադրվել է այնքան ժամանակով, որքան անհրաժեշտ է ջեռուցման նոր համակարգ անցկացնելու համար: Ձմռանն ընդառաջ այս գործընթացը սկսելու պատճառները 18 տարի բարձրաձայնվող խնդրի նկատմամբ մինչ այս եղած անգործությունն է:

Լրացուցիչ արձակուրդները միակ ելքն էին դպրոցում ստեղծված իրավիճակը հանգուցալուծելու համար: Դպրոցում ջեռուցում չկա, ծնողները հրաժարվում են երեխաներին դպրոց ուղարկել: Մանկավարժներին ու աշակերտներին, Կրթության ու գիտության նախարարության թույլտվությամբ, արձակուրդ են ուղարկել դասադուլային տրամադրությունները հանդարտեցնելու նպատակով, իսկ այդ ժամանակը կօգտագործեն շինմրցույթ հայտարարելու և դպրոցում ջեռուցման նոր համակարգ անցկացնելու համար:

Ինչո՞ւ է ջեռուցման խնդիր առաջացել մի դպրոցում, որը կաթսայատուն ունի. պատճառն այն է, որ դպրոցը կառուցվել ու շահագործման առաջին օրվանից էլ պարզվել է, որ կաթսայատունը շինարարական թերություններ ունի: 18 տարվա ընթացքում դպրոցի նախկին ու ներկայիս տնօրենները բարձրաձայնել են, որ կաթսայատունը շահագործելն անվտանգ չէ, բայց ահազանգին արձագանք չի եղել:

«10 տարի դիմել ենք պատկան մարմիններին: Եկել-նայել են, ցույց ենք տվել, որ չկա անվտանգության ոչ մի երաշխիք, համակարգն ավտոմատացված չէ: Վտանգավոր է, շահագործման համար ոչ պիտանի: Անգամ հնոցապանն է շահագործման ընթացքում ձեռքերի այրվածք ստացել»,- SHANTNEWS.am-ի հետ զրույցում ասել է թիվ 18 դպրոցի տնտեսվար Գագիկ Մարտիրոսյանը:

Շիրակի մարզպետարանի կրթության վարչությունում էլ են տեղյակ խնդրին: Անցած տարի ևս ջեռուցման սեզոնին դպրոցում խնդիր է առաջացել, իսկ այս տարի արդեն կաթսայատան շահագործումն անհնար է դարձել:

«Խնդիրը մեկ օրում չի սկսվել և մեկ օրում չի առաջացել: Տարիների ընթացքում մաշվածության հաշվին եկել, հասել ենք այնպիսի մի վիճակի, որ այլևս հնարավոր չէ շահագործել: Նախորդ տարի էլ ունեցանք խնդիր, որ կաթսայատունը հնարավոր չէր շահագործել: Մի կերպ կարողացանք ձմեռն անցկացնել, իսկ հիմա շահագործումն անվտանգության խնդիր կառաջացներ»,- SHANTNEWS.am-ի հետ զրույցում ասել է Շիրակի մարզպետարանի կրթության վարչության պետ Հրայր Կարապետյանը:

Երկու հնոց է կաթսայատանը տեղադրված: Դրանցից մեկը 2 տարի առաջ է շարքից դուրս եկել, անցած տարի էլ երկրորդն է խափանումներով սկսել աշխատել, որից հետո ջեռուցման նոր համակարգ անցկացնելու համար նախագիծ է կազմվել: Ավելի ուշ պարզվել է, որ նախագիծը թերություններ ունի: Այս ընթացքում քննարկվել է նաև դպրոցը էլեկտրականությամբ ջեռուցելու տարբերակը: Պարզվել է՝ շինարարները ժամանակին այնպիսի մալուխներ են անցկացրել, որոնք թույլ չեն տալիս էլեկտրական ջեռուցիչներ օգտագործել:

Շիրակի մարզպետարանի կրթության վարչության պետի խոսքերով՝ արձակուրդի ժամկետը բավարար է ջեռուցման նոր համակարգ անցկացնելու համար, առավել ևս, որ նոր կաթսայատուն չի կառուցվելու: Ըստ նախագծի՝ լոկալ ջեռուցման այլ տարբերակ են ներդնելու՝ 6 կաթսա է տեղադրվելու դպրոցում, իսկ լրացուցիչ արձակուրդի օրերը դպրոցում լրացնելու են գարնանային արձակուրդների և հնգօրյա դպոցական շաբաթը վեցօրյա դարձնելու հաշվին: