«Ղեկը աջ» նախաձեռնությունը դեռ սպասում է խոստացած հայտարարությանը

SHANTNEWS.am-ն արդեն տեղեկացրել է, որ նոյեմբերի 3-ին ՀՀ տրանսպորտի, կապի և ՏՏ նախարարի պաշտոնակատարի տեղակալ Արմեն Փամբուխչյանն իր ֆեյսբուքյան էջում գրել է, թե  խնդրահարույց աջ ղեկերի ներմուծման վերջնարդյունքի մասին հայտարարությամբ հանդես կգան առաջիկա օրերին:

Որքա՞ն են պատրաստվում սպասել. հարցն ուղղել ենք «Ղեկը աջ» նախաձեռնության անդամ Արթուր Միսակյանին, որն ասել է, որ կարծում է՝ պատասխանը կլինի առաջիկա երկու օրերին, շատ չի ուշանա: Ինչ վերաբերում է հարցին, թե որ դեպքում նախաձեռնությունը խնդիրը լուծված կհամարի, նա պատասխանել է, որ դա կախված է նրանից, թե ինչ կհայտարարեն և ինչ լուծում կգտնեն նախարարությունը կամ գերատեսչությունները միասին:

«Կախված է այն հանգամանքից, թե նրանք լուծման ինչ տարբերակ կառաջարկեն, ըստ այդմ, մենք կարող ենք խոսել, թե խնդիրը որքանով լուծվեց կամ չլուծվեց»,- ասել է Միսակյանը:

Հիշեցնենք, որ ՊԵԿ-ից առաջարկ է եղել աջ ղեկով մեքենաները ներմուծել Հայաստան, բայց չշահագործել այնքան ժամանակ, քանի դեռ ղեկը փոխված չէ, իսկ ղեկը փոխելու համար սահմանել մեկ տարի ժամկետ: Օրեր առաջ իրենց առաջարկն էին ներկայացրել նաև «Ղեկը աջ» նախաձեռնության անդամները:

SHANTNEWS.am-ի առաջարկով Արթուր Միսակյանը հիշեցրել է այդ տարբերակների մասին.

«Կա երկու մոտեցում.

1. Մեքենան բերվի, Հայաստանում ղեկը փոխվի ձախ: Մենք դա ի գիտություն ընդունել ենք՝ կարող է նաև էստեղ փոխվել, ի՞նչ տարբերություն, մարդիկ գնում, Վրաստանում են փոխում, նոր ներմուծում, թող Հայաստանում ղեկը փոխեն, այդ գումարն էլ դուրս չի գա մեր երկրից:

2-րդ մոտեցումն է, որ մարդիկ կան, որ արդեն ձեռք են բերել կամ չեն ուզում փոխած ղեկով վարել, այդ մարդկանց հնարավորություն տրվեր ձախ ղեկով ներմուծել և վերասարքավորում անել, բերել հին գործարանային վիճակին: Վերասարքավորման համար մենք առաջարկում ենք կառավարության որոշումներից մեկի մեջ կատարել փոփոխություն՝ աջ ղեկը համարել ոչ թե տեխնիկական անսարքություն, այլ դա հանել»:

Հարցին՝ Հայաստանում կա՞ն անհրաժեշտ քանակությամբ մասնագետներ, որպեսզի մեքենայի ղեկը փոխելու համար այստեղ էլ հերթեր չգոյանան, «Ղեկը աջ» նախաձեռնության անդամն այսպիսի պատասխան է  տվել.

«Նախկինում, երբ աջ ղեկով մեքենաները ներմուծվում էին Հայաստան, կային բազմաթիվ մասնագետներ, որոնք կատարում էին ղեկի փոփոխություն: Այդուհանդերձ, չեմ կարող պնդել, որ այնքան շատ մասնագետներ կան, որ կբավարարի հերթեր չգոյանալուն, բայց չեմ էլ կարող չնշել, որ էականորեն կնվազեն հերթերը Վրաստանում: Որակական առումով հայ մասնագետներն ավելի լավ գործ են անում, քան վրացի կամ թուրք մասնագետները, ես դա կարող եմ հստակ նշել»:

Նրա խոսքերով՝ սահմանին ղեկը փոխելու կետեր ունենալը, կարծես, այդքան էլ իրատեսական չէ:

Ըստ «Ղեկը աջ» նախաձեռնության անդամի՝ սահմանին այսօր արդեն 200-ից ավելի մեքենա է կուտակված: Խոսքն այն մեքենաների մասին է, որոնք կանգնած են Բագրատաշենի մաքսակետում: Ընդհանուր առմամբ՝ մոտ 3000 մեքենանի պատվեր է կատարվել, իսկ հոկտեմբերի մեկից պաշտոնապես արգելվել է աջ ղեկով մեքենաների մուտքը Հայաստան:

«Ղեկը աջ» նախաձեռնության անդամի խոսքերով՝ Բագրատաշենի անցակետում կուտակված մեքենաներն արդեն խանգարում են նաև մաքսակետի աշխատանքին: